Главная страница | Ужасы | Dilo Tša Kotsi

Dilo Tša Kotsi
Amy Blankenship


Dilo tša Kotsi
Puku ya 3 ya Kgokagano ka Madi

Amy Blankenship, RK Melton
Translator: Matlakala Kganyago

Tokelo ya Ngwalollo 2012 Amy Blankenship
Phetolo ya Bobedi ye Phatlaladitšwego ke TekTime
Ditokelo ka moka di beetšwe thoko.

Kgaolo ya 1
Envy o be a sepela ka mafolofolo ka borobalelong bja gagwe a paka tše dingwe tša dilo tša gagwe ka gare ga sutukheise ye ntsho ya letlalo ya gagwe. O ile a emiša le go lebelela buti wa gagwe ge a lemoga gore o be a bušetša morago dilo tšeo a di pakilego nako le nako ge a mo furalela go hwetša tše dingwe. O be a mo hlasela go tloga mola a boago gae gomme o be a thoma go mo gakantšha.
“Emiša seo hle,” Envy a realo ge a goga diparo tše mmalwa go yena gomme a di lahlela morago ka sutukheiseng. O ile a iša meriri ya gagwe ye mehubedu ye metelele legetleng la gagwe gomme a mo fa tebelelo ya temošo.
“Efela o tloga fa? O mo tsebile nako ye kaakang…. beke? O na le bonnete bja gore ke seo o nyakago go se dira? Chad a bušeletša gape le gape bjalo ka modumo wa go ipušeletša.
“Karabo e sa swana Chad,” Envy a mo tsebiša ka lentšu la go iketla, a ipotšiša gore o swanetše go bolela seo gakae pele a mo kwa gabotse. O ile a lebeletšana le yena gomme, a mo swara bjalo ka ngwana wa setlaela, a bolela mantšu ao ka go nanya, “Ke nyaka go yo dula le Devon, gomme ke seo ke ilego go se dira ka nnete.”
“O tla ba le bonnete bjang gore ka morago ga beke goba kgwedi go tloga gabjale, a ka se hwetše mosetsana yo mongwe gomme a go lahla?” Chad a botšiša ka phegelelo.
“A ka se dire bjalo.” A tšwela pele le go paka, a leka go thibela maikutlo a mo tshwenyago a gore o tlogela buti wa gagwe a nnoši. O gotše ke monna go ka lla bjalo, go feta fao ke lephodisa.
“Ga o na bonnete bja seo. Ke ra gore, o bina ka tlelapong a sa apara go felelela bošego bjo bongwe le bjo bongwe gomme wena o tla felela ka morago ga para o rekiša dino go batho ba go se tsebalege,” Chad a realo a ikemišeditše go ntšha meriri ya gagwe hlogong,” Gabotse seo a bego a nyaka go se dira ke go goeletša ka ge a ikamantše le selo sengwe sa kotsi gakaaka… le motho yo mongwe wa kotsi gakaaka.

Envy a tlogela go paka gomme a lebelela kgaetšedi ya gagwe a nnoši yo a mo ratago kudu efela o be a ikemišeditše go mo kgama. “Sa pele, ga ke na bonnete. Sa bobedi, a ka no ba a sa apara go felelela, efela o bonala a le botse ka tsela yeo. Sa boraro, ke tla ya go bina le yena ka kheitšeng. Sa bone, a batamela kgauswi o kare o nyaka go mmotša sephirinyana se sebe, o swanetše go hwetša yo o ka robalago le yena.”
Chad a lebelela sesi wa gagwe yo monnyane, “Ga ke nyake go robalana.” A rora ge a mo emišetša ntšhi ya gagwe ya leihlo.
“Eee, go bjalo.” A bula teware ka maatla gomme a ntšha diaparo tša ka gare tše dinnyane.
“Aowa, ga go bjalo.” Chad a tswalela sutukheise ka maatla pele a ka di tsenya ka fao gomme a rapela gore e no ba mokotla o mogolo wa bošego botee fela.
“E go bjalo.” Envy a šikinya phenthi mahlong a gagwe o kare o dira gore a mo kwešiše.
“Aowa ga go bjalo.” A mo phamola yona ka diatleng tša gagwe.
“Aowa go bjalo.” A sesefatša mahlo a gagwe ka pefelo.
“Ee go bjalo.” Chad a emanyana gomme a bethela phenthi yeo moyeng ka letswele. “AKGAA HLE!”
Devon o be a le ka phapošing ya go khutša a ithekgile ka leboto a selagantše dikgokgoilane tša gagwe gomme diatla di le ka merabeng ya ditšene tša gagwe… a leka gore a se sege. Kgakgano ya bona e mo gopotša kudu ka kamano ya gagwe le bana ba gabo.
O be a bona gore Chad o be a tloga a rata Envy, gomme ka lebaka la seo, a ka se eme magareng ga bona. Chad o be a dira seo a se dirago bokaone… e be ele buti yo mogolo go yo mongwe wa go tuka mollo wa hlogo ye hubedu. Aowa, a ka se ba emiše, efela a ka lefela tšhelete ye ntši go no ba bogela.
Devon a segela godimo gomme a leka go thibela seo ka go itira o kare o a gohlola. Motho yo mongwe a kokota lebating gomme mahlo a gagwe a matalalerata a aese a sesefala ge a ipotšiša gore ke mang yo a etalago bana bao ba motho ka masa.
“Devon, nkhweletše gore ke mang?” Chad a goeletša.
“Go lokile,” Devon a araba le go tloga lebotong pela a leba mojakong. Ge a bula lebati, a palelwa ke go itshwara efela a nyenyebala ka tebelelo ya makalo go tšwa sefahlegong sa Trevor. “Dumela Trevor, ke kgale re sa bonane.”
Bjalo ka ge a tshepišitše, Trevor o be a tlile go bolela le Chad ka seo a se bonego kerekeng. Selo sa mafelelo seo a bego a sa se letela ke go bulelwa lebati ka Devon Santos. Ka go palelwa ke go laola phetogo ya gagwe, Trevor a emiša letswele la gagwe ka bjako gomme a betha lengau mo nkong… ka maatla.
Devon a katakatela morago ka dikgato tše mmalwa gomme a phumola madi nkong ya gagwe. A lebelela seo le Trevor gape, a ntšha meno. Pele Trevor a ka šikinyega, Devon a mo ntšhetša ka ntle ga lebati le go mo iša ka pele ga jarata.
Diaparo tša gagoga le go wela kgakala ge bobedi bo fetogela go dibopego tša bona tša bophoofolo. Devon a dikologa Kodiak gomme a lla ka go goeletša ka maatla ga lengau. Trevor a rora gomme a emelela ka maoto a morago a gagwe ge a leka go swara lengau leo le mometšego mokokotlo wa gagwe.
Ka gare, Chad le Envy ba kwa go rora ga Devon gomme ba kitimela ka ntlong le go leba lebating la ka pele. Ba ile ba tšidifala ge ba bona Devon a elwa le bera ye kgolo ka pele ga jarata ya bona. Lephodisa le ile la thaba ka bjako ka ge ba be ba dula kgole le baagišani bafe goba bafe.
Chad a phethola switšhi ya gagwe ya monagano, a tswalela maikutlo a gagwe ka moka. E be e le se sengwe seo se kwagalago ka gare ga gagwe ka mehla ge seo se direga gore a okobale le go tonya… le ka gare ga ntwa ya dithunya. A obelela seswara sethunya lethekeng la gagwe, Chad a ntšha sethunya sa gagwe gomme a thuntšhetša moyeng gatee a leka go goga šedi ya bona. A nyenyebala ge seo se sa ba tšhoše gomme a kwa a bethwa letsogong la ka nngeleng.
“O tsebiše yo mongwe ge eba o ile go thuntšha selo seo!” Envy a realo ge a swarelela seatla sa gagwe tsebeng ya ka magojeng ka modumo wo wa lešata.
Zackary a tšwa ka koloing ya gagwe a hemela godimo le go lebelela bana bao ba babedi ge ba elwa. Gabotsebotse, batho ba menagano ya go fola ba swanetše go ba tsena gare. O ile a myemyelela motlae wa gagwe ka gobane ga go yo a ka dirišago lentšu le go fola go hlaloša yena. A emiša seatla sa gagwe ka pele ga gagwe, a lahlela lephoto la mollo go bafetogi ka bobedi, a ba dira gore ba fofele morago ge moela o tee wa mollo o kitima go selaganya jarata o ba ahlologanya.
“Ge o sa nyake gore boya bja gago bo tlabolwe ke mollo, gona go kaone ge le ka fetogela go batho gomme la itira o kare le na le kgopolo ye nnyane,” Zackary a ba lemoša ge kgabo ye nngwe e thoma go gola ka seatleng sa gagwe se otlolotšwego. “Bobedi bja lena le ile go itshwara bjalo ka batho ba bagolo goba bana, ka gobane ga go na phapano go nna le gatee?” a myemyela ka go tonya ge kgabo e golela godimo gomme e leba go tebanya ya yona.
Ka go tseba gore Zackary a ka dira seo, Trevor a fetoga gomme a lebelela go selaganya kgabo ye tukelago go molwantšhi wa gagwe. Ge a lebelela monna yo a mo utsweditšego Envy kgatelelo ya madi a gagwe ya golela godimo gomme a swanelwa ke go hlokomedišiša go swarelela go sebopego sa gagwe sa bomotho.
Devon a fetoga efela a ema ka mokgwa wa ntwa, a sa tshepe Trevor gomme a nyaka go mo wiša. O ile a tlošwa kgopolong yeo ke go kwa lentšu la Chad le goeletša a re “Modimo wa go Loka” gomme a lebelela bana bao ba motho. A bona ge mahlo a go tomoga Envy a lebeletše Trevor… yo gabjale a lego ka lepono, Devon a rora ka maatla ge a goga šedi ya gagwe gore e boele morago mo go swanetšego… go yena.
Envy a phophola ka pele ga hlogo ya gagwe gabjale ka ge banna ka bobedi ba le ka mapono, efela ba sa gobala kudu. Devon o ile a mo laetša ka mo bafetogi ba folago ka pela ka fao a tseba gore dilo ga se di mpefale ka mo go lego ka gona. Tebelelo ya gagwe ya leba go Trevor, a sa makaditšwe ke gore o be a ratana le bera ya go tšhoša lebaka le letelele ntle le go tseba seo.
Trevor a myemyela ka taba ya gore go rora ga Devon ke ka lebaka la mona… gomme seo se loketše lengau.
Chad a ponyaponya a ipotšiša gore ke mang yo a mo tšhetšego ka esiti. Gantši ke yo a dulago a homotše maemong a mabe, a hemela ka gare ka maatla gomme a bula lebati gore a eme gabotse. "Se ke ntlo ya ka, ka fao le ile go bapala go ya ka melao ya ka. Envy o ile go dula fa le nna, gomme bohle bao e sego batho ba tloga.” A leka go tswalela lebati efela Envy a mo thibela.
“E sego ntle le molekani wa ka,” Devon a rora a leka go hlohlora kamego ya kgalagalo yeo a e hwetšago. Akgaa, ke mang yo a tsebago gore Trevor o tiile gakaaka? Tsebo yeo e be e sa mo swara gabotse.
“Aparang diaparo tša lena,” Envy a nyenyebala le go lebelela Zachary ka mahlo a dipotšišo. Go bonala eke yena le Trevor ke barware, mmala wa bona o be o swana kudu. Phapano ye kgolo ke gore Zackary o na le moriri o mokopana gomme ke o motelelenyana. “Go lokile, ke a tseba gore ke eng… efela wena o eng?”
Zackary o ile a inama ka boikgantšho, “O ka mpitša mohlokomedi,” a myemyela ge malakabje a tima. “Mohlokomedi wa batho le dibopiwa tšeo di sa tlwaelegago,” a itokiša gomme a lebelela Trevor. “Ga senke o mmotše selo?”
“Aowa, ga se a mpotše,” Envy a lebelela Trevor gampe gomme a retologela go Zackary. “Mohlokomedi? Gabotse seo se bolela eng? Gape naa wena le Trevor le barware?” O be a palelwa ke go itshwara gomme a botšiša.
“Go bolela gore re šireletša mahlokore a mabedi,” Trevor a araba le go tlaleletša ka go re, “Gape aowa. Ka mo lapa le emego ka gona, ga ke na yena.”
“Joo, gabjale o tletše ka tshedimošo,” Envy a ngunanguna.
“Ke lekile go go botša,” Trevor a mo gopotša ge a le gare a apara borokgo bja gagwe bjo Zachary a mo lahletšego. “ga se phošo ya ka ge o sa ntheeletša.”
Dipounama tša Envy tša bulega efela a emanyana… ka go ipona molato ge a gopola ka bošego bja mafelelo ge a bona Trevor. O mmoditše gore o na le se sengwe seo se amanago le C.I.A. efela o be a sa mo kgolwe. O ile a mo theisara gape ka ge a be a nagana gore o mo dira setlaela go ka kgolwa maaka ao a phatlalatša. Efela gape, o be a nagana bjang gore a ka mo kgolwa mola a be a tšwele le go bina le basadi ba bangwe ka mokgwa wa kgoketšo ya thobalano?
Se sengwe gape ke go re… o mmoditše gore ke go iphihla ka mošomong wa gagwe. Envy a nyenyebala ge a thoma go rengwa ke hlogo gomme a akanya gore Trevor ke lešilo le legolo go feta ka mo a bego a nagana go mo dira gore a gopole ka seo.
Chad a lebelela lengau pele a ka leba ka gare. O ile a boa le ditšene gomme a di lahlela go Devon.
“Ga re nyake thušo ya gago,” Devon a realo ge a zipa ditšene gomme a leba go Envy gomme a mo gokarela lethekeng.
“Joo ee? ke phološitše sesi wa gago mola o le gare o utswa molekani wa ka,” Trevor a ikarabela pele a lebiša tebelelo ya gagwe ya go fiša go Envy.
Envy a emiša mahlo a gagwe gomme ba lebeletšana ka mahlo a Trevor a botalalerata bja silebera. O be a sa kgona go bona go kwa bohloko ka gare ga oma gomme seo sa dira gore pelo ya gagwe e tšitlelane ka go se iketle. O be a sa mo hloya le gatee. Gabotsebotse, o be a sa rata Trevor… efela go se swane le ka mo a ratago Devon. Dipounama tša gagwe tša bulega go leka go hlaloša, efela Devona a mo thibela go dira seo.
“Goreng o tlile fa? O be o re šetše morago?” Devon a botšiša, a sa rate ge Trevor a tšwela pele go bea Envy lefelong leo. O dirile kgetho ya gagwe gomme Trevor o swanetše go kwešiša mabaka ao ka ntlhanyana yeo pele seo se mo kweša bohloko.
“Gabotse, o tlile fa go bona nna,” Chad a realo ka boleta ka mo a kgonago. A retologela go sesi wa gagwe, a tšea seatla sa gagwe gomme a mo gogela go yena ka boleta mola a lebeletše Devon ka godimo ga legetla la gagwe. “Ge o sa belaele, ke nyaka go bolela le yena ka sephiring motsotswana fela.”
Ge Devon a mo lokolotše, Chad a mo gogela lebating le go le tswalela. Gabotse o ile a ithibela go le notlela ka senotlelo. Ntle le fao, le seo a sa tšwago go se bona ka jarateng, go a bontšha gore senotlelo se ka se be le mohola.
“O na le bonnete bja gore o ka se dule fa bošego bjo botee? Go re ke se gafe?” a mo kgopela, le ge a be a tseba gore o lahlegetšwe ke taolo ya bophelo bja gagwe makga a mmalwa kua morago.
Envy a gokara buti wa gagwe gomme a mo fa kgokaro yeo e tsomegago kudu, gomme a boela morago ka kgato e tee go mo lebelela, “Nka se kgone. O bone seo se hlagilego kua kerekeng bošegong bjo. Bohle ba phatlaletše, ka fao Warren o leka go beakanyetša kopano mesong.”
O ile a lebelela morago lebating ge kgopolo ye nngwe e mo tlela. “Ntle le fao, go dula le bona ke lefelo la polokego gabjale ka nnete. Gabotsebotse, ke tla go lletša mogala gomme ka go botša gore o tle neng kopanong ge eba e tla swarwa go Mmino wa Ngwedi goba Lesedi la Bošego. Ke nyaka gore o ntirele sengwenyana. Etla le Trevor le mošemane wa mollo kopanong, ka gobane ge eba seo ke se kwelego ke nnete… re tlile go tsoma thušo ka moka yeo re ka e hwetšago.”
“Divamphaya?” Chad a botšiša a tsena ka go mokgwa wa sephodisa le ge a be a phophola bokamorago bja molala wa gagwe mo meriri ya boleta ye mennyane e akantšego go emelela saruri ka mafelelong.
Envy a dumela ka hlogo, a nyenyebala, gomme a šikinya hlogo, “Ee divamphaya, efela go na le letemone leo le šwahlilego gomme…”
Chad a mo obelela le go mo swara ka matsogo, “Letemone? Ga go yo a boletšego se sengwe ka ga matemone!”
Envy a hemelana gomme a dumela ka hlogo, a tshepa gore seo a tlilego go se bolela se tla dira gore a ikwe bokaone, ‘Ee, letemone. Ditaba tše dibotse ke gore re na le barongwa ba babedi ka lehlakoreng le rena. “A mo fa myemyelo ya go fokola a tshepa gore ga se a idibale.
“Barongwa?” Chad a mo lesa gomme a ithekga ka leboto ka boima, “Modimo wa go Loka.”
“Ka nnete,” Envy a dumela ka hlogo ge a mmogetše ge a sepetša menwana ya gagwe ka meriring o kare o lwantšha phegelelo ya go e tumula. “Gabjale šomana le Trevor. O tla ntirela seo? O tle le yena le Zackary kopanong gosasa.” A loma pounama ya ka tlase ya gagwe a sa nyake go dira tiragatšo ye nngwe. “Go go leboga, nka se tšeye dilo tša ka bošegong bjo… ge seo se ka dira gore o ikwe o le kaone.”
Chad a dumela ka hlogo gomme a mo fa myemyelo ye nnyane, “Kwano.”
A bula lebati gore ba tšwele ntle bobedi efela bobedi bja ema ge ba bona Zackary a eme magareng ga banna ba babedi ka legoswi la go tuka ka kgabo a ba šupile ka bobedi.
“Aowa hle, re a tloga,” Envy a realo gomme a kitimela lebating a swere seatla sa Devon ge a lebile koloing ya gagwe.
Trevor a thoma go latela efela Zackary a mo thibela, “ema gona fao, mošemane wa morategi. Re swanetše go šomana le buti pele.”
“A re tseneng ka gare gomme re bediše kofi,” Chad a ba botša, gwa latela go hemelana ka tebogo ge Trevor a retologa ka pefelo gomme a leba ka ntlong ya gagwe bjalo ka monna yo a lego thomong. A dumela ka hlogo ge Zackary a latela Trevor ka gare, gomme a tswalela lebati a ipotšiša gore gabotse o itsentše ka gare ga eng.
Ge motšhene wa kofi o kgatlampana, Chad a retologela go baeng ba gagwe ba babedi. “Gabjale, o be a na le dipotšišo tše dintši tša go feta dikarabo gomme seo se be se sa thuše ka selo. “Gabjale ke eng seo Envy a bego a se bolela sa gore go na le letemone leo le šwahlilego? O boletše gape gore Warren o ipiletša go bohle gosasa go tla kopanong ka lebaka la seo se diragetšego bošegong bja lehono kua kerekeng gomme o nyaka gore boraro bja rena re tsenele kopano yeo le ge re sa memiwa.”
Trevor o ile a palelwa ke go itshwara ge myemyelo ye nnyane e raloka dipounameng tša gagwe. Ka fao Envy o nyaka ge a amega… o nyaka gore a be kgauswi. O be a sa mmone molato. Ka tsela yeo Devon a mo šireletšago, ga a kwe a bolokegile ka botlalo. Ka go tseba gore o a mo hloka gwa mo dira gore a kwe pefelo ya gagwe e nyamalala boithekgong bjo.
“Re be re tlile go tsenelela moletlwana.” A lebelela Zackary yo a netefaditšego setatamente seo. A myemyela gape ge a lemoga gore o ile go bona Envy mo diiring tše mmalwa. “Ke nagana gore ke nako ya go go botša gore go hlaga eng.”
O ile a nyenyebala ka gare ge a nagana gore o diriša maemo a gagwe go batamela Envy gape. Gape o be a lemoga gore go tla bonala bjang ka seo go bohle. Devon o tla akanya gore o diriša Envy gape gomme seo ga se kgole kudu le nnete. Gomme gape, o be a se kgole ka go diriša buti wa gagwe go mmatamela le go dira mošomo wa gagwe ka nako e tee. Devon o tla swanelwa ke go ithuta gore dilo ka moka di lokile go lerato le ntwa… gomme e re mofetola sebopego yo mokaone a fenye.
“Ke theeleditše,” Chad a ngunanguna gomme a selaganya matsogo a gagwe kgareng go lebiša šedi ya gagwe go Trevor go tšwa mo e bego e ile gona. Ga senke a kgone go bala menagano efela o be a dira mošomo wo mobotse wa go bala Trevor gabjale.
“Ga re tsebe tše dintši ka ga letemone, efela ke gore le be le tantšwe ka fao mengwagakgolo ye mmalwa ya go feta. Go ba gona ga lona go tlile pele ga seo re nago le sona ka faeleng ya P.I.T. efela re tsomana le ditšhupetšo,” Zackary a thoma gomme a holofela gore Trevor o tla oketša go seo.
“Ka fao o be o tseba gore letemone le golegilwe ka tlase ga dirapa mengwagangwa yeo e sa tsebjego gomme le be le sa dire selo ka seo?” Chad a nyaka go tseba.
Trevor a mo emišitša ntšhi ya leihlo, “O be o nyaka gore re dire eng ka seo? Re le thuše go lokologa? Le be le tantšwe ka fao gomme ga re tsebe gore go tlile bjang gore yo a welego le vamphaya ba kgone go roba maleatlana ao a bego a le swere.”
“Yo a welego?” Chad a botšiša. “O bolela ka barongwa bao Envy a mpoditšego ka bona?”
Zackary a dumela ka hlogo, “Ee, ke kgale kudu re tseba ka bona. Re a tseba gore go na le ba bangwe, efela ga re tsebe gore ba kae, gomme mogongwe ba welego ba babedi bao ba dulago mo motsesetoropong ba be ba sa tsebe ka go ba gona ga yo mongwe yo a bego a tantšwe ka leweng go fihlela ge yo mongwe a eya ka fao.”
“Re na le motho yo mongwe yo a kgonago go šomana le matemone gape,” Trevor a realo. “Ka mahlatse, o tla kgona go hwetša seo ge re ka mo lletša mogala.”
“Ga se o šiwe ke nako go ka boela morago,” Zachary a realo go Chad. “E no bolela gomme re tla phumola kgopolo ya gago ya sengwe le sengwe seo se hlagilego.”
Chad a nyenyebala gomme a thoma go ba tšhelela kofi ka boraro bja bona. E be e le lephodisa bophelo bja gagwe ka moka ka ge a nyaka go dira phapano. Go feta gatee, o be a ekwa o kare ga a dire go tlala seatla. Ka mehla go ba le morekiši wa diokobatši o mongwe, mmolai o mongwe, o mongwe wa go tshela melao ya sephethephethe… o kare seo ga se a lekana ka dinako tše dingwe. Efela seo Trevor le Zackary ba se dirago se dira phapano… mohuta wa phapano wo Chad ka mehla a nyakago go dira.
A nwa kofi ya gagwe lebaka le letelele, a bea komiki fase gomme a dumela ka hlogo gatee. “Ke tla ba le lena.”

*****

Angelica a akanya gore megala ke ye mebe go feta matemone ge wa gagwe o thoma go lla ka iri ya boraro mesong. Ge a lebelela ID ya moletši, a sesefatša mahlo gomme a swara seamogedi. A se bulela, a kgorometša moriri wa gagwe o moso gore o tloge tseleng ge a o bea tsebeng ya gagwe.
“Ge fela lefase le ewa, mawatle a fetoga a mahubedu, mauba a šupa a Egepeta a boile, goba o a hwa, gona go swanetše go ba le tlhalošo ye kaone ya go ntsoša,” a rora.
“Aowa, hle Boo… ke tsela yeo o ka bolelago le bera ya gago Zacky?”
Angelica a tima mogala gomme a lahlela hlogo ya gagwe morago mosamelong. A sa re ke a robala mogala wa thoma go lla gape. Ntle le go lebelela mogala, a o bula gomme a bolela gape.
“Ke ile go hwetša, Zackary,” a realo. “Wena le mpšanyana ya gago.”
“Joo ruri, ditekolamorago tša Moloi wa Oz,” Zackary a goga moya ka maatla gomme Angelica a myemyela ka sephiring ka mebolelwana ya gagwe ya kgale, a thabišwa ke gore ga a mmone.
“O nyaka eng?” a dula fase, a kgorometša moriri wa gagwe sefahlegong.
“Re na le yo mongwe o mobe wa go bitšwa Manyami,” Zachary a realo.
Angelica a fofela ka ntle ga mpete gomme a thumaša lebone. “Ke bogolo bjo bokaakang?”
“Ga ke na nnete, efela ke ile go akanya gore o legatong la bošupa.” A myemyelela mogala a tseba gore seo se tla goga šedi ya gagwe… gomme o rata kudu go goga šedi ya Boo.
Angelica a leba ka phapošing ya go khutša gomme a bula lepothopo ya gagwe. A tlanya dilo tše mmalwa gomme a nyenyebala.
“Legato la bošupa? O na le nnete?” a botšiša. Sengwe le sengwe sa legato la bohlano se kotsi kudu gomme ga sa tlwaelega le gatee.
“E no ba kakanyo,” Zachary a araba. “Le ile la kgona go tanya yo mongwe wa ba welego yo re bego re mo latela gomme o kare yo mongwe wa ba welego o be a le kua tlase le lona lebaka le letelele. Bjalo ka ge ba bonwa e le ba legato la bošupa gona re akanya gore ge a kgona go tanya eng goba eng ye maatla gona ba lekana.”
Angelica o be a tsoma ka datapeiseng ya gagwe. Go ka feta dikotara tše tharo tša yona e ile ya hwetšwa ntle le semolao ka divolteng tša Vatican, efela go se yo a ka mo ngangišago ka dipoelo tša gagwe. Taba ya gore ke letemone la legato la bošupa e swanetše go ba e utulotšwe ka Los Angeles gomme ke lebaka la go lekana go tsoša e sego yena fela, efela sehlopha sa P.T.I. gape.
Letemone le lengwe le le lengwe le be le beilwe maemong a tee go fihla go lesome, gomme legato la lesome le lekana le Sathane ka boyena. Ga a nyake go ipona a kopana le mang goba mang wa go ba le maleatlana a go tswalela letemone la legato la bošupa… o tla nyaka ledimo la Modimo go tloša seo.
“Ga ke hwetše selo ka ga letemone la go bitšwa Manyami ka lefelong la Los Angeles,” a realo ka morago ga metsotso ye mmalwa. “E re ke kgokaganye hard drive ya ka gomme ke lebelele difaele tšeo.”
A kwa Zackary a bolela le yo mongwe mo boithekgong gomme a nagana gore ke Trevor go fihlela a ekwa lentšu le lengwe le tsena poledišanong.
“O bolela le mang?” a botšiša ka go nyaka go tseba.
“Leloko le leswa la sehlopha sa rena, Chad,” Zachary a araba. “Ke lephodisa la selegae yo a tsebago go mo feta, ka fao re mo tlišitše ka gare go šireletša mašaba, gomme ge ke bolela ka mašaba ke ra ditlaela tšela a šomago le tšona.”
Angelica a myemyela, “Ba tloga ba šoma gampe fao.”
“E sego kudu,” Zachary a realo.
“Go lokile,” Angelica a realo. “Ke e kgokagantšhitše, a re lekole seo gomme re bone gore ke tla hwetša eng fa.”
“O bolela gore ga o tsebe?” Zachary a botšiša ka makalo.
Angelica a hemelana, “O a tseba gore ke bjang. Ke lebala le hlogo ya ka ge nkabe e sa mometšwa ka dinako tše dingwe. Ke bile le sebaka sa go hlohlomiša bonnyanenyana bja selo se.”
“Ee, o ile wa e laolla ka lepotlapotla.” Zachary a realo le go hemelana. “Mabaka a mabotse, mabaka a mabotse.”
Angelica a fihlelela hard drive gomme a tlanya lentšu ka go tlhagišo ya go tsoma gomme a kgotla tsena.
“Ke nagana gore le be le itshwere gabotse.” Angelica a botšiša a ithekgile ka sofa ge khomphutha e dira modiro wa yona.
“Aowa hle,” Zachary a sega. “O ka se ye le nna felo, wa gopola?”
Angelica a nyenyebala ge a gopola dikgwedi tše mmalwa tša go feta mo ba ilego moletlong o mogolo ge ba be ba kitimiša phiri ya go fetoga ya mengwaga ye mene yo a ilego a timela gomme a sa thabišwe ke seo. Mafelelong a bošego, Zackary o ile a lahlegelwa ke borokgo bja gagwe ka gobane phiri ya go fetoga ka nako ya pefelo ya bongwana ya bo gagola ka diriparipana.
Karolo ya go thabiša ke gore Zackary ga se a bolele selo, o bo apotše gomme a sepela gohle ka borokgwana bja ka gare le baki ya tuxedo le hempe. Angelica o be a sa tsebe gore a swabe goba a sege. Ge a bona maoto a gagwe ka disokisi tša go goma dikhurung le dieta tše di botse gwa mo segiša kudu ge basadi ba bannyane ba mmalwa ba mo dikologa ba nyaka go bina le yena.
Lapothopo ya gagwe ya tswinya gomme a boela pele go lebelela seo go tsoma ga gagwe go se hweditšego.
“O hweditše se sengwe?” Zackary a botšiša.
Angelica a bula difaele tše mmalwa tšeo di nago le lentšu la Manyami ka gare gomme a thoma go bala. Sekerete sa gagwe sa phonyokga menwana ya gagwe ge a bala sa wela leotong la gagwe.
“Itšhuu, akgaa hle!” a rogana le go topa sekerete sa gagwe, gomme a se tima ka pela.
“Tšohle di lokile?” Zackary a nyenyebala ka go tshwenyega gomme a emiša seatla ge Trevor a nyaka go tseba gore go hlaga eng.
Angelica a bala tshedimošo gape gore a kgonthiše seo. “Ke ile go namela sefofane sa go latela seo se tlogago,” a mo tsebiša pele a tloša mogala tsebeng ya gagwe. A se arabe dipotšišo tša Zackary gomme a lebelela seširo gape. Ga se seo a se badilego seo se netefaditšego gore seo se kotsi… ke gore moetapele wa PIT ka tsela ye nngwe o mo tswaleletše ka ntle ga faele.
Ge eba Storm o na le diphiri… gona o nyaka go tseba lebaka la seo.

Kgaolo ya 2
Anthony o be a eya godimo le fase go selaganya lebato la mabolo ka phapošing ya borutelo ya gagwe. O ile a sepediša seatla sa gagwe ka meriring ya gagwe ye meso ka kgakanego le pefelo. O a tseba gore o ile a lahlegelwa ke maikutlo ge a bolaya Arthur gomme o lahlegetšwe ke tsela ya go kgokelela Jewel go yena bjalo ka molekani wa gagwe… e sego gore seo se ka mo thibela.
O be a nyaka gore maemo a okobale… efela ge Arthur a bolela ka tatago Anthony, karolo ya phiri ya go fetoga ya gagwe ye lahlegelwa ke seo. Gabjale o tla gapeletšega go diriša kgapeletšo ya mohuta wa go fapana go monyadiwa wa gagwe. Bothata botee ke gore, o swanetše go mo hwetša pele.
Motho yo mongwe a kokota lebating gomme Anthony a emiša go ya godimo le fase gomme a lokiša moriri wa gagwe le diaparo. Ke yena moetapele, gomme seo se tla le magato a mangwe a seriti.
“Tsena,” a realo ka lentšu la go tonya.
Lebati la bulega gomme yo mongwe wa diphiri tša gagwe a tsena, a tswalela lebati ka morago ga gagwe.
“O hweditše eng?” Anthony a botšiša.
Leloko la sehlopha la bonala le tšhogile gomme la tloša sehuba mogolong. “Ke ile ka šala ka mo o laetšego go bona ge eba moruti o tla boa kerekeng. E be e se kgale ge ke le fao ge go tla hlaga mathata ka kerekeng le ka dirapeng tša ka morago ga yona. Batho ba be ba tletše gohle, ba bangwe o sa tsebe gore ba tšwa kae.” A emanyana le go metša mare ka go tšhoga pele a tlaleletša, “Ke ge ke lemoga gore Jewel o na le bona.”
“Gona o gokae?” Anthony a nyaka go tseba ge a tswalela sekgoba magareng ga bona ka go potlaka. “Goreng o sa boa le yena?”
Phiri ya katakata ka tlalelo ka mahlong a gagwe a tseba gore go tliša ditaba tše mpe go moetapele wa bona ga se selo se sebotse. “Go be go sa kgonege,” a realo.
Seatla sa Anthony ka bjalo sa tšwa le go swara mošomedi ka megolo, a mo emišetša moyeng. “O phiri ya go fetoga. Goreng o sa mo tšea?”
“O be a dikologile ke bafetogi… ba bantši,” phiri ya hlaloša, a emiša diatla tša gagwe go leka le go fokotša kgatelelo mogolong wa gagwe.
Seatla sa Anthony se mo kgwahlišitše gomme mahlo a gagwe a fetogela go mmala wa gauta wa go tšhoša. Buti wa gagwe mafelelong o boile Ithali, o be a na le bonnete bja seo. “Ga se ke go rute gore o lwa bjang le sehlopha se sengwe sa geno goba aowa? Buti wa ka o be a ka se go fenye le gatee.” Ke maaka. Phiri e be e tla be e robetše go gongwe ka moleteng ge a be a ka leka go lwa le Andreas Valachi.
“Eeeee beeee eee see diphiiiiri,” phiri ya kgamakgametša ge e leka go hema.
Anthony a lebiša šedi ya gagwe go monna wo a mo kgamago gomme a tloša seatla sa gagwe, a bona gore o nyakile go mmolaya. “Ke mang?” a nyaka go tseba ka pefelo yeo a e gateletšego e kwagala lentšung la gagwe.
Phiri e be e rapaletše lebatong go goga moya. A leka go emelela ka diatla le dikhuru pele a ewa ka phatla lebatong la mabolo la go tonya. O ile a khupulla bokamorago bja molala wa gagwe go laetša boineelo go moetapele wa gagwe gomme a duma gore nkabe a tšhabile ge a be a na le sebaka.
“Dikatse… ke nkgelela dikatse,” a realo ka morago ga metsotswana ye mmalwa, “Dikatse tša naga le mangau... ka bontši.” A emiša hlogo ya gagwe gomme a bona mahlo a Anthony a sesefala ka matšhošetši. Ka bjako a tlaleletša ka gore, go be go na le katse ya naga yeo e bego e dula e mo šetše morago. Lefelo leo le be le tletše ka divamphaya gape. Karolo ya kereke e ile ya hlahlamoga, gomme koloi ya lephodisa ya bonagala.”
Anthony a ema fao a leka go laola pefelo ya gagwe ye golago. Efela, ge a dutše a eme fao, a kwa a tlala pelo. Leano la gagwe la go buša molekani wa gagwe yo a tšhabilego le senywa ka mehla ke ditiro tša gagwe goba ditiro tša balatedi ba gagwe ba go hloka tlhokomelo.
A bitša mohlokomedi wa gagwe gore a batamele. “Mo iše lebatong la ka tlasetlase mo a ka fodišago go palelwa ga gagwe.”
Phiri ya dula ka dikhuru tša yona ka tlhagišo ya go kgopela tshwarelo sefahlegong. O ile a kwa dikanegelo ka ga lebato la ka tlasetlase le seo se lego ka fao. Ba bangwe ba diphiri tša go fetoga bao ba phetšego ka tlaišo yeo ba sa na le mabadi mebeleng ya bona go laetša seo. O ile a lla gabohloko ge matsogo a tšewa ke bahlokomedi gomme ba mo goga ka maoto a gagwe.
Bahlokomedi ba ile ba se mo lebelele goba go bolela se sengwe sa go mo homotša goba go mo roga. Ge ba be ba na le tsela ya bona, ba be ba tla mo tlogela gore a kitime. Go bona Mtšana Jewel o be a na le lebaka lefe goba lefe la go tšhabela Moetapele. O be a sa thaba, gomme, ntle le maitekelo a Anthony a makaone, a ka se tsoge a mo ratile. Go phela ka tsela yeo, go ipshina ka go hloka mahlatse ga ba bangwe e be e se tsela ya nnete ya diphiri tša bafetogi… Tsela ya Segongwana.
Ka nako ye nngwe, ba be ba šireletša batho go bobe bjo tšhošetšago lefase. Gabjale, ntle le merafe ye mmalwa yeo e dulago go selaganya United States le mošetša, e be ele ba babe. Go be go sa makatše ge batho ba dira dimobi tša go ba laetša e le dimpša tša marabi tšeo di hlolago mahu le tshenyo.
Anthony a latela bahlokomedi ba gagwe kua lebatong la ka tlasetlase gomme a myemyela ge phiri ya mofetogi ye nnyane e tsetla ka go hloka lešata. Moago wa lebato la ka tlasetlase o ile wa fetolelwa go ntlo ye kgolo, ya tlaišo ka fase ga mabu yeo e tšeago dikwere tša maoto tše diketekete. Diketwane di fegilwe lebotong la go lebana le diswaro tšeo di momeditšwego go swarelela motho a eme thwii leswikeng la go tonya.
Ka magojeng go na le tafola ya go apešwa ka difepi le metato ya go otlela ya bogolo bja go fapana. Pitša ye kgolo mo mollo o tukago e be e na le ditšhipi tše mmalwa di tšwetše ka ntle go tlo fišeletša, tšeo Anthony a sa di dirišego ka mehla. Mafelelong, mo lebatong la thwii la go selaganya go seo go na le mothaladi wa disele tšeo di nago le batho ba mmalwa.
Diphiri tša bafetogi tše mmalwa di be di sepela ka meriting di lokiša didirišwa tše mmalwa tša moeng wa go kgethega yo Anthony a ilego a ba le mahlatse a go mo hwetša dibeke tše mmalwa tša go feta. Ba ile ba ema le go bogela ka go nyaka go tseba ge moetapele wa bona a tsena ka ntlong le bahlokomedi ba gagwe le phiri ye mpsha ya go tlo otlwa.
Anthony a emela morago ge bahlokomedi ba gagwe ba bofelela phiri lebotong gomme a ba tloša tseleng ge ba feditše.
“O nyaka re dira eng, Morena Anthony?” phiri ya mofetogi yo mogolo a botšiša.
“Ke nyaka gore o kgonthiše gore o ruta motho yo thutwana, Boris,” Anthony a araba. “O paletšwe ke go boa le monyadiwa wa ka gomme o swanetše go ithuta gore go šitwa ga go kgotlelelege.”
Boris a lebelela mošemane gomme a hemelana ka gare. “Ke mošemanyana fela.”
“Gona o tla ithuta ka pele,” lentšu la Anthony le be le hloka maikutlo.
Boris a emiša seatla sa mabadi gomme a bitša diphiri tša bafetogi tše dingwe. Ba batamela le go gagola bokamorago bja hempe ya phiri ye nnyane le go e bula. Boris a emiša se sengwe sa difepi, katse ya mesela ye senyane, gomme a se hwidinya moyeng. Phiri ya go bofelelwa ya tšutšubana le go dira gore Anthony a myemyele.
Boris a ema gabotse go lekana dikgato tše hlano ka morago ga lesogana gomme a lletša sefepi pele. Lesogana la goeletša ka go bethwa ka sefepi mokokotlong wa gagwe. Kgoeletšo ya tšwela pele ge Boris a tšwela pele go betha letlalo la go hloka mabadi. Mafelelong, a ema gomme phiri ya mofetogi ye nngwe ya batamela ka sekotlelo se segolo sa letswai. Go lla gabohloko go gongwe gwa latela ge letswai le lahlelwa go dintho tša go tšwa madi.
Phiri ye nnyane ya wela lebotong e holofela gore go tlaišwa go fedile, efela go goeletša gwa thoma gape ge petho e thoma leswa… efela ka nako ye difepi tše dingwe tše pedi tša thomiša.
Anthony a emiša seatla sa gagwe sa magoja gore a kgone go lebelela seo gabotse gomme a nyenyebala ge a bona gore o swanetše go ripa manala gape. A emiša magetla, a retologa go tloga fao gomme a leba seleng ya kgolenyana le tšohle ka mafelelong a lebato la ka tlasetlase. Myemyelo ya bonagala sefahlegong sa gagwe ge diketwane tša boima di lla.
Monna wa ka gare a ema ka maoto a gagwe ka bjako gomme a thibelwa ke go kgokwa ge a leka go obelela Anthony.
Maikutlo a Anthony a moyafala ka bjako ge a bona monna wa go ikgantšha ka gare. Myemyelo ya gagwe ya phatlalala ge a nagana tsela ya go hwetša Jewel le go mo tloša go dikatse tša naga tšeo a nyakilego tšhireletšo go tšona.
“Ke a thaba ge ke ile ka go thuntšha gatee Micah… nka go diriša gape e se kgale.”

*****

Tabatha a lebelela go dikologa bodulo bja gagwe bjo a bo abelanago le Kriss gomme a thuthumela. Gantši o be a sa be le taba ge a le noši efela ka mabaka a mantši, bošegong bja lehono go be go le bothata go šomana le seo. A lebelela ka ntle ga lefasetere ge a ekwa lešata a nagana gore ke Kriss o a boa. O be a nagana gore go lokile ge Envy le Devon ba mo tlogela gae ba leba legaeng la Chad, efela gabjale a lemoga ka mo a hlokago go ba le yo mongwe.
Envy o ile a mmotšiša ge eba o nyaka go sepela le bona ge mohlomongwe Envy a ka nyaka yo a ka mo thušago go šomana le buti wa gagwe. Efela, Tabby o be a nagana gore mohlomongwe Kriss a ka boa gae ka pela gomme o be a nyaka go mmotšiša gore go hlagile eng, ka fao a ganana le seo… gabjale o duma ge nkabe a sa dira bjalo.
Ge a nagana ka Kriss gwa dira gore a nagana le ka Dean le ka mo a itshwerego ka gona ka kerekeng. O be a sa kgona go bona tebelelo ya gagwe sefahlegong ge a bona Kane.
Tabatha a šikinya hlogo ya gagwe ge seswantšho sa Kane se tšwelela kgopolong ya gagwe ge a leka go se nagane ka yena. Ge a mmona a robetše fao a ehwa go ile gwa goga se sengwe ka botebong bja pelo ya gagwe le semoyeng. O be a sa kwešiše lebaka efela, kgopolo ya go mmona a ehwa ya nyaka gore a hunagane bjalo ka kgwele.
“Itshware hle,” a hebahebetša go tloša setu. “Seo o se tsomago ke sa go lebatša.”
A topa mogala gomme a akanya go lletša Jason mošomong go bolela le go bona ge eba go na le sa go se tlwaelege seo se hlagilego go tloga mola Kriss a mo fofišeditšego Florida.
Mogala wa lla makga a mararo pele o topša.
“Pabalelo ya Lešoka, Mohlankedi Fox o a bolela,” lentšu le lebosana la reta.
“Dumela Jason, ke Tabby.” a myemyela la mathomo go tloga mola a tsenago ka lebati la ka pele.
“Tabby?” Jason a lla gomme a kwa se sengwe se wela fase, e swanetše go ba ele setulo ka ge ka mehla a ithekga ka sona ka khutlo ya kotsi ka maoto a mabedi. “Gabotse o be o le kae?”
“Kriss o be a nkgolegile le Envy gomme a re iša Florida matšatši a mmalwa.” Tabby a araba. “Ke sa tšwa go boa gae gomme ka nagana gore ke go lletše go kwa seo se ntahlegetšego.”
Jason a hemelana, “Ntle le dilo tša go tlwaelega tša ka mehla, ga se o lahlegelwe ke selo. Ke fela selo sa go kgahliša seo se hlagilego bošego bjo bongwe ge ke hwetša mogala go tšwa go segaswi se sengwe.”
Tabby a myemyela gomme a dula sofeng. “Mpotše!”
“Jacob le nna re be re dutše fela, e le bošego bja go nanya, gomme mogala wa lla. Ka o topa gomme lesogana leo le be le bolela gore le bone lengau le kitimiša katse ya naga tlase ka toropong le kgokeletše sellathekeng go le lengwe la leoto la lona.”
Tabatha a palelwa ke go itshwara a thoma go sega. Ge nkabe a le ka dieteng tša Jason dibeke tše mmalwa tša go feta, o be a tla nagana bjalo. “Akgaa hle,” a realo.
“Mpotše ka seo,” Jason a bolela ka lesegonyana. “Jacob le nna re petšha ka seo gore go tla ba le melaetša ya go ngwalwa ka seo ge re hwetša sebopiwa seo.”
“O na le kgonthe ya gore ga o nwe eng goba eng ya tša go kgethega tša Kat?” a botšiša ge a le gare a sega.
“Ga ke nwe mošomong!” Jason a realo gomme Tabatha a kwa lesego la Jacob ka boithekgong. “Bjale o boa neng mošomong?”
Tabatha a emiša magetla, “Ga ke tsebe gabjale. Ke nyaka matšatši a mangwe a mmalwa gomme ke sa na le matšatši a maikhutšo ao nka dirišago.”
“Go lokile, re go hlologetše. Ga go swane fa ntle le go ba le sefahlego se sebotse sa go kgantšha lefelo le. Seo ke nago le sona gabjale ka Jacob, gomme ga a lebelelege.”
“Ke le hlologetše le nna mathaka,” Tabatha a realo, gomme a bolela nnete. “Re tla kopana mo matšatšing a mmalwa a tlago.”
Jason a homolanyana gomme Tabatha a tseba seo se latelago. “Envy o bjang?”
“O gabotse le yena. Go swana le nna, o be a tsoma fela matšatši a mmalwa a go tloga fa.” A loma pounama ya gagwe ya ka tlase ge go na le metsotswana ye mmalwa ya setu.
“Ke nnete?” Jason a botšiša.
“Ke eng sa nnete?” Tabatha a botšiša a leka go itira o kare ga tsebe.
“Ke nnete gore Envy o ratana le Devon Santos?” Manakaila a Jason a fetoga a mašweu ge a swaretše mogala ka go tiišanyana.
Tabatha a hemelana, gomme a tseba gore seo se ile go kweša Jason bohloko kudu, efela go fihla go gongwe ke molato wa gagwe. Motho yo botse gakaalo ga a swanela go lebelela mosetsana o tee yo a mmonago bjalo ka mogwera wa potego le buti gape.
“Ee, ke nnete.” Tabatha a realo ka boleta. “Ke a tseba gore o be a sa nyake go kweša bohloko. O a go rata… wa tseba.”
Jason a hemela ka ntle ka boleta gomme Tabatha a mo kwela bohloko. Ke kgale a šetše Envy morago ka ge e le mosetsana a nnoši yo a ilego a mo nyaka go tloga kgale. Gabjale a ka se sa mo fihlelela efela Tabatha o be a ka se mmotše seo. Ke mošomo wa Envy.
“Ke a tseba gore ga a nthate,” a realo ka morago ga motsotso. “Ke akanya gore ke be swanetše go bona sešupo ge a be a sa lemoge gore ke a mo nyaka.”
“O lemogile, Jason,” Tabatha a realo. “O naganne gore seo se tla bea kgatelelo go segwera sa lena.”
Jason a ngunanguna, “Ee, ke akanya gore seo se ka be se dirile efela o ka se sole lesogana go lora, akere?”
“Ga ke go sole go dilo tše dintši,” Tabatha a kwa Jacob a bolela ka boithekgong.
“O homole,” Jason a rora ka go bapala gomme Tabatha a mo kwa ge a bethantšha maoto a setulo go a bušetša madulong a ona. “Tabatha, ke tla go lletša ka moragonyana. Ngwana fa o akantše go thoma go ntahlela ka dipampiri.”
Tabatha a sega gomme a dumela ka hlogo, “Go lokile, ke tla bolela le wena moragonyana.”
A tima mogala gomme a dula fao lebakanyana pele a bušetša mogala morago tšhatšareng. Ge a lebelela ka bodulong gape, go be go se sa ješa bodutu gabjale. Jason o tla nyaka segwera sa gagwe gabjale le go feta pele gomme go nyakega gwa mo thuša go mo dira gore a boele maemong.
A emelela le go otlolla matsogo ka godimo ga hlogo, a leba tlase ka holong go ya phapošing ya gagwe. O ile a apola le go apara borokgwana bja bašemane le sekipa pele a tsena ka mpeteng wa gagwe wa go fola, gape wa boleta.
Ka nako ye ga se a leke go thibela tiragalo ya go bapala ka monaganong wa gagwe pele a swarwa ke boroko. Gabotse, o swanetše go hlatholla seo gomme se ka se tloge go fihlela a dira bjalo… bjalo goreng a tla lwantšha seo? A tsena ka leswiswing la boroko a sa lebeletše go selaganya kereke le ka mahlong a Kane.

*****

Jewel a ya fase le godimo ka borobalelong bja Steven. Matsogo a gagwe a be selagantše kgara ya gagwe gomme a thoma go loma manala a gagwe, selo se sengwe seo e lego kgale a se sa se dira go tloga mola e sale ngwana.
“Se ke phošo ya ka,” a realo ka boleta ge a leka go tloša seswantšho sa tatagwe a bapotšwe ka godimo ga aletare ya kereke yeo a bego a e tsena bophelong bja gagwe ka moka. Ke makga a makae ao a ilego a rapela gabotse gona fao tlase mo a hwilego? O be a tseba gore Anthony o na le pelo ye mpe efela seo ke bosathane.
Steven a bogela mosadi ge a eya fase le godimo gomme a bona le dipounama tša gagwe di bolela ntle le go hlaboša ge a ithogaka ka monaganong. O ile a mo obelela ka seatla a se bea letsogong la gagwe ka boleta a leka go mo homotša. “Jewel, tše ka moka ga se molato wa gago.”
A sesefatša mahlo a gagwe seatleng sa gagwe gomme a mo lebelela. “O bolela nnete gannyane. Le wena ke molato wa gago go no swana le nna. Gomme gabjale ka ge Tate a hlokofetše, nka se nyalane le Anthony le gatee gomme le wena nka se dule ke nyalane le wena.”
Jewel a retologela go yena ka fao seatla sa gagwe sa wa. Selo sa mafelelo seo a se nyakago gona bjale ke go ipolela dibe tša gagwe… o ipona molato le go feta. O file Anthony dipikiri tša go bapola tatagwe.
Steven o be a sa nyake go dumela seo efela mantšu a gagwe a be a mo hlaba kudu. O ile a araba ka mo a tsebago ka nako ye ka ge a be a sa nyake go kwa mantšu a tlhohleletšo goba botho.
“Ka nnete o nagana gore Anthony a ka se sa go šala morago ka ge a bolaile tatago?” Steven a goeletša. O be a tseba gore o bolela nnete gomme a ka se theeletše le lentšu letee la seo.
“O bolaile tate wa ka… ke be ke bina le sathane ka ge ke be ke nyaka gore tate a bolokege le go phela. Ge Anthony a ka leka go mpatamela gabjale, ke tla mo kgaola hlogo.” Jewel a ikwa ka tsela ye nngwe ya go makatša. O be a ekwa eke o okobetše ka ntle, efela a thothomela le go feta ka gare.
O ile a lla diiri tše mmalwa efela pefelo e mo homoditše. O rothišitše dikeledi tša go lekana. Gabjale ke nako ya go bušetša bophelo bja gagwe morago. O ile a beakanya leano la go Tanya Anthony gomme a rapela gore Steven o bolela nnete… gore Anthony o ile go mo šala morago, ka gobane a itokišeditše yena.
“Nka se go tlogele,” Steven a mo tsebiša. Ge eba a sa kgone go itšhireletša, ka fao bjalo ka molekani wa thobalano wa gagwe… o tla mo direla seo. A bogela mahlo a gagwe a go hwibila gomme a lebantšha mahlo le yena.
“Gona ga o fapane le Anthony gomme ke tla go hloya bophelo bja ka ka moka,” a bolela bjalo ka mereba. O be a nyaka gore Steven a mmefelelwe, a mo kobe gomme a mo hlape diatla. Ge a ka dira seo… gona mogongwe Anthony a ka se mmolaye ka mo a bolailego tatagwe. Ga a nyake go rwešwa molato gape ka mahu a go tšhoša ge fela e kaba lehu la Anthony… a ka thaba go rwala maikarabelo ao.
”Steven a mo lebelela motsotswana gomme a bula lebati le go emela ka thoko. “Sepela, ke go fa kabelo ya go boloka bophelo bja gago gomme o bolela ka mo o ratago? Tšwela pele, gomme re bone gore o tla fihla kae kgahlanong le se sengwe seo o senago le kgopolo le e tee ya gore o ka bolaya bjang.” Steven a myemyela gampe, “Go no go tsebiša, dimobi ga se selo efela e no ba botlaela fela.”
“Ke akanya gore ga o tsebe!” Jewel a goeletša gomme a tšea dikgato tše mmalwa go ya pele. Goreng a sa leka go mo phološa? Goreng a sa kwešiše gore o tla mo dira gore le yena a bolawe?
Steven a tswalela mahlo a gagwe a lebelela kgakala. “Ee, nka tseba… akere?” a mo gegea gomme a lebelela morago ge Jewel a leka go mo feta. Ka tlalelo, Steven a mo swara ka letheka gomme a mmatametša go yena, “Akgaa, emanyana!” a realo.
Jewel a thoma go tswinya ka fao a mo goga le go mo kgwahlišetša kgareng ya gagwe. “Ge o nyaka go mmeela molaba gona go lokile, efela o ka se dire seo o nnoši. Etla re go thuše.”
Jewel a mo kgarametša kgareng ya gagwe a inamela morago gore a kgone go mo lebelela. “Goreng? Gore le wena a go fege sefapanong?” O be a nyaka go goeletša ge seswantšho se tšwelela monaganong wa gagwe. “Ga ke nyake gore seo se hlage.”
O be a sena bonnete bja gore o ikwa bjang ka Steven efela kgopolo ya gore a hwe ka tsela yeo ya mo dira gore a ikwe o kare o hlabilwe kgareng. “Ge o ka ntumelela ka sepela gabjale, a ka se be le lebaka la go šala morago.” A mo swara ka bokapele bja hempe ya gagwe ka diatla tše dinnyane. “O tla bolokega… gomme wa phela.”
“O tlile go ntatelela,” Steven a mo tsebiša ge a lota menwana ya gagwe go leswao la thobalano leo a mo filego lona. A myemyela ka boleta ge a ekwa a thothomedišwa ke ge a mo kgoma. “Ka mo ke boletšego, se ke bophelo bja nnete. Ge o ka boela morago go yena gomme a bona leswao la thobalano, o tla ntatelela ntle le seo o ka se bolelago goba wa se dira.”
Jewel a ithekga ka borutho bjo tletšego bjo a mo fago bjona gomme a tswalela mahlo a gagwe. A kwa pefelo ya gagwe e nyamalala ka polokegong ya matsogo a gagwe gomme a nyaka go kiba fase ka maoto a gagwe ka kgakanego. Maswabi a go lahlegelwa ke tatagwe a thoma go tsenelela gape efela a sa kgone go lla.
Steven a gokara Jewel ka kgokaro ya netefatšo. O be a sa mo sole ka tsela yeo a itshwerego ka gona. Ge Anthony a sa tšwa go bolaya tatagwe, gona ga go maatla mo lefaseng le goba la go latela leo a ka kgonago go itshwara.
“Lebelela, o reng ka seo?” a botšiša a mo inametše gannyane gomme a sekamiša sefahlego sa gagwe godingwana go sa gagwe. “Re na le kopano mesong gomme bohle ba ile go ba fao. Re tla go thuša ka go nagana se sengwe se kaone go feta go ikiša go yena. Ka tsela ye nngwe, o tla ba le mašole ka lehlakoreng la gago. Ntle le rena, o tla lebana le mašole a diphiri tša bafetogi gomme sengwe le sengwe seo o se dirago… Anthony o tla go tšea.” A phophola lerama la gagwe ge a tsoma mahlo a gagwe, “Gomme ga ke nyake ge Anthony a go tšea.”
Jewel a inamišetša hlogo ya gagwe kgareng ya Steven gomme a gogela moya ka teng, mohemo wa go pšhatlaganya. O be a bolela nnete. Ga a nyake go ba kgauswi le ntatauwane yela ka morago ga seo a se dirilego. A gatelela tsebe ya gagwe kgareng ya Steven go kwa morethetho wa go tia wa go iketla wa pelo ya gagwe. Ke makga a makae ao a mo phološitšego go divamphaya, go Anthony, bjale le go botlaela bja gagwe?
“O tla ntshwara bošego bjo?” Jewel a hebahebetša a tseba gore ge a ka mo tlogela, matšhošetši a diiri tša go feta tše mmalwa a tla boa go mo hlasela. A mo lebelela gomme a kopanya mahlo le yena. Dipounama tša gagwe tša bulega ka makalo ge phišo e selaganya bogareng bja mmele wa gagwe.
Goreng a kgona go homotša pefelo ya gagwe le go mo dira gore a ikwe eke o goteditšwe ka mollo ka nako e tee? A lebelela kgakala ka pejana a sa nyake gore a bone tlalelo ya gagwe.
Ka ntle le go araba, Steven a mo emišetša ka matsogong a gagwe, a raga lebati go le tswalela ka leoto, a leba go seleganya phapoši gomme a mmea morumong wa mpete. A mo apola dieta, gomme le yena a apola tša gagwe ka potlako gomme a robala le yena. A kwa mohemo wa gagwe ge a mo gogela go yena gore a kgomagane le yena. Go sa tlile go tšea nako… efela a ka se dumelele gore Jewel a sepele gabonolo ka tsela yeo.

Kgaolo ya 3
Kriss a tsena ka bodulong bjo a bo abelanago le Tabatha gomme a notlela lebati ka morago ga gagwe. O ile a tsomana le Dean gohle efela a palelwa ke go mo hwetša goba letemone leo a bego a le kitimiša.
Se sengwe ka ga mohuta wa bona, ge ba nyaka go khuta, ba kgona go timelela gomme gwa hlokega mohlala wa mo ba lego. O be a kgona go kwa letemone gohle le ge a sa ka a le bona. Ke go fihlela ge le se no lokollwa ge a lemoga gore ke kgale a be ekwa go ba gona ga lona. O sa kwa maikemišetšo a mabe a leswiswi le ka gare ga legae la gagwe… go be go sa dule gabotse ka garegare ga gagwe.
Ge a sepela ka bodulong bja go fifala, Kriss a leba ka borobalelong bja Tabatha gomme a myemyela ka go bona sebopego sa go hloka bosodi se robetše mpeteng. O be a hunagane go swana le katsana go dikologa phoofolo ya go kitelwa… mpša ya seYoorkie e ntšhitše leleme. Phoofolo ya go kitelwa e be e le mašaledi a bobjana bja gagwe ao a tlogetšego. Mengwaga ye mmalwa ya go feta, o ile a bulega gomme a mmotša kanegelo ka moka ya Scrappy le ka mo e timeletšego ge a ile maikhutšong ka nako ya mafelelo le batswadi ba gagwe.
Kriss a hemelana gomme a robala mpeteng ka thoko ga gagwe, a hunagane go yena go swana le lepai la tšhireletšo. Ge a sa tšwa go dira bjalo, Tabatha a mmatamela.
“O hweditše Dean?” a botšiša ka boleta.

*****

Kane o ile a kgona go tloga; a thaba ge Warren a gogile šedi ya Michael gore a kgone go dira seo. Se sengwe le se sengwe seo Michael le Dean ba se dirilego go lokiša seo Manyami a mo dirilego sona se ile sa mo tšhoša kudu. O be a sa iketle gabjale gomme o be a ka se šomane le seo ge a ka tšwela pele go dula ka kantorong ya Warren a ipotšisa ka letemone leo la go nyanya semoya gomme a na le bonnete gore o ile go ba le digateledi nako ye telele ka lebaka la seo.
A lebelela godimo go leswiswi la go makatša leratadimeng gomme a bona mahlasedi a mathomo a meso kua kgole. Ge a sepela kgole le bokagare bja motsesetoropo, a sepela mebileng ka lebelo gore ge eba go na le yo a bogetšego, o be a ka se mo lemoge ka gare ga bona. Bothata bja seo ke gore o be a le dimaeleng tše mmalwa kgole le legae la Michael.
O be a nyaka go bona Scrappy gomme a hunagane le mpša sofeng ka lebotlelo le lebose la morara, le sekotlelo se segolo sa dithuthupe, le… mobi wa masetlapelo? Kane a šikinya hlogo… gabotse ke eng seo a naganago ka sona? Scrappy ke yona e tla mo kgethelago mobi, wo o ka bago o mobe goba wa se be bjalo ka nako yeo. Bobedi ba rata dimobi mo diphoofolo di kgonago go bolela.
Kane a nanya gomme a lebelela tikologo ya gagwe ge a lemoga gore se sengwe se gogile šedi ya gagwe ka lehlakoreng leo. Mathomong o naganne gore ke Manyami yo a mo gogetšego fa. A šikinya hlogo gape gomme a tloša kgopolo yeo ge seswantšho sa Tabatha kua kerekeng se selaganya kgopolo ya gagwe. O be a kgona go kwa bogona bja gagwe gomme, la mathomo bošegong bjo, Kane a lebala ka dintataune tšeo di robalanago ka tlase ga mpete wa gagwe le go khuta ka kloseteng.
Tabatha e be e le molekani wa gagwe wa semoya gomme, gabjale o tšere madi a gagwe, gomme seo se godiša kgokaganyo. Lebaka letee leo a sa le lemogago beke ya go feta ke gore yo a welego… Kriss… a mo išitše kgole gakaaka le yena, setlaela sela sa go ikgopolela. O be a thoma go ipotšiša ge eba o tshwenywa ke tlalelo ya karogano.
Ge a sepela karolong ye ya toropo, o be a ikhwetša a le legaeng la gagwe ka metsotswana. A kotama ka setu hlakeng ya ntlo ya moagišane, a dula fao go bogela lefasetere la borobalelo. Mahlo a gagwe a bogale a bona ka mo meriri ya gagwe e wetšego mosamelong le ka mo dipounama tša gagwe di bulegilego gannyane ge a hema ka go tsenelela. Ga senke a tsebe khutšo ya mohuta wo go fihlela gabjale… ge a mmogetše ge a robetše.
Kane a ipotšiša gore o bogega bjang mahlong a gagwe. Naa o swana le dintatauwane tšeo a ilego a gahlana le go lora ka tšona? Naa o be a lemoga gore maikutlo a gagwe ka ga yena a fihla kae?
O ile a nyaka go tšidifala go khunameng ga gagwe hlakeng, a ikemišeditše go ya go yena ge a ekwa a lla ka monaganong wa gagwe. Modumo o tšwa ditorong tša gagwe efela modumo wa monagano wa mo dira gore a eme ka ge o mo gopotša ka tsela yeo a ilego a lla bjalo ka ngwana mengwaga ye mentši ya go feta. Go fihla gabjale, seo a ilego a se dira ke go mo tlišetša mahloko… a mo dira gore a tšwe madi ka lebaka la gagwe.
Kane o ile a retologa gore a sepele ge a bona lebati la borobalelo bja Tabatha le bulega. Mešifa ya gagwe ya thatafala a ikemišeditše go hlasela yo a tsenego ge a bona yo a welego, Kriss, a tsena borobalelong bja Tabatha le go tsena ka mpeteng le yena. Kane o be a ekwa gore yo a welego o nyamile efela a kwa pefelo e gola ka gare ga gagwe ge Kriss a mo gokara, a mo swaretše kgauswi le yena bjalo ka baratani ba sekgale.
A kwa khutšo ya gagwe e pšhatlagana gomme pefelo e ntši e etla ka lebelo go mo tlatša ge a bogetše. A lebelela ka šedi ye kgolo, go kwa ga gagwe go maatla gwa thoma go topa poledišano ya sehebehebe. A nyenyebala ge a lemoga gore maatla a gagwe a matlafetše le go feta pele. O ile a makala gomme nyenyebalo ya gagwe ya tsenelela ge a ekwa le merethetho ya dipelo tša bona le ge a le kgole.
“Dean ga a nyake gore ke mo hwetše,” Kriss a hemelana a ipotšiša ge eba ke letemone leo Dean a le šetšego morago goba ke yo a welego yo a bego a le ka kua tlase le lona. O be a duma ge nkabe Dean a ile a emanyana. Go be go na le se sengwe ka semoya sa yo a welego o mongwe seo Kriss a sa se tshepego ka botlalo. O be a holofela ka sephiring gore Dean o tla palelwa go nyakeng ga gagwe go bobedi bja bjona.
“Ke ipotšiša gore go hlagile eng,” Tabby a hebahebetša, “Go tšwa go seo Envy le Devon ba se boletšego, Dean o be tantšwe ka fao letšatši ka moka.” O be a palelwa ke go itshwara ge a gopola ka Kane a tseba gore le yena o be a le ka fao le letemome gomme a nyaka a hwile.
“Ke tla kgonthiša gore ke mmotšiše ka pela ge nka mo hwetša,” Kriss a araba a sa kgone go tloša matshwenyego lentšung la gagwe.
“Dean o a go rata… a ka se dule sebaka fao.” Tabatha a tswalela mahlo a holofela gore Kriss o a kwešiša gore o bolela nnete.
“Gabjale robala,” Kriss a hebahebetša a tshepa gore o bolela nnete gore Dean o tla boa e se kgale. Ga se a bone yo a welego yo mongwe o bogega bjang ka gobane o be a sepela ka lebelo, efela o ile a mo kwa motsotswana fela pele semoya sa letemone se tlala gohle. Ke fela maikutlo a nakwana ao a mo hlobaetšago, gomme o nagana seo Dean a se kwelego.
Ba welego ga se ba bantši gomme seo se goga moya wa bona ge ba batamelane. Bontši bo nagana gore ke barongwa ba welego ba dinonwane bao ba kobetšwego lefaseng go le šireletša… efela dinonwane gantši ga se dinnete tša go felela gomme di bopilwe ka mantšu a batho bao ba nyakago go ba bagale goba ka dinako tše dingwe manaba.
Ba welego ba tlile lefaseng go tšwa ka lehlakoreng le lengwe… go no swana le matemone. Dinonwane di bitša lehlakore leo gore ke Legodimo efela di fošagetše.
Dinonwane di re ba fediša matemone… gape le seo ga se nnete ya go felela. Bebele e re ba welego ba robetše le basadi ba babotse ba lefase gomme ba otlelwa seo… gomme seo ke se sengwe sa kgauswi ga nnete yeo baporofeta ba e hweditšego.
Lebaka la gore ba welego ba itshwere gore ba se robale le basadi ba lefaseng… ke gore ke ditšweletšwa tša dithobalano tšeo gomme gwa belegwa matemone. Ke ba welego bao ba hlotšego matemone.
Ge yo a welego wa mathomo a bonagala, ebe e le ba bantši efela ge matemone a belegwa a thoma go senya seo ba welego ba se ratago, ba ile ba furalela bana ba bona gomme ba lwa. Dipalopalo tša mahlakore a mabedi di ile tša fokotšega gomme setswalelo magareng ga mahlakore a mabedi se tswalela ka go nanya.
Ba bangwe ba bao ba welego ba mathomo ba timeletše, go naganwa gore ba lahlegetšwe ke maphelo go matemone ao ba a hlotšego. Bontši bja bao ba phelago ba kgethile go boela gae gore ba se ekwe ke kganyogo ya thobalano ya basadi ba batho. Ke bao ba mmalwa ba rometšego mašole a maswa lefaseng go le lebelela… go šireletša batho go dintatauwane.
Go na le molao o tee fela… a ka se robalane le basadi ba lefase le gomme ba ka ba bolaya ge ba ka dira seo. Ngwana o tee wa mohuta wa nnete o beilwe mo lefelong la enetši ya lefase gomme ba mmalwa ba bona ba phetše go fihla gabjale. Dinonwane di re ga ba hwe… dinonwane di fošitše.
Ba welego ba hwa, ba phela lebaka le letelele… mengwagakete e ka batamela go leboyo la bona la bophelo. Ba ka kgona go bolawa le ke batho go no swana le matemone… efela gore motho a atlege go tla ba bothata kudu.
Syn o tseba nnete ya dinonwane gomme o e fetišeditše go ‘bana’ ba gagwe. Ge a gopola dithutwana tšeo, Kane gabjale o kwešiša ka mo Kriss a ratago Tabatha… go lekana gore a se mo tšeye bjalo ka molekani… gape go lekana gore a se dumelele motho yo mongwe yo a naganago gore ga a lekane kudu le letemone go ba le yena. Go bonala gore ga se yena fela yo a nago le diphiri tša go fifala. Sekhutlo sa dipounama tša Kane tša laetša seo ka myemyelo ya tsebo yeo ge a retologa gomme a tloga

*****

Envy le Devon ba be ba letile ka pareng ge batho ba mathomo ba thoma go tla kopanong. Yena le Kat ba be ba bolela le go leka go bolela ka tšohle tšeo di hlagilego mola Devon le Quinn ba eme fela le go ba lebelela ka dintšhi tša mahlo tše gogegilego.
“Ba bolela polelo efe gape?” Devon a botšiša.
“Ga e na leina,” Quinn a realo. “Ke setlwaedi seo basadi ba se tsenelago ka mehla. Go thoma ka go hloka molato gomme, pele o ka tseba seo, ba tšwele ba ile go reka gomme rena re ka ntle ga diphapoši tša boaperelo re swere mekotla ya bona.”
“Gape o tla be o le fao o swere mokotla mola a tsena ka mabenkeleng a basetsana le go reka tša ka gare tšeo o sa dumelelwago go di bona go fihlela ka moketeko,” Nick a realo ka myemyelo.
Warren a bea seatla sa gagwe legetleng la Nick. Ntshepe moratho, o tla swara mekotla yeo ka lethabo ge nako e fihla.”
Matsogo a mabedi a gokara molala wa Warren ka morago gomme sefahlego sa Michael sa tšwelela magareng ga bona. “Naa seo se bolela gore o nkiša go yo reka?”
“Ka nnete,” Warren a realo ka myemyelo. “Ke tla go iša lebenkelng lela la dilo tša go kgoka leo o le ratago kudu.”
Tlhagišo ya Michael ya bonala eke o a lora. “Joo ee, difepi, diketwane, mapanta, difepi tša go namela… letlalo.”
“Ke eng tšeo…” Nick ka bjako a ema gomme a tloga go bona a dira gore Devon a ntšhe moya ka dinko.
“O hloile ba go ratana ka bong,” Devon a realo.
“Homola!” Nick a rora, “Ba ka be ba kgona go bolela maaka kudu goba seo ke nnete ya go tshwenya.”
Lebati la bulega gomme Steven a tsena le Alicia le Jewel. Alicia o ile a lekola klosete ya gagwe gomme a hwetša roko ya letšatši ye phepole gore Jewel a e apare go fihlela a reka diaparo tše dingwe. Ka mahlatse, ba nyakile go lekana gape le ka botelele ka fao Jewel o tla kgona go lebelelega gabjale. Alicia o boditše Steven gape gore go fihlela a kgona go hwetša diaparo tše dingwe, Jewel o lokologile go tsena ka kloseteng ya gagwe a tšeye seo a se nyakago.
Steven ka bjako a leba mo Quinn le Devon ba dutšego le Nick tafoleng ya go lebana thwii le lefelo la para la Kat.
“Ga se re latelwe ke a bona.” Steven a realo a myemyela ka gare ge a bona Jewel a myemyela go Alicia. A lemoga gore ga senke a mmona a myemyela go fihla gabjale gomme a kwa a lahlegile ge e etšwa dipounameng tša gagwe.
Warren a lebela gohle, “Gabotse ke nagana gore bohle ba gona fa.”
“E sego ka moka,” Envy a realo. “Re sa emetše Chad.”
Ka nako yeo mabati a bulega gomme Chad a tsena a na le Trevor le Zackary ka morago ga gagwe.
“Gabotse o nyaka eng fa?” Devon a botšiša ge a emelela.
“Chad ke lephodisa,” Envy a mo gopotša. “O šetše a tseba tše dingwe tša tšeo di hlagago fa gomme o bone mafelelo a seo se hlagilego dirapeng. O ka gare a rata goba a sa rate. Ntle le fao,” a tšwela pele, “o tla kgona go thibela maphodisa go tla go lena lebakanyana.”
“Ke be ke sa bolele ka buti wa gago,” Lentšu la Devon le be le tšere segalo sa kotsi.
Kat a dumela ka hlogo, ge a bona gore Envy o be a itokišetša go emelela Trevor gape. Ka ge a sa nyake ntwa ye feleletšego ya ba mošate e hlage, a tloga ka pareng go ema tseleng ya bona.
“Trevor le wena o ka ba le rena,” a bolela ka tiišetšo gomme a selaganya matsogo a gagwe kgareng. “Gabotse… o kgona go raloka gabotse le ba bangwe.” Kat a fetša ka go ponyetša monna yo mosehlana leihlo yo a ilego a mo lotšha ka kgegeo.
Quinn o ile a emelela setulong sa gagwe a leba go Kat, a bea matsogo a gagwe lethekeng la gagwe a mmatametša go yena. “Ke tla swanelwa ke go go bea leihlo… ga go bjalo?” a hebahebetša ka thaloko, efela tebelelo ya mahlo a gagwe e bolela kanegelo ye nngwe ya go fapana.
“Naa re ka tšwela pele?” Kane a botšiša a le ka moriting.
Bohle ba fofa ge ba ekwa lentšu ntle le Michael. O be a homotše gomme ga go yo a mo lemogilego.
“Re dumelelana le seo,” Warren a realo. “Ke nagana bohle ba tseba gore ke ka lebaka la eng re le fa.” A lebelela Chad yo a dumetšego ka hlogo go laetša gore o a kwešiša pele a lebiša tebelelo ya gagwe go Trevor le Zackary. “Pele re bolela ka seo se hlagilego dirapeng, ke na le potšišo go Trevor.”
Trevor a sesefatša mahlo a gagwe, “Go swana le eng?”
“Gabotse wena o eng?” Devon a botšiša a tsena Warren gare.
“Ke mofetogi go no swana le bontši bja batho fa,” Trevor a araba.
Kane a ntšha moya ka dinkong ka meriting gwa dira gore bohle ba lebelele ka lehlakoreng la gagwe.
“O tseba se sengwe ka yena?” Envy a botšiša. Ga se gore o tla dumela tšohle go tšwa go Trevor… o šetše a itaeditše gore ke ramaaka go fihla kae.
“Nka realo, efela o swanetše gore o bolele le nna gabotse ge o nyaka go tseba,” Kane a realo ka kgahlego ka lentšung la gagwe. O rweša molato go maikutlo a gagwe ka ge a tsogile ka lehlakoreng le lebe la mpete… ga se a robale.
Devon o be a emeletše gomme a emišetša Kane moyeng ka baki ya gagwe. “Ke nagana gore re feditše ka go loka fa,” lengau la rora.
Kane a nyenyebalela mofetogi, “Joo, seo ke se sebe hle. Ke šetše ke boditše mpšanyana ya ka gore o morategi gomme e be e thabetše go kopana le mogwera wa go bapala o moswa.” Bobedi bo be bo tseba gore go tla fenya mang ge ba akanya go lwa… gomme e tla ba katsana.
“Mpšanyana ya gago?” Jewel a botšiša, mahlo a gagwe a phadima ka taba yeo ya se sengwe se sebotse gape sa go swarega gabose. Dipounama tša gagwe tša sekamanyana ge a nagana ka mpša magareng ga dikatse ka phapošing.
“Ke mpša ye kgolo ye tshehla,” Michael a ngunanguna.
Warren o ile a soba morumo wa nko ya gagwe gomme Quinn a itshwara gore a se sege sebara sa gagwe sa lengau.
“Devon, bea Kane fase gomme o dule fase setulong seo,” Warren a rora. “Re tla fetša poledišano ka Trevor moragonyana.”
Nick, Devon, le Kat ba tomolela Warren mahlo ka moka. Ge eba motho wa magareng a sa tsebe Warren, e ka be e ba lahlegetše. Warren o be a thabišitšwe ke taba ya mofetogi o moswa lefelong le gomme a nyaka go ithuta tše dintši ka mohuta wo o sa tsebjego.
Devon a bea Kane fase gomme a leba setulong sa kgauswi le Warren. Mabati a bulega gomme Kriss a tsena le Tabatha a le legetleng la gagwe. Devon a laetša myemyelo ya kgaogelo ya go nanya diponameng tša gagwe ge a lebelela vamphaya ye tshehlana. O be a ka no se kgone go bea Kane madulong a gagwe, efela monna yo a sa tšwago go tsena a ka kgona gomme o a tseba gore Kriss ga a rate vamphaya ya go sokologa.
“Re latetšwe?” Tabatha a botšiša ka ge a fentše ngangišano le Kriss gore ba tle kopanong. Ka dinako tše dingwe Kriss o tloga a mo šireletša go feta tekanyo… kudukudu.
“Aowa, le fihlile ka nako,” Envy a realo. “Ga se ra hlwa re thoma.”
Tabatha o ile a yo dula le basadi ka pareng gomme a dula fase mola Kriss a ile a ema kgauswi le Chad.
Pelo ya Kane ya fofela molaleng ge Tabatha a tsena gomme a swanelwa ke go itshwara gore a se mo gokarele ka matsogong gomme a mo tloše ka fa. O ile a boela morago ka meriting gore go bonale moriti wa gagwe fela. Mahlo a gagwe a leba go yo a welego gomme a tšutšubana ka tebelelo yeo a e hwetšago go tšwa go monna yola.
“Re swanetše go ithuta ka kudu ka letemone leo le bego le tantšwe ka dirapeng,” Warren a tšwela pele. “Re nyaka go tseba gore le bogega bjang gomme ka ge Dean a se gona, Kane ke yena fela yo a le bonego.”
Kane o ntšhitše sekerete gomme a bula laetara ya gagwe. Lesedi le be le laetša sefahlego sa gagwe lebakanyana gomme ba be bona ka mo mahlo a gagwe a tshwenyegilego ka gona.
Tabatha o ile a lebala go hema ge tebelelo ya gagwe e retologela go kgabo ye nnyane gomme a bona Kane. Dipounama tša gagwe tše di botse di menyagane gannyane ge a thumaša sekerete gomme mahlo a gagwe a khupeditšwe ke dintšhi tše diso. Le ge e kaba di khupeditšwe goba aowa, o be a ekwa tebelelo ya gagwe e mo kgoma go no swana le ge diatla tša gagwe di phophola letlalo la gagwe. A kwa se sengwe se mo ntšha fao ge se poraša letsogo la gagwe, a lebelela gohle gomme a bona Kriss a eme ka thoko ga gagwe.
“Leina la gagwe ke Manyami,” Kane a realo ka morago ga lebakanyana. “Bothata ke gore… ga ke na bonnete bja gore o lebelelega bjang.”
“Go tla bjang o se tsebe gore o bjang?” Kriss a botšiša ka nyenyebalo ye tseneletšego sefahlegong sa gagwe. “O be o na le Dean fao le ge re sa tsebe gore ke nako ye kaakang.”
“Ntumelele ke fetše, Mafofa?” Kane a realo ka segalo sa kgegeo.
Kriss a sesefatša tebelelo ya gagwe a sa rate thogako yeo.
“Go lokile,” Kane a ikarabela. “Lebaka la gore ke se tsebe gore o lebelelega bjang ke gore o be a dutše a fetoša diponagalo tša gagwe. Ka nako ye nngwe e ba mosetsana yo monnyane yo mobotse wa go ba le boyena bja go tšhoša, go latele setopo sa go bola, leru la muši o moso, gomme mafelelong ya ba mosadi yo mobotse. Tšeo e be ele dibopego tša gagwe tša mmamoratwa tšeo a di kgethago. O na le maatla a mantši ge a kgona go swarelela ba welego ka bobedi ka ntlong yeo ka nako e tee.”
Kriss a goga moya ka maatla gomme a dumela ka hlogo, “Matemone a mangwe a tsebagala ka go ba le maatla a mohuta wo.”
“Re na le setsebi sa matemone seo se tlago gabjale,” Zackary a realo mafelelong. “Sefofane sa gagwe se tla goroga e se kgale mo diiring tše mmalwa goba bjalo. Ge a fihla fa, go tla ba kaone ge bohle ba ka tlogela Manyami go yena.”
Kane a emiša ntšhi ya gagwe ya leihlo, “Mosadi?”
“Ee,” Trevor a realo. “Leina la gagwe ke Angelica. O na le tshedimošo ka ba kgale ka moka, dinonwane, le dikanegelo tša bomampegwane ba lefase le. Ge eba go na le kanegelo ka ga Manyami, gona o tla ba le yona ka go flash drive ya gagwe.”
Alicia a hema ka kgakanego, “Go lokile, a ka no tšea letemone. Ke nyaka go tseba gore re ile go dira eng go hwetša Micah.”
“Micah a ka itlhokomela,” Quinn a mo tsebiša.
Nnete ke gore ka nako ya ngangišano magareng ga gagwe le Micah, o mo laetše gore a ikiše fase efela buti wa gagwe a se mo obamele gomme seo se bolela selo setee… gore gabjale ba na le baetapele ba babedi ka sehlopheng sa dikatse tša naga gomme seo ga senke se diragale. Kgale, seo se be se hlola ntwa ya go iša lehung.
Quinn o be a rata Micah gomme a ikgantšha ka yena ka lebaka la gore o na le tlhago ya go tia. Sa mafelelo se a sa se nyakego ke gore ye nngwe ya dikgakgano tša bona e ile ya tšwa taolong.
“Efela ga a tsebe selo seo se hlagilego,” Alicia a realo a nyaka lebaka lefe goba lefe leo le tla ba dirago gore ba mo hwetše. “Ge a ka kopana le Manyami gomme a mo gobatša… goba a mmolaya? Le ge a ka tloga goba a se tloge, ke karolo ya sehlopha.”
“O ka se ngangišane le tlhaologanyo ya gagwe mošemane wa kgale,” Kane a realo ka ge a badile dikgopolo tša Quinn.
Alicia a mo lebelela ka meriting gomme a hwibila pele a lebelela kgakala. Go kwagala gabose go kwa motho yo mongwe a le ka lehlakoreng la gagwe la mathomo. Seo Alicia a sa tsebego ke gore lapa ka moka le le be le nagana ka Micah le la mafelelo leo ba mmonego; ka morago ga ntwa ya gagwe le Anthony.
Kane a bušetša myemyelo go yena le ge a be a sa e bone. Gabotse, ke yena fela mo sehlopheng yo a sego bogale le gatee.
“La mafelelo ge re bona Micah, o ile a fapana kudu le Anthony Valachi gomme a mo raka ka tlelapong,” Steven a realo ka boleta. “Seo se diregile pele a nyamelela.”
“Phiri ya mofetogi?” Trevor a botšiša a sekamišitše hlogo ya gagwe.
“Ee, gomme godimo ga seo, Steven o swaile monyalani wa Anthony.” Quinn a mo tsebiša le bohle bao ba sa kwago.
Jewel a nyenyebala ge a lemoga gore Steven o be a mmotša nnete ka ga dikgokagano mogongwe le tšeo di kopanago le go timelela ga buti go ya go Anthony. A loma molomo wa pounama ya ka tlase, a ipotšiša ka setu ge eba ke lona lebaka leo fela le dirago gore Steven a mo thuše. Aowa, seo se fošagetše. Ge Steven a mo tšea kerekeng, o be a sa tsebe gore Anthony ke momyalani wa gagwe.
A kwa tatofatšo ya go se bolelwe ka lentšung la Quinn gomme a lekanetša magetla a gagwe. Maikutlo a tšhireletšo a tlala ka gare ga gagwe gomme o swanetše go bolela seo.
“Steven o be a sa tsebe gore monyalani wa ka ke mang gomme o be a sena le sešupo sa gore Anthony ke phiri ya mofetogi,” Jewel a bolela ka lentšu le tiilego. “Ke ka morago ga ge a ntshwaile mo ke mmoditšego ka Anthony. Ka fao, ge e kaba le nyaka go sola yo mongwe ka seo, gona rwešang nna molato.”
Quinn o ile a bonagala eke o rogakilwe gannyane gomme Kat a dumelelana le yena ka sephiring.
Jewel a ithekga ka para gomme a thoma go sohla pounama ya ka tlase gape. Go emeletšana le buti yo mogolo wa Steven, moetapele wa morafe wa dikatse tša naga, go ile gwa mo tšhoša gannyane.
O ile a lebelela Steven gomme a thoma go iketla ge a bona boikgantšho bo phadima ka mahlong a gagwe ka lebaka la gagwe. Se sengwe ka gare ga gagwe sa letefala gomme a lwa kudu le go aga leboto la tšhireletšo go thuša seo. Pelo ya gagwe e be e betha ka maatla gomme a ipotšiša ge eba o thoma go mo rata.
“Anthony Valachi gabjale o be a le ka tlase ga kgonono.” Chad a bolela. “Ba sephodisa ba na le lebaka la go kgolwa gore ga amane fela le go rekiša batho, efela le bokgoba gape. Mabarebare a re banna ba gagwe ba be ba topa bagweba-ka-mmele, ba ba golega gomme ba ba rekiša bjalo ka makgoba a thobalano, gape.”
“Goreng maphodisa a sa dira selo ka seo?” Kat a botšiša.
“Re boditšwe gore re se ikamanye le seo ka ge FBI e tšere taolo, ga re na dinyakišišo.” Chad a araba. “Ka go hloka mahlatse, ge FBI e tšwelela, ga re na lefelo la taolo gomme ga go seo re ka se dirago efela re tloga tseleng ya bona go se go bjalo re tla feleletša re le kgolegong ka thoko ga masogana a mabe.”
Steven a dumela ka hlogo gomme a akanya gore bjale ke nako ya go ba botša tšohle. “Tatago Jewel o ile a nyakišišwa ke FBI kgalenyana. Ke lebaka leo Jewel a ilego a tshepišwa go Anthony go tloga mathomong.” O ile a fa Jewel myemyelo ye boleta pele a retologela go sehlopha.
“Tatagwe e be e le molaodi wa Lefelo la Maikhutšo la Palm Springs gomme Anthony o be a sa thabišwe ke warante ya go tsoma yeo ba nago le yona goba Arthur a ba dumeletšego go tsoma ka lefelong leo. Ge a lemoga phošo yeo, Arthur a bolaya etšente yeo gomme a swarelwa polao. Gore Arthur a iphološe, o ile a tshepiša Jewel go Anthony bjalo ka tefelo ya go mo ntšha mo bothateng bja polao.”
“Ke yena yo a bolailego tate wa ka. Ke na le bonnete bja seo” Jewel a realo a menne matswele ka thoko ga gagwe. “Ka fao, re ka mo latelela neng?”
“Ga se re swanele go mo latelela,” Chad a mo tsebiša. “Re tla loga leano, gomme ka morago ra dira gore a tsebe gore o ka tlase ga tšhireletšo ya gaWilder. Ge a thoma go šikinyega… re tla mo swara.”
“Ke nagana gore seo se tla ba ka godimo ga molao,” Trevor a phošolla. “Swarang Jewel ka sephiring matšatši a mmalwa gomme nna le Zackary re tla netefatša gore FBI ga e tsene fao gomme ya tla go hlakahlakanya dilo ka moka.”
“Goreng ba ka tsena seo gare?” Kat a botšiša. “o karolo ya mokgatlo wa bao ba sa tlwaelegago… naa bona ga ba ka godimo ga FBI?”
“Ke mafelong a mangwe fela,” Trevor a araba. “Bontši bja batho ba FBI ga ba na le sešupo sa gore re gona. Gabotse, mopresidente wa United States ga a tsebe selo ka ga rena. Re ka godimo ga dihlogo tša bona, gomme ka lebaka la seo, re swanetše go hlatsela gore se sengwe sa go se tlwaelege se a hlaga.”
“Naa seo se bolela gore go na karolo ya mmušo yeo e re tsebago?” Nick a botšiša a sa rate go se ikwe gabotse mo go tlago ka tsebo yeo.
Trevor a šikinya hlogo, “E sego mongwe le mongwe wa lena… efela ba na le temogo ya… tša go se tlwaelege. Le šireletšegile go no swana le batho… mogongwe kudu gomme ka melao ya kwelobohloko le ka mmušo o monnyane efela wa maatla gomme o ka godimo ga mmušo.” A ngwaya hlogo ya gagwe a tshepa gore bohle ba mo kwešiša ka phetolo yeo ya go se hlalošege ya nnete.
Matshwenyego a ka ke ge FBI e tsene kudu ka gare ga seo gomme ya hwetša gore e latetšwe go ka šomana le diphiri tša bafetogi, e sego batho,” Chad a nyenyebalela kwešišo yeo Trevor a sa tšwago go e bolela. Naa o kwešiša gore ba go se tlwaelege ba na le ditokelo tše dintši go feta batho? Mogongwe o tšea lehlakore efela ke yo mongwe wa dikabatho tšeo?
Trevor a šikinya hlogo, “Segongwana ga se ile go befelwa gomme sa hlasela FBI. Ntle le fao, ge lefase le ka tseba ka ga diphiri tša bafetogi, bao ba latelago ba ile go fedišwa gomme diphiri tša bafetogi di tseba seo. La mafelelo mo ba ilego ba hwetšwa, ba ile ba tsongwa gore ba fedišwe.”
“E re ke lletše megala ye mmalwa gomme ke bone ge eba re na le lefelo la semolao ka botlalo mo molatong wa Valachi,” Zackary a realo. “Ge go le bjalo, gona re na le taolo le go bitša mang goba mang yo a nago le maswanedi.” A lebelela go bohle mo sehlopheng a tseba gore o tla šireletša bohle ka phapošing le go ba fa kgaogelo le ge dilo di ka befa bjang goba bjang.
“Go na le yo a tsebago gore Micah o be a otlela eng ge a tla timelela? Chad a botšiša. “Nka lekola ka selota mohlala ka koloing ya ka ya go paterola gomme ke beye APB ya yona.”
“Ke sethuthuthu sa gagwe,” Alicia a realo gomme mahlo a gagwe a tomoga ge a gopola gore o boditše Warren gore o be a nametše sethuthuthu seo bošegong bjola bja ledimo. Ge a mo lebelela, a hema ka kimologo ge a mo ponyetša leihlo fela. Nick a oketša ka mantšu a gagwe, “ke dumelelana le gore re se batamele Manyami, efela divamphaya di a mo tswalela gomme re ka se kgotlelele seo.”
“Bohle re mo mošomong wa taolo ya dikhunkwane tšeo,” Warren a dumela.
“E sego mongwe le mongwe,” Trevor a lebelela Envy.
Zackary ka setu a ema ka pele ga Trevor go thibela tebelelo ya go fiša yeo Devon a e fago mogwera wa gagwe. “Ke nagana gore ke nako gape ya go nyaka batho ba mmalwa go oketša sehlopha se lefelong le.”
“O bolela gore go na le ba bangwe ba lena fa?” Steven a botšiša.
Zackary a tsenya diatla tša gagwe ka merabeng gomme a sekamiša hlogo gannyane. Go kganya ka boleta go tšwa maboneng gwa bonagala meriring ya gagwe ye mesehla, ya go raragana ge a myemyela. “Ke maswabi go go nyamiša, efela ke nna ke nnoši. Ke be ke nyaka go ikoketša efela moetapele wa ka wa go tšhoša ga a ntumelele,” a fetša ka go retollela mogogorupa wa gagwe go Trevor.
“Homola gomme o letše megala yeo,” Trevor a realo. “Ge go be go na le yo mongwe wa go swana le wena a kitima gohle, Angelica o be a tla mmolaya gore a re mafelelong o atlegile.”
Tlhagišo ya Zackary ya tšea boleng bja go phadima. “Joo, gore ke gatakelwe ke Doc Martin ye botse yeo a e beago ka kloseteng ya gagwe.”
Trevor o ile a tšea kgato ya tlalelo a leba go mogwera wa gagwe wa sehlopheng gomme Zackary a kitimela lefelong la para le go khuta ka morago ga Kane.
“Go na le lebaka leo o ntirišago bjalo ka sephemo?” Kane a botšiša.
“Ee,” Zachary a realo. “Mphe motsotso gomme ke tla nagana ka letee.”
Kane a myemyela, “Mphe motsotso gomme ke tla ya gae gore ke yo hwetša Doc Martins ya ka.”
Zachary a katakatela kgole le Kane a emišitše diatla. “Aowa hle, ga ke na bosodi.”
“Zachary!” Trevor a goeletša.
“Go lokile, go lokile,” Zachary a realo gomme a ntšha sellathekeng sa gagwe. “Ijoo, o dikologile ke batho ba go hloka tshegišo… Angelica o ile go rata sehlopha se.”

Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию (https://www.litres.ru/pages/biblio_book/?art=67103817) на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.