Главная страница | Ужасы | Lesedi La Bošego

Lesedi La Bošego
Amy Blankenship
Kat Santos ga se a bone mong wa Lesedi la Bošego mengwagangwaga. Seo ke go fihlela ge Quinn a akanya ka bjako go mo golega le go mo latofatša ka go mo rweša molato wa dipolao tša divamphaya. Ge a lemoga gore lenaba le raloka ka bona, malapa a mabedi a kopanya maatla go emiša divamphaya go tlaiša motsesetoropo wa bona.
Quinn Wilder o be a mmogetše ka mahlo a tlala a katse ya naga go tloga letšatši leo a belegwego. Ge a le mahlalagading, kganyogo ya go mo dira molekani wa thobalano wa gagwe ka pejana ya tliša ntwa magareng ga gagwe le bobuti ba gagwe ba go mo šireletša kudu. Ge botatago bona ba bolayana ntweng, kgokagano magareng ga malapa a mabedi ya kgaolwa gomme ba mo tloša ka polokego gore a se mo fihlelele. A dula a mo šetše morago a le kgojana, Quinn a hwetša gore ntwa ya divamphaya ke tsela ye botse, ge a lebala go ba kgole le yena. Kat Santos o feditše mengwagangwaga a sa bone mong wa Lesedi la Bošego. Seo ke go fihlela ge Quinn a akanya go mo golega le go mo latofatša ka go mo rweša molato wa dipolao tša divamphaya. Ge a lemoga gore lenaba le raloka ka bona, malapa a mabedi a kopanya maatla a bona go emiša divamphaya go tlaiša motsesetoropo wa bona. Ge ntwa ya ka tlase ga mabu e tšwela pele, le magakabje a kganyogo le ona a gola, ge seo se thomilego bjalo ka go golega, ka potlako se fetoga thaloko ya kotsi ya kganyogo ya thobalano.

Translator: Matlakala


Lesedi la Bošego
Puku ya Bobedi ya Tlhatlamano ya Kgokagano ka Madi

Amy Blankenship, RK Melton
Translator: Matlakala Kganyago

Tokelo ya Ngwalollo © 2012 Amy Blankenship
Phetolo ya Bobedi ya go Phatlalatšwa ke TekTime
Ditokelo ka moka di beetšwe thoko.

Kgaolo ya 1
Quinn Wilder a lebelela gohle ka kantorong ya Warren a sa tsebe gore go hwetša yo a lego ka morago ga dipolao ke selo se sebotse goba se sebe. Bontši bja papadi ya go hlaba mašata go fedile… goba o tshepa gore go bjalo. A lebelela Kane gabjale ge a furaletše. Kane ga senke a itshwenye ka go itšhireletša… Michael o mo diritše mošomo o mobotse.
O be a swanetše go ba a befeletšwe vamphaya ye tshehlana gomme o be a swanetše go ba a kgopetše tshwarelo gape, efela gabjale seo a se kwago ka ga Kane ke letšhogo la go makatša le, gape bjalo ka phoofolo ya go tsoma, o be a sa rate kwagalo yeo.
Kane a myemyela ge a lebeletše ka ntle ga lefasetere. O swanetše go iša modumo fase wa go kwa dikgopolo tša ba bangwe. Ka fao, mangau le dikatse tša naga ba boelane gape… kwano ye kgolo ya go se re selo. Ba nyaka gore a dire eng, mmino wa lethabo? Go ka se be bjalo, ga a ikwe bjalo.
“Divamphaya tša go hloka semoya di ba feta ka palo ya go ka lekana ba lesome go o tee. Ge ke gopola gabotse, Devon ka mehla ke molwi wa senganga. Mogongwe re ka mo lletša gomme a tla go re thuša.” Steven a ba neela disente tše pedi tša gagwe, “Ka tsela yeo mašole a divamphaya a golago ka gona, seo se fetoga ntwa ya go fenywa ka potlako. Ge re sa kgoboketše mašole a rena, gona re swanetše go phutha merwalana gomme re tloge mo Dodge.”
“Ge malapa a be a sa kgaogana lebaka le letelele, o be o ka se tsebe gore Devon o gare o kitimišana le molekani wa gagwe wa go goga maoto go dikologa lefase gona bjale,” Kat a araba Sephen, efela o be a lebeletše Quinn ge a bolela seo.
“Kgegeo e lemogilwe,” Steven a myemyela. Buti wa gagwe o be a tenne Kat ka go mo golega. Ge a lebelela morago go Quinn, a ipotšiša gore ke ka lebaka la eng buti wa gagwe a sa bolela selo ka go thušwa ke Dean ka divamphaya tša kgauswi le tlelapo. Go ba le yo mongwe wa ba welego ke tokelo yeo o ka ikgantšhago ka yona… e sego sengwe seo o se swarago bjalo ka sephiri.
O kwele ka yo mongwe wa ba welego yo a thušitšego go phološa molekani wa Devon le basetsana ba babedi, gore Dean ke karata ya bona fela ya phenyo. “Ke dumelelana le kgopolo ya go botša Devon gore a boye gae ka tshepo ya gore yo a welego… ka na leina la gagwe ke mang?”
“Kriss,” Kat a araba.
“Ge Kriss a ka boa le Devon, re tla lekanyetša seo ka gore re šetše re na le o tee wa ba welego fa gomme o ikemišeditše go re thuša,” Steven a fetša ka go realo.
“Gomme le akanya gore re tla mmuša bjang?” Quinn a botšiša a lebeletše Warren. “Le tseba gore banna ba mohuta wa rena re itshwara bjang ge re hweditše molekani. Tsela e tee ya gore Devon a boye ke ge a ka boa le molekani wa gagwe.”
“Kgopolo ye mpsha ya lena še… Mmotšeng nnete,” Kat a rora gomme a kopanya mahlo le Quinn ge a retologa go mo lebelela. A mo emišetša ntšhi ya gagwe ya leihlo gomme a myemyela ge a tloša tebelelo ya gagwe.
Quinn o ile a se rate kgopolo ya gagwe efela a se bolele selo go itefeletša.
Kane a ntšha sekerete ka lekaseng la gagwe gomme a se thumaša. “Ke nyaka gore, mosadi yo monnyane magareng ga rena o bolela nnete. Ge le nyaka gore dikatsana di boye, le swanetše go di goketša.”
“Ke nnete,” Michael a realo a leka go bebofatša maikutlo ka phapošing. “Ke tla bea sekotlelwana sa lebebe ka morago ga lebati gomme ka leta fao ka nete ya dirurubele.”
Kane le Kat ba myemyela ka bobedi ka pono ya Michael ya go dula ka leswiswing ka nete ya dirurubele ka diatleng tša gagwe a letetše gore katsana ya go se gopole selo e tle le go thoma go latswa lebebe la ka sekotlolwaneng.
“Kriss o swanetše go boa,” Kat a realo mafelelong. “Ke ile ka mmona a elwa gomme seo se swana le go thuthupa ga pomo ka nnete. Efela ge eba ke mmone gabotse, a ka se boye ntle le Tabby.”
“O tla dira bjang gore yo a welego a tlogele mohlokomelwa wa gagwe gomme a kgethe lehlakore la ntwa?” Steven a botšiša.
“Ga o dire bjalo,” Michael a realo. “Ba welego ke ba mmalwa gomme ba kgole le kgole. Bao ke gahlanego le bona ba babedi ke Dean le Kriss, gomme ga wa swanela go tena o tee wa bona.” A lebelela Quinn, “Ga go ka tsela ye nngwe yeo Dean a ka kgopelago Kriss gore a kgaotše maikhutšo a gagwe?”
Dipotšišo tše mmalwa tša botšišwa ka lehlakoreng la mangau ka phapošing efela Kane a kwa bana ba phefo ba etšwa letlalong la gagwe ge a leka go ba thibela. O be a tseba gabotse gore ba bolela ka mang. Ge Kriss a ka boa… gona Tabatha o tla latela.
Bohle ba ile ba makala ge Kane a retologela go bona ka bjako gomme a ba lebelela.
“Ntwa e šetše e thomile, ka fao lena masogana ge le feditše go atlana le go swarelana, mogongwe le ka tsenela lesolo.” A bula lefasetere gomme a fofela ka ntle, a sena taba gore ke lebatong la bobedi. Baki ya gagwe ye telele ye ntsho e phaphasetše ka morago ga gagwe e swana gabotse le maphego a maso pele a timelela.
Ge Kane a timelela, Michael a phethola mahlo a gagwe ka go tšwa ga mogwera wa gagwe ga papadi gomme a obelela lefasetere a le tswalela. Bohle ba nagana gore Kane o kotame fase efela yena o be a mo kwa ka godimo ga bona, kua hlakeng. Kopano e sepetše gabotse go feta ka mo Michael a bego a naganne ka nnete.
Michael a ipotšiša ge eba Kane o lemogile seo a se dirilego ka go kgoromeletša leswika la madi ka garegare ga letlalo la Kane. Ge a loma lenakaila la gagwe le go ntšhetša madi nthong ya Kane, e kabe e le ka mabaka a mabedi a mabotse kudu. Le lengwe ke go thuša ntho ya go hlabiwa gore e fole ka lebelo, efela la bobedi e be e le la go ikhola ka botlalo. Ka madi a gagwe ao a lego ka gare ga ditšhika tša Kane, a ka kgona go lotola mosepelo o mongwe le o mongwe wa gagwe.
Go sa mo tshwenya gore Kane a be gona ka motsesetoropong lebaka le letelele gomme yena a se tsebe seo. O be a sa mo tsome le gatee ka gore a nagana gore Kane o hlokofetše. Ge nkabe a hweditše Kane ka pela… a ka be a emišitše tlhakahlakano ye pele e ka tšwa taolong ya diatla tša Kane. Efela gabjale o file Kane madi, go tla ba kaone go feta sedirišwa sa go lotola. Ge Kane a akanya go tšhaba… a ka se fihle kgole.
“Ga ke bone gore ke ka lebaka la eng Kane a na le maitshwaro a mabe ka seo ka ge e le yena yo a dirilego gore ntwa ye ya divamphaya e thome,” Nick a realo mo a bego a ithekgile ka kota ya lebati. O be a sena taba le Michael magareng ga bona efela go ithekga ka Kane ke kgopolo ye mpe. Monna yo ga a bonale a itekanetše.
“O a tenega ka gobane Kane o akantše gore a se be lenaba,” Warren a mo tsebiša le ge e le gore o be a sa thabišwe ke Kane le gatee. Efela o be a sa nyake go tliša kgopolo ya gore ke Kane yo a dirilego gore sesi wa gagwe a golegwe ke Quinn… e sego go fihlela ge a na le kgopolo ye botse ya gore o tšeya gabotse go fihla kae vamphaya ye ya go tsoga bahung.
Michael a thoma go emelela Kane, efela go be go na le menwana ya maoto ye gatilwego le go ba le molato go seo. O be a tseba gore Kane o mo fihlela se sengwe gomme o be a tloga a nyaka go hwetša seo pele se eja mogwera wa gagwe a phela. O be a duma ge Kane a ka potlaka le go lemoga gore ga noši gabjale le gatee.
Ka lehlakoreng le lengwe, Michael o be a tseba gore Kane o bile le maitemogelo ao a ka se tsogego a kwešišitše letšhogo la seo ka botlalo. Ge a ka lebana le boemo bja go swana le bjoo, Michael ga a na bonnete bja gore o be a ka se gafe na. Kane o ile a ekwa ke yo mongwe wa bagwera ba gagwe ba potego gomme a ahlolelwa go rakwa ga ka gare ntle le tshepo ya go ka tsoga o ngwegile.
Mahlo a gagwe a sesefala ge a lebelela lefasetere a lemoga gore go na le potšišo ye tee yeo a lebetšego go e botšiša. Ke gore naa Kane o lokologile bjang ka lebitleng?

*****

Kane o ile a ya godimo le fase kua hlakeng ya Mmino wa Ngwedi, a mena diatla le go di phuthulla ka mahlakoreng a gagwe. O be a sa bona tebelelo ya Kriss sefahlegong sa gagwe ge a mo lahla go selaganya ntlo ya bobolokelo bjalo ka ditšhila. O be a sa kgone go lwa le yo a welego… ga go yo a ka emelago maatla ao ba nago le ona.
Le ge ba ka bitša Kriss gore a ba matlafatše, Kane o be a tseba gore Kriss ga a na maikemišetšo a go abelana ka yena. Ga go direge ka mehla, efela Kane a ka petšha ka leswika la madi leo le bolokilwego ka mmeleng wa gagwe gore yo a welego o rata Tabatha. Ge eba ke nnete, gona Kane a ka se be le sebaka sa go batamela kgauswi le molekani wa gagwe wa semoya.
O lahlegetšwe ke monyetla gomme seo se mo kweša bohloko kudu. Le ge a be a sena yo a welego yo a mo dutšego thekeng, Tabatha a ka se nyake selo sa go tšwa go yena gabjale. Ge e le ba bangwe, ga a na taba le gore bafetogi ba mo rata goba aowa. Se ga se phadišano ya go tuma le gatee.
“Mogongwe go kaone ge ba sa nthate,” a hebahebetša ge a lebelela ka ntle motsesetoropong.
Kane a dumela ka hlogo ka go tia gomme a tsenya diatla tša gagwe ka merabeng. O tla dula sebaka go thuša go tloša divamphaya mo motsesetoropong tšeo a di hlotšego ntle le maikemišetšo. Efela ge a feditše seo, o tla sepela gape a nnoši. Ka tsela yeo, ge a ka akanya go tloga, ga go yo a ka nyakago go mo šala morago.
Kgopolo yeo ya mo tlogela a ngangegile.

*****

Trevor o ile a ema seferong sa go otlela sa Envy gomme a tima koloi. O be a tloga a tsoma go bolela le yena le go bona gore o bjang. Mogongwe o bile le sebaka sa go nagana ka seo a mmoditšego… efela, seo ke nnete.
Ge a lebelela go selo seo se lego setulong sa monamedi sa koloi ya gagwe, a myemyela le go se tšea. O dirile se sebotse kudu ka ditšene tšeo a di ‘adimilego’ mo go Chad bekeng ye, gomme gabjale o ile go di bušetša. Seo ke mošomo o mobotse wa gagwe wa letšatši. Ka tshepo, ga go yo a ilego a romelwa diheleng ka lebaka la tshegišo.
A phuthulla ditšene, a lebelela ditšhila le oli ye ntsho ya koloi ye tloditšwego gohle mo go tšona. A segela ka gare ge a bona mošomo wa gagwe wa diatla gape mo mapeleng. Trevor o ile a dira se sengwe sa go kgethega sa go se tlwaelege gomme fetogela gape go sebopego sa mpša go gagola mo mapeleng ka lethabo.
Hanna, katse ya kgale ya Mdi. Tully yeo e ilego ya akanya go tla go dula le yena, e ile ya sepelela fao gomme ya dupelela ditšene pele e retologa, ya emišetša mosela moyeng le go di šašetša go tloša monkgo wa bokatse wo a o tlogetšego go tšona. Trevor ga senke a gopole gore a ka sega ka maatla bjalo bophelong bja gagwe.
“Go lokile,” a hebahebetša.
A tšwa ka koloing a leba lebating la ka pele gomme a lahlela ditšene mehlašaneng, a nyaka go sega gape ge di redimoga mo mehlašaneng gomme di wela ntotomeng ya ditšhošane. Seo e be e le se sebotse kudu.
A letša pele ya lebati, a tsenya diatla tša gagwe ka merabeng gomme a emela lebati go bulega. Ge mafelelong le bulega, Trevor a bea tlhagišo ye botse sefahlegong.
“Dumela,” a bolela ka lentšu la tlase.
Chad a hemelana gomme a ithekga ka foreime ya lebati, “Dumela le wena, monna wa keng.”
“Lebelela, ke a tseba ke sentše gomme ke nyaka go bolela le Envy… goba go no leka ge o ka tshepiša go bea theisara kgole le yena,” Trevor a hlaloša ka myemyelo ye nnyane.
“Ke be ke tla dira bjalo, efela Envy ga a gona fa,” Chad a araba ge a emelela gabotse mo foreimeng ya lebati le go ema ka botelele bja gagwe. Jason o ile a bolela ka leina la Trevor lefokong letee le lentšu le mošalanthago gomme o be a tshepa gore Jason o fošagetše. “O akantše go tšea maikhutšo gomme o tlogile le Tabatha le Kriss. Ga ke tsebe gore o tlile go boa neng.”
Trevor a hemelana ka maatla gomme a dumela ka hlogo ge a lemoga gore monkgo wa Envy ga se o moswa ka ntlong. Gabotsebotse Chad o be a sa bolele maaka ka go se be gona gagwe ka gae. “Ke nyaka gore o mo fe tshedimošo ye nngwe hle.”
“Ya go swana le eng?” Chad a botšiša, a bonala a tshwenyegile.
“O swanetše go tloga kgauswi le Devon Santos. O na le ditaba tše mpe gomme o tla feleletša a mo kwešitše bohloko,” a realo, a tshepa gore o tla gogela Chad ka lehlakoreng la gagwe ka go raloka ka maikutlo a bobuti a tšhireletšo.
Chad a nyenyebalela temošo ya Trevor gomme a phutha matsogo a gagwe kgareng ya go se apare. “Mohuta wa go swana le wena?”
Maitshwaro a bogale a Trevor a phuhlama, “Hei, seo ke se dirilego e be e le karolo ya mošomo wa ka. Ke be ka sa nyake go kweša Envy bohloko ka mohuta wa mošomo wa ka. Ke ka fao ke sa mmotšago gore ke šoma go dira eng.”
O ile a lebelela kgakala gomme a tsenya diatla tša gagwe ka garegare ga meraba ya gagwe a tseba gore Chad ga a tsebe selo ka seo. A tshepa gore Envy ga se a bolele gape seo a mmoditšego go Chad. Batho ga se ba swanela go tseba ka dilo tšeo di fofago bošego… kudukudu lephodisa.
“Ke mmoditše bošego bjo o nkhweditšego ka tlelapong gore ke iphihlile efela ga ke kgolwe gore o a ntshepa,” A tlaleletša, a bogetše maitshwaro a Chad ka bokgauswi go bona sešupo sa gore o tseba go feta ka mo a swanetšego.
Chad a goga moya, “Lebelela ke a tseba gore o be o rata sesi wa ka efela o fetetše pele. Ke nagana gore le wena o swanetše go dira seo. Ga ke go botše bjalo ka mošomi-ka-nna goba mogwera, ke go botša bjalo ka motho yo mongwe yo a tsebago. Mo tlogele a nnoši gomme o mo dumelele go tšea diphetho ka boyena. Ntle le maikemišetšo a gago a mabotse, ke nagana gore o intšha le Devon gabjale.”
Trevor a emišetša mahlo a gagwe go sefahlego sa Chad. “Eng?” a botšiša ka bogale.
“Ka mo ke tsebago ka gona o intšha le Devon,” Chad a boeletša gape.
Trevor a kwa go tonya go kitima mokokotlong wa gagwe, a retologa a tloga lebating ntle le go bolela lentšu letee. Chad a nyenyebala ge a lemoga katse mo lefasetereng la ka pele ga koloi ya Trevor e ithekgile ka tešepoto. Monna yo mongwe a potlaka a tsena ka koloing ya gagwe, a e dumiša, gomme a tšwa kgorwaneng ya go otlela.
“Jason,” Chad a bega moyeng, “E se be o bolela nnete ka gore ke mošalanthago.”
Chad o be a tseba gore Envy o tlogile ka toropong le Devon go ba le Kriss le Tabatha go ya maikhutšong a makopana. O be a sa nyake go botša Trevor ditaba tšeo ka ge Envy a mmoditše gore a ikane gore seo ke sephiri. Ga go na taba gabjale, ka gobane ga se mošomo wa Trevor go tseba seo Envy a se dirago gabjale.
Chad a šikinya hlogo ya gagwe gomme a boela ka gare ge a bona selo se sengwe se setalalerata ka sekhutlo sa leihlo la gagwe. Tlhagišo ya sefahlego sa gagwe ya thaba ge a bona ditšene tša gagwe di le kua tlase mabung gomme a kitimela go di topa, a nyenyebetše go bona ditšhošana di gagaba gohle go tšona.
Lethabo la gagwe la hwelela ge a bona go gagolwa gohle le go kgeilwa gomme mahlo a gagwe a tomoga ka tshegišo ge a bona mo pele go kgeitšwe ka botlalo.
Chad a iša ditšene fase gomme a lebelela mmileng, “Mpša, marago a gago ke bjang.”

Kgaolo ya 2
Kat o ile a šuta a ya go ema kgauswi le lefasetere. O be a nyaka go ba kgole le Quinn ka mo a ka kgonago. O ile a nyaka go kgokološa mahlo ge a lemoga gore mosepelo wa gagwe o mo lebantše thwii le tebelelo ya gagwe. O be a duma ge nkabe Envy a le gona fa. O be a tloga a nyaka go bolela le mosadi o mongwe… goba mosadi ofe goba ofe ka kakaretšo. Go be go tla ba bose go ba le mothekgi ka gare ga poledišano ye ya go tlala senna fela.
Ge a lebelela gohle ka phapošing, a lemoga gore maloko ka moka a magolo a dikatse tša naga ga se a felele.
“Micah le Alicia ba kae?” a botšiša ka ge a tseba gore ba swanetše go ba karolo ya se… seo e ka bago e le sona.
Quinn a lebelela Warren ka tlhagišo ya gore lengau le kgona go bala magareng ga methaladi gomme o tla mo thuša go seo a itokišeditšego go se bolela. “Alicia ga a gona gae ka ge a le sekolong sa bodulo go lekana kgwedi gomme ga re mo tliše mo ntweng ye. E kotsi kudu go basetsana”
Tlhagišo ya Kat ya fifala le go ya pele gomme a bonala a ikemišeditše go ripaganya moetapele wa lapa la dikatse tša naga ka bogare.
“Micah yena?” Warren a botšiša pele Kat a ka hwetša sebaka sa go thoma ntwa ka tshwayotshwayo yeo ya mefelelo.
“Re ka se mo fihlele,” Pefelo ka segalong sa Quinn ya dira gore bohle ba mo lebelele ka go nyaka go tseba. “Re lekile makga a mmalwa efela o gana go araba sellathekeng sa gagwe.”
Steven a hemelana ka lebaka la manganga a Quinn gomme a tsena gare, “Micah o timeletše go ka lekana dibeke tše pedi.”
“Eng?” Warren a botšiša ka potlako a befetšwe. “Goreng o sa tla go rena gore re go thuše?”
“Ka lebaka la tšenale ya botlaela,” Kat a mo gegea. “Go molaleng, gore o be a tšhoga gore re ka se kgone go kgotlelela seo ka lebaka la go hloka kwelobohloko ga rena.”
Michael a šikinya hlogo a tseba gore go fihlela ge malapa a mabedi a ka šomana le diphapano tša ona, o swanetše go bapala bjalo ka malokwane. “Go lokile, ge re šomana le bothata bja divamphaya, re swanetše go bea leihlo go ditšhupetšo tša go timelela ga Micah.”
“Tlhaologanyo e laetša gore Micah mafelelong o tla boa ka boyena, ka mehla o dira bjalo,” Quinn a emiša magetla.
Kat a lebelela ka ntle ga lefasetere a sa befetšwe. Goreng Quinn a bolela gore basetsana ga se ba swanela go amega? Ba ka no bea Alicia ka ntle go se ge ba nyaka, gomme ba swanetše go ba le yena ka ge ele yo monnyane go bona ka moka. Efela ge ba ka leka go mo emiša, gona ba emetšwe ke makalo ye kgolo. Bothata ke gore, gabjale o tshwenyegile kudu ka Micah.
Quinn o be a swanetše go phaela tšohle ka thoko a ba bitša. O a tseba gore ba be ba tla mo thuša le ge ba na le diphapano. Ka fao ge botatago bona bo bolayane… dibe tša botatago bona ga se tša swanela go wela go bana ba bona.
Le ge a be a sa tsebe seo, Warren o be a dumelelana le Kat ka setu. Quinn o be a swanetše go ikgokaganya le bona ka nako yeo Micah a timeletšego. O be a lemoga gabotse ka ga dikgakgano tšeo bobuti bao ba hlwelago ba eba le tšona. Go se kwane ga bona gantši go feleletša Micah a etšwa gomme a timelele matšatši a mmalwa… efela e sego dibeke.
Steven le Nick ba be ba kgokagana mo mengwageng yeo gomme Nick a mmotša tšohle ka lapa la dikatse tša naga. Ge Micah le Quinn ba elwa, Micah o botša Steven ka mehla mo a yago ge a nyaka go sepela go feta letšatši letee. Ka nako ye Micah ga se a tlogele molaetša go mang goba mang, mo go bolelago gore o ile go tloga lebakanyana.
“Ka morago ga sehlaga sa kotsi sa divamphaya seo nna le Steven re se hweditšego, ga go motho yo a swanetšego go ba noši bošegong bjo. Re swanetše go sepela ka bobedi,” Quinn a realo go fetoša poledišano.
Steven a kwa a tshwenyegile ge seswantšho sa mosetsana yo a mo hweditšego se selaganya monagano wa gagwe. “Ke nagana gore ke tla boela fao bošegong bjo go netefatša gore kereke e sa hlwekile. Re ka be re sa bona se sengwe.”
“Ke tla ya le Steven,” Nick a realo a nyaka go fetša nako le modirišani wa gagwe wa kgale wa go tlala ka mathaithai.
Kat a gakanega ge a hlakanya dipalo ka setu. Michael o tla tloga le Kane ntle le kgonono, gomme o be a sa nyake gore ba be le Kane ka ge a sa hlwa a boela maemong. Seo se tlogela Warren le Quinn.
“Ke tla tloga le Warren,” Kat a realo.
“Aowa,” Warren a mo phošolla. “Re nyaka yo mongwe go šala a hlokometše tlelapo.”
“Ga se gore ka gobane ke le mosetsana nka se kgone go itlhokomela,” Kat a ba lemoša, gomme a tšwa ka phapošing ntle le mašata.
Banna ka moka ba tšutšubana ge a tswalela lebati ka boleta ka morago ga gagwe.
“Akgaa,” Nick a hebahebetša. “Ke be ke duma ge nkabe a bethantšhitše lebati.”
Steven le Quinn ke kgale ba bone Kat mo mengwageng ye mmalwa efela ba sa gopola maitshwaro a gagwe gabotse. Go tswalela lebati ka boleta ga Kat yo a befetšwego go feta makga a lesome a ge a ka tšwa ka go bethantšha lebati. O be a befetšwe… aowa, o be a befetšwe go feta lentšu leo. O tenegile.
“Ke ile go lletša Devon mogala gomme ke mmotše ka seo se hlagago,” Warren a bolela gomme a ntšha sellathekeng ka morabeng wa ka pele wa borokgo bja gagwe. O be a hloile go dira buti wa gagwe seo efela ge a ka se boye gae a ka no se hwetše motho ge a boa. A kgotla nomoro gore e letše ka lebelo, a leba lebating la go fapana leo le lebago borobalelong.
Warren a leta mola mogala wa ka lehlakoreng le lengwe o tšwela pele go lla. Mafelelong a kwa yo mongwe a o topa gomme thogakano ya latela ka bjako ka morago.
“Gabotse o nyaka eng?” Devon a botšiša a ngunanguna efela a thabile.
Warren a bolela seo se hlagago ka potlako go tloga mola Devon le Envy ba tlogago e sego go feta diiri tše masomepedi-nne pele ga fao.
Devon a goga moya, “Akgaa, ke tloga toropong gomme sengwe le snegwe se a senyega.”
“Ke tla go fa matšatši a mmalwa gore o boye gae.” Warren a realo. “Ke nyaka o ntirela se sengwe mo matšatšing ao a mmalwa.”
“Ke eng seo?” Devon a botšiša a tloga a kwagala a tsogile gabjale.
“Ke nyaka gore o kgopele Kriss go tlo re thuša. Mmotše gore Dean o dumetše gomme re tloga re mo tsoma, le yena. Ge go kgonega, e re Envy a boledišane le Tabatha gore re nyaka Kriss fa ka gobane ka seo ke se kwelego, ge a ka boa le yo a welego o tla latela.”
“Ke tla bona seo nka se dirago,” Devon a realo. “Kriss ke o mongwe wa go makatša. O sepela ka mošito wa gagwe, wa tseba.”
Warren a dumela ka hlogo, “O nkgopotša ka yo mongwe yo ke mo tsebago.”
Devon a sega, “Go lokile buti yo mogolo. Ga ke dire ditshepišo akere.”
“Ke tla go bona mo matšatšing a mmalwa.” Warren a realo gomme a tima mogala.

*****

Quinn a lemoga Kat go ye nngwe ya dimonithara tša tekolo lebotong. Ka ge bohle ba emetše Warren go fetša mogaleng, a batamela kgauswi ga dimonithara o kare o tenegile. Go tenega e be e se seo a se kwago ge lebeletše Kat.
O be a nagana gore o botse mengwaga ya go feta, efela ga se a akanye gabotse ka seo a bego sona gabjale. Mo mengwageng ya go feta, o be a dula bogela Kat a le kgole. O ile a thwala ditshebi go tlo šoma fa go Mmino wa Ngwedi gomme ba mo fe pego… le ge e le gore ya mafelelo yeo a e rometšego o feleleditše e le motšwasehlabelo wa polao.
O ile a amega kdu ge yo mongwe wa masogana a ile a leba thwii mo Kat a emego ka morago ga para gomme a obelela letsogo la gagwe. Ka ge khamera e be e beilwe gabotse, Quinn a bona gore lesogana leo ga le maemong a mabotse.

*****

Trevor a tsena ka go Mmino wa Ngwedi a sa tsebe ge eba o nyaka go rathaganya lefelo leo goba a ineele go pefelo ya gagwe ka go nwa dikalone tša senotagi. O lekile go ikgokaganya le Envy efela go molaleng gore o iphihletše yena. Tabatha le Kriss ba be ba lekola megala ya bona gabotse gammogo le yena. Ge a botšiša buti wa gagwe wa go tseba kudu gore naa Envy o kae, o be a nyaka go kgaola hlogo ya Chad ka go se bolele thwii ka lefelo leo a lego go lona.
Trevor a bona Kat a fana ka dino ka morago ga para yona yeo a šomago go yona ka mehla. A mo obelela a swara letsogo la gagwe go goga šedi ya gagwe efela tebelelo yeo a mo filego yona ya dira gore a boele morago gomme a dule setulong.
“Theko ya tlase ya ditheisara e fedile. Nka go hweletša se sengwe? Go swana le boleloko bja bophelo ka moka go ye nngwe ya dipara tše dingwe?” Kat a mo ponyaponyetša mahlo o kare ga a na molato. Mafelelong a mo lebelela ka mahlong gomme a bona bohloko bjo mo aparetšego gomme a emiša magetla, “Ke maswabi, tebanya ya ka ya nnete e kgole. Nka go hweletša eng?”
Trevor a forehletša mo pele ga hlogo ya gagwe ka dintlha tša menwana. A ka se tsoge a kgonne go kwešiša batho ba bong bja go fapana. “Ga ba dire gore seo se be bonolo. Dikarabo tše dingwe di bosana.”
“Go swana le?” Kat a botšiša.
“Go swana le gore molekani wa ka o iphihlile kae.” O be a emišitše ntšhi ya leihlo gannyane ge a letile.
“Molekani wa gago? O šetše o na le yo mongwe sebakeng sa Envy ka pela gakaalo?” Kat a myemyela ge tebelelo ya gagwe e hloka karabo. “Joo, o bolela ka Envy.”
“O nagana bjalo?” Trevor a araba ka kgegeo.
“Seo ke se tsebago ke gore molekani wa gago wa kgale le buti wa ka ba ile go ipshina ka lenyalo la bona.” Kat a iša magetla godimo a tseba gore seo se kgauswi le nnete go feta ka mo Envy a ka naganago.
“Ke be ke nagana gore o na le Tabatha le Kriss?” Trevor a kwa kgatelelo ya madi a gagwe e nyogela godimo ka lebelo ge a ipotšiša gore naa Chad o mmoditše maaka ka seo.
Kat a akgofa a mo tšhelela seno sa Phišo a tshepa gore se tla nolofatša pefelo yeo e bonalago ka mahlong a gagwe. “Go bjalo. Tabby le Kris ba na le bona.” A bea seno ka pele ga gagwe a tlaleletša ka go re, “Ntlo e tla lefela.”
A mmogela ge a galampela seno, dipounama tša gagwe tša bulega ge a lemoga lebone la ka godimo ga bona le laetša meokgo ya go itlela e thoma go kgobokana ka mahlong a gagwe.
Akgaa, seo se bohloko. O ile a itshola ka pejana ka go ba seota mo go yena. O be a duma ge Quinn a ka ikwa bjalo ka ga yena. Go be go tla ba bose ge a bontšha maikutlonyana go yena goba seo a se kwago ka yena. Joo, o be a tla kgona go phela le Quinn le ge a mo hlokomologa, ge fela a ka ba le sebete sa go mmotša seroka phatla.
A mo obelela, a bea seatla sa gagwe ka boleta legetleng la Trevor gomme a nagana ka kgopolo ya go mo tloša fao gomme a mo hweletše modirišani wa gagwe wa go tsoma ka nako e tee.
Kat a myemyela ge kgopolo e thoma go hlamega ka hlogong ya gagwe. O ile a mmitša thwii gore ke lengau bošego bjo bongwe, ka fao o be a sa bolele maaka gore ke yena monyakišiši wa batho ba go se tlwaelege. Ge eba ke mašole ao bašemane ba a tsomago, gona seo a ka se dirago ke go ba thuša go thwala… akere?
“Gabjale, ge o ka ntshwarela, ke ile go itira tebanya ye botse ya divamphaya tšeo di bego di tlogela ditopo mejakong ya rena.” O ile a dikologa para efela Trevor a mo swara ka lenakaila ka bjako gomme a se mmone le ge a šikinyega. O no goga ntšhi ya gagwe ya leihlo go letsogo leo le mo thibelago. “Ge fela o ka nthuša, o ka nyaka go tlogela tšohle.”
“O bolela nnete?” Trevor a botšiša.
Le yena o be a na le kgopolo ya gore ke divamphaya ka lebaka la gore go bonala go tswalwa tše diswa gabjale… joo, le ntlha ye nnyane ya go senywa ga go longwa ka meno a matelele. Bothata bja se ke gore ga senke a šomane le divamphaya pele… ke fela ka tlhahlo ya bona. O be a nyaka lebaka la go ba fao go fihlela Envy a boa, ka fao goreng a sa be le sesi wa mophenkgišani?
Ge Kat a dumela ka hlogo le go goga letsogo la gagwe, Trevor a šikinya hlogo a tseba gore o tlile go itshola ka seo, “Bobuti ba gago ba ya le wena?”
“Jo, ba a ya, efela ka mahlakoreng a mangwe.” A ngota molomo. “Go bonala eke ga go yo a nyakago go šoma le mosetsana.”
Go netefatša ntlha ya gagwe, Steven le Nick ba kgetha motsotso wo go tla gomme ba leba lebatong la ka tlase gomme ba sepelela lebating mmogo. Nick o ile a lebelela Kat kudu, a tshepa gore o tla kwešiša molaetša gomme a dira se Warren a mo kgopetšego go se dira… dula mo go bolokegilego. O ile a kwa a lokologile ge a myemyela gannyane o kare o ba swaretše ka moka.
Ge a lebelela morago lebating la go ya ditepising Kat a dumela ka hlogo, “Wa bona, ke dihlophahlophana bošegong bjoo ntle le palo ya tee… yeo ke nna.” O ile a laetša Trevor myemyelo e kgolo o kare ga a na taba. “Efela go lokile, ga ke na taba go tsoma ke nnoši.”
Trevor a myemyela gomme a phutha matsogo a gagwe mo bogodimong bja para. A inamela pele le go šupetša Kat gore a dire seo gomme a mo sebela mantšu a mabedi.
“Ga o noši,” A šikinya hlogo.
Quinn le Warren ba ema ge ba etla lebatong la tlase ka tlelapong ya bošego. Warren o be a tseba gore ba na le bašomi ba bantši bošegong bjoo ka fao para e tla ba le batho efela seo sa se mo emiše go fa ditaelo tša motsotso wa mafelelo tše mmalwa.
Ge a sa dira seo, tebelelo ya Quinn ya nyaka e phutše Trevor molete. Ga se a lahlegelwe ke monithara, o bone ge Trevor a obelela le go swara lenakaila la Kat goba mmino wa maikutlo wa go latela. Kat o batamelane gakaakang le monna yo? Ka mo ba itshwerego ka gona, go bonala eke ba abelena ka sephiri se sengwe seo ba sa nyakego ba bangwe ba se kwa gomme seo sa šila megalatšhika ya gagwe.
“Monna yola a nago le Kat ke mang?” Quinn a botšiša ge Warren a feditše go bolela ka kgokagano ya poledišano.
Warren a retologa go lebelela molekani wa kgale wa Envy. O ile a nagana gore Kat o botša Trevor gore Envy ga a sa hwetšagala, gomme seo ke kgopolo ye botse ya go ba ntle le leihlo la go nyakišiša la Trevor ka pareng, mogongwe monyakišiši wa batho ba go se tlwaelege o tla ya go gongwe go nyakišiša.
“Yo ke o mongwe wa masogana ao a ratago go theisarwa ke basadi ba babotse,” Warren a myemyela go motlae wa gagwe. Ge Quinn a sa myemyele, gwa dira gore a hlologele ka bjako go šoma le Michael. A ipotšiša ge eba o šaletše go fetoša badirišani efela a tloša kgopolo yeo. Ge Quinn a ka šoma le Kane e tla ba masetlapelo ao a emetšego go hlaga.
Trevor a kwa gore motho yo mongwe o mo lebeletše gomme a lebelela lebating. O ile a palelwa ke go tloša makalo mahlong go tlhagišo ya gagwe ge a bona Quinn Wilder le Warren Santos. Ge a sa gononwe ka seo a se bonago, Trevor o be a tla kgolwa gore bobedi ba amega dipolaong gomme ba ipeakanyetša sa go latela. Efela kgopolo yeo o ile a e phaela thoko go maphodisa ao a selegae a ditlaela.
“Naa mong wa Lesedi la Bošego o nyaka eng fa?” Trevor a botšiša a retologela go Kat.
“Re leka go lokiša bothata bja divamphaya ka moka,” Kat a bolela ge a kopanya mahlo a gagwe le a Quinn ka ntwa. Ijoo, o bonala a hlakahlakane. E re ke leke teori, a inamela go Trevor o kare o a mo sebela dilo tše dibose ka tsebeng ya gagwe, “O na le dibetša dife goba dife tšeo re ka di dirišago go lokiša se?” a ponya leihlo ka go tseba gore o hweditše modirišani wa bošego.
Trevor a nagana ka seo motsotswana, a dira lenaneotekolo la monagano go hwetša seo a nago le sona ka therankeng ya gagwe.
“Ee, ke na le tše mmalwa ka koloing,” Trevor a dumela. “Re ka no ya lefelong la ka go hwetša tša tlaleletšo tšeo ke di beilego ka seifeng ya ka.”
‘Seo se lokile,’ Kat a nagana.
Ge Warren le Quinn ba feta para, Warren gape a tshwenywa ke kgokagano ya poledišano yeo e bego e tima ka tsebeng ya gagwe. Quinn o be a sa tshwenywe ke tiego yeo. E be e mo fa monyetla wa go hwetša gore go hlaga eng go bobedi bjo thabilego kua pareng.
Kat a bona Quinn a etla gomme a tloga fao ka bjako go ya kua tlase pareng gore Trevor a se kwe ka ge seo se tla utulla sephiri. A obelela lebotlelo, gomme a retologa le go hwetša Quinn a eme magareng ga gagwe le para.
“Nka go thuša morena?” Kat a botšiša ka kgegeo a emišitše ntšhi ya leihlo. “O a tseba gore batho fela ga se ba dumelelwa ka morago ga para.”
Quinn a mmatamela le ge e le gore o mmatametše kudu. A bea seatla mo šelefong kgauswi le letsogo la gagwe, o ile a mo tswalela gabotse mo a lego. A bona mahlo a gagwe a lebelela ka godimo ga legetla la gagwe go monna yo a bego a bolela le yena… Quinn a rora, “Kat o se lahlegelwe ke kgopolo bošegong bjo, ke a go lemoša. Ga se gore ge o sa tloge le rena go yo tsoma go bolela gore divamphaya di ka se tsene ka lebati la para ye.”
Kat a goga moya a tseba gore seo ke mathaithai a kgale a ka pukung. Go dira gore motho yo mongwe a ikwe a le bohlokwa ka go mo fa mošongwana wa ka thoko wa go bolokega. “Ke tla loka,” a mo tsebiša ge a khukhumela ka tlase ga letsogo la gagwe gomme a boela morago go Trevor. “Ge eba ke nyaka se sengwe, ke šetše ke na le yo mongwe yo a itokišeditšego go mpha sona.” Seo sa mafelelo se boletšwe bjalo ka sešupo sa kganyogo ka lentšung la gagwe. E be e le maaka, efela Quinn o be a mo tenne.
A myemyela ka gare ka ge a tseba gore Quinn o nagana gore o bolela ka thobalano gomme Trevor o nagana gore o bolela ka go tsoma divamphaya bošegong bjo. Warren a kgetha motsotso wo go fetša le go bitša Quinn gore ba tloge.
Dipunama tša Quinn tša sesefala ge a tloga ka morago ga Kat gomme a mo inamela, o kare o forohletša dipounama tša gagwe tsebeng ya gagwe, “O be le bošego bja polokego.” A bogela ge bana ba phefo ba phatlalala molaleng wa gagwe ka kgotsofalo.
Kat a itshwareletša ka morumo wa para ge dikhuru tša gagwe di eba bokoa. A itokiša le go fofa ge lentšu la Michael le tšwelela ka morago ga gagwe.
“O hlokomele ka fao o gogago mosela wa katse yela, moratiwa,” Michael a mo gopotša gomme a dumediša Trevor ka hlogo pele a eya go gahlana le Kane hlakeng.
Trevor a nyenyebalela tebego ya sefahlego sa Kat ya makalo. “Yola ga se vamphaya?”
“Aowa, yola ke monnanna gomme o re thuša go lota dintatauwane tša nnete,” Kat, a bolela ka boitshepo gomme a tlaleletša ka setu, gomme ke yena a nnoši yo a bego a sena taba ka go tšwa ga ka bošegong bjo. “Efela, o kare re šalela morago. O ikemišeditše go tloga?”

*****

Kane o be a eya godimo le fase tlhakeng, a kgoga sekerete gomme ka sebaka a emišetša matsogo a gagwe gohle. O be a thoma go fela pelo ka go emela Michael gore a tšwelele.
“Mangau le dikatse tša naga,” a ngunanguna. “Ke ba babe kudu go feta dikatse tša ka gae. Mongwe le mongwe o nyaka go laola ba bangwe. Go kaone ke šome le dikhoyothe go feta go šoma le se.”
Michael o ile a tšwelela ka morumong wa hlaka ka morago ga Kane, a mo swara ge a rogana ka tlalelo. O ile a nyenyebala ge Kane a homola ka pejana gomme a lebelela ka lehlakoreng go laetša go ba gona ga gagwe.
“Akgaa wena Kane, Re ile go bolela ka seo se go tshwenyago goba aowa?” Michael a botšiša ge a batamela kgauswi le yena.
“Goba aowa,” Kane a araba.
“Go lokile,” Michael a leta ka go tseba gore Kane o hloile go swarwa ka setu go feta go ngangišana. O rata kudu ge yena a ka ba le nnete.
Kane a leba morumong wa moago, a bea bokgole magareng ga bona gape. O be a lebetše gore Michael o kgona go mo tsatsela… ke kgale seo se sa hlage. “Raven o be a bonala a nyamile ka ge mašole a gagwe a sena selo kua ntlong ya bobolokelo… ba bangwe ba go gafa ba be ba timetše. Kakanyo ya ka ke gore ke divamphaya tšeo di lahlegetšwego ke moletlo wo monnyane wa lehu gomme ba tsoma lefelo leo ba ka hlwago go lona, ka fao ke ile go lekola seo.”
Michael ga se a bolela selo ge Kane a kotama ka thoko ga hlaka gomme a kotama tsejaneng ya go sepela kua tlase gape. Ge a leba morumong wa hlaka a ikemišeditše go kotama bjalo ka Kane, se sengwe mo hlakeng go selaganya tsela sa goga šedi ya gagwe.
Ge a lebelela fao, Michael a bona moriti ge o timelela. Se sengwe ka ga moriti wo sa bonala se tlwaelegile efela a sa gopole gore ke eng.
Naa Kane o na le yo a mo šalago morago goba ke yena tebanya? A leka go gatelela maikutlo ao gabjale, a lebelela fase gomme a myemyela ge a ewa. Le ge a be a sa bone Kane, o be a tseba tsela ya go leba ntlong ya bobolokelo, kantle le go latela tsela a latela go gogwa ga madi a gagwe ka gare ga ditšhika tša Kane. Ka nako yeo a fihlilego ntlong ya bobolokelo, o be a kwa go goa ga divamphaya tšeo Kane a di swerego di sa gopola.
O ile a emanyana lebating a diriša go bona ga gagwe go matlafaditšwego go bona ka leswiswing la phapoši ye kgolo. Kane o be a šetše a swere divamphaya tše pedi gomme tše dingwe di nagana gore go mo thika ka sehlopha e tla ba kgopolo ye botse. A tsena ka gare, a tswalela lebati ka morago ga gagwe gomme a leba pele ge lentšu la Kane le kgalagala.
“E re ke šomane le se. O se dumelele le o tee a go feta,” Kane a bolela a felelwa ke moya ge a sopaganya molala wa vamphaya yeo e bego e leka go gagola mogolo wa Kane. A šutha ge meno a matelele a tsena legetleng la gagwe, a dira gore a lese wa mathomo.
Dintšhi tša mahlo a Michael tša timelela ka bobedi ka tlase ga moriri wa gagwe wa go tšewa ke phefo efela a ithekga ka lebati. “Go lokile, ge o na le nnete.” A phutha matsogo kgareng ya gagwe gomme a ithekga ka tšhipi.
“Gabotse… ke tenegile,” a bolela ka morago ga motsotswana gomme a lebelela go divamphaya tša go hloka semoya tšeo di sa hlwago di elwa. “Ga ke akanye gore o mongwe wa lena a ka ntlhompha ka go tšhaba?”
Ge Kane a kgona go kgaola hlogo ya vamphaya ya mathomo, ye nngwe ya ka mathoko ya leka go dira seo Michael a se šišintšego, efela letsogo la Kane la mo obelela ka baki ya letlalo yeo a e aperego. “Ga ke nagane bjalo,” a rora ge a mo gogela ka ntweng.
“Bommago ga se ba go rute go abelana?” Michael a myemyela ge a bogetše Kane a ba thulagantšha. O be a na le maikutlo a gore Kane o swanetše go kwa bohloko go mo thuša gore a kwe a phela gabjale. O be a sena kgonono ya gore Kane e tla ba vamphaya ya mafelelo yeo e tla bego e eme gomme go lokolla pefelo yeo le ntwa go ka thuša go bula tšhireletšo ya mogwera wa gagwe… Theraphi ye e kaone kudu.
“Mma wa ka e be e le lehodu,” Kane a araba, a fofa le go kgoromeletša maoto a gagwe ka bobedi kgareng ya vamphaya yeo e bego e kitimela go yena. Vamphaya e ile ya fofa gomme Kane a kotama mokokotlong wa yona. A ragela maoto a gagwe godimo, gomme a emelela ka potlako. “O be a sa kgolwe go kabelano.”
“Bobedi bja rena bo tseba gore e be e se lehodu,” Michael a realo. “E be e le mosadi wa go godišwa gabotse.”
Kane o ile a bethwa sefahlegong gomme a fofela morago. Michael a latela mosepelo ge Kane a mo feta gomme a wela ka gare ga thotobolo yela Kriss a ilego a mo wišetša go yona. O ile a hemelana ge a lemoga ka botlalo gore Kane o mathateng. Kane a kitimela ka ntweng gape, a gagola dilo tšeo ge a feta.
“O nyaka thušo gabjale?” Michael a botšiša ka godimo ga modumo wa marapo a pšhatlaganywa gomme maoto a dubaganya ka didibeng tšeo di bego di gola motsotso ka motsotso. O ile a sega ka nnete ge Kane a thoma go bobola ye nngwe ya maleatlana a Syn efela a bethwa molomong pele a ka fetša seo.
“Aowa,” Kane a rora ge a tshwela madi go yo mongwe yo a mmethilego ka maatla a be a bona dinaledi. A swara seirpa sa legong la setulo seo ba se robilego ka nako ya ntwa, a se kgoromeletša ka molomong wa vamphaya ka maatla gomme la tšwelela ka morago ga molala wa yona.
Michael o ile a laetša sefahlego efela a se tsene gare. A bogela ka bokgauswi, a balela divamphaya tše tharo tše lego tlase gomme go sa šetše tše nne. Kane e be e le molwantwa wa go hloka letšhogo, le go feta pele a bolokwa a phela. Seo se ile sa gopotša Michael ka potšišo e tee yeo a sa hlwago a e botšiša gabjale: Kane o robile maleatlana a go kgoka bjang ntle le madi a molekani wa gagwe wa semoya?
Ka tlase ga metsotso ye masomepedi ka moragonyana, Kane a wa ka dikhuru. A lebelela ka letobe le lehubedi la pono ya gagwe go modumo wa go phaphatha wo o batamelago. A phumula madi molomong wa gagwe gomme a leka go ikemeletša lebatong. A sega ge seo se sa šome ka ge lebato le be le thedimoša ka madi.
“Gomme mofenyi o tla hwetša dipantetše tše lekgolo le go khutša bošego gabotse ntlong ya Michael. O ile a khunama gomme a bea letsogo la gagwe go dikologa letheka la Kane go mo thuša go emelela. Bobedi ba ya ka mo le ka mo pele ba tla ema gabotse.
“O na le ntlo?” Kane a botšiša a tshepa gore ge a ka tšwela pele go bolela a ka se idibale pele ba fihla fao. O be a tseba mo Michael a dulago, efela a sa nyake go dumela seo ka ge seo se tla gopotša Michael. O be a sa thaba gabotse ka boyena ka seo efela a kwa a nyaka go ba kgole.
“Ee, ke godile gabjale. Ntle le fao, mapokisi a bahu ke dilo tša maabane.” O ile a nyenyebala ka gare a lemoga gore Kane a ka no se nagane gore motlae wo o a segiša. “Lefelo le ke le legolo. E be e le mohuta wa museamo wa bokgabo wa setaele sa seVictoria go fihlela ge a o aga le o mpshafatša ka Beverly Hills. Mogongwe ge o ka tla go dula le nna, lefelo leo le tla kwagala bjalo ka legae.”
“Ke nyaka mpšanyana,” Kane a bolela a sa nagana mola a šeditše go bea leoto le lengwe ka pele ga le lengwe seo se dirago gore a se we.
“O nyaka eng?” Michael a botšiša.
“Ge eba re tla dula mmogo, gona ke swanetše go yo tšea mpšanyana.”
Michael o ile a myemyelela mogwera wa gagwe wa kgale. Go bonala eke lerato la gagwe la dimpša ga se le hwelele mo mengwageng ye masomesome.

Kgaolo ya 3
“Ka fao, go direga eng ka Micah?” Nick a botšiša Steven ge ba leba lefelong la go phaka la kereke gomme ba phaka magareng ga dipese tše pedi.
“Micah le Quinn ba ile ba ba le ntwa ya bona ya tlwaelo ya gore ke mang yo a dirago melao gomme Micah a tloga go yo ntšha pefelo.” Steven a araba ge a etšwa ka koloing. O be a sa nagana gore go a segiša ka ge mangau ka moka a otlela… o akantše seo… mangau. “Ijoo, ba rutane go lwa, ka fao go bethana ga se selo se segolo.”
“Gomme ke ka lebaka leo a sa boago?” Nick a bolela bjalo.
“Seo ke potšišo ga go bjalo,” Steven a goga moya. “Quinn o nagana gore Micah o tšhabile efela ke tseba bokaone.”
“Ke eng seo se dirago gore o kgolwe?” a botšiša ka go nyaka go tseba.
“Ka gore Alicia o boile gae mo dibekeng tše mmalwa pele a timelela. Micah o be a balela matšatši a gore o tla mmuša gae neng. Le ka nako ye Nathaniel a sa phela, ke Micah yo a bego a itshwara bjalo ka tate go yena. O be a ka se tsoge a tloga gabjale ka ge a boile.” A emiša magetla le go tlaleletša, “Goba o ile a akanya go tlogela lapa le, efela o be a tla tloga le yena.”
Nick a dumela ka hlogo a ipotšiša ge eba divamphaya di rwele maikarabelo a go timelela ga Micah. Ka tsela ye nngwe seo ga se kwagale e le selo se sebotse, ka fao ka lebaka la Micah Nick o be a tshepa gore Micah o lahlegetšwe ke tlhaologanyo gomme ga se a hlwa a e hwetša gabjale. O tla botšiša Alicia dipotšišonyana gosasa.
Steven a lebelela godimo go kereke ye kgolo ya dibopego tša marangrang le dihlwadieme. Ntlha ya gore e bonala eke e tšerwe Roma e bolela ka tšhelete yeo batho ba dibe bao ba e tsenago ba nago le yona. Batho ba go huma kudu ke badiradibe ba bagolo, ke ka fao ba dirago pontšho e bjalo ka sedumedi sa bona.
Nnete ke gore ke mo Meyara wa motsesetoropo a tlago go dumedišana ka seatla le go fana tšhelete le bahlakodi ka Sontaga ye nngwe le ye nngwe ka morago ga selalelo. Ka fao potšišo yeo a bego a ipotšiša yona ke gore… ke ka lebaka la eng mosetsana a be a le fa a nnoši gare ga bošego?
Kereke e be e fifetše kudu ntle le mafasetere a mmalwa ao a laetšago lesedi lebatong la bobedi. Go ya ka seo a se gopolago, seo e ka ba lefelo la dikantoro. A ipotšiša ge eba moruti yo a mo tlogetšego ka polokego ka kloseteng gabotse o dula fa. E be e le sengwe seo a sa kago a nagana go se akanya go fihla gabjale. Bakatoliki ke batho ba boikgafo bjo bogolo, ke seo a ka ba fago.
O šetše a boditše Nick ka seo se hlagilego bošegong bjo bongwe… gabotse bontši bja seo. Ga go ka tsela ye nngwe mo a ilego go bolela gape ka tiragalo ya roupo ya mošemane wa khwaere. A šikinya hlogo ya gagwe, Steven a bula lebati la ka pele a letetše gore le notletšwe efela ka manyami, la bulega
“Ga se bohlale seo,” a nyenyebala ge a goga mphaka wa boswaro bja lerapo go tšwa letsogong la hempe gomme a tsena ka gare. “O tla nagana gore ka seo se hlagilego bošego bja go feta, ba tla thoma go notlela mabati.”
“Mogongwe ke mmolelwana wa go re… go dula go butšwe ka mehla,” Steven a emiša magetla efela a tsena ka tlhokomelo. “Mogongwe moruti wa motšofadi o letetše ba bangwe.”
“Ke a boeletša, ga se bohlale bjo,” Nick a realo ka go tseba gore ga se bona dibopiwa tša go se tlwaelege fela ka mo moagong. “Ke nkgelela batho kua lebatong la ka godimo efela go na le se sengwe fa gomme ke a gononwa gore o tletše go ipobola.”
“Ke tla netefatša gore moruti o bolokegile. Ge o ka hwetša divamphaya, o hlalefe gomme o ba tlogele ba nnoši go fihlela re bitša ba go re thuša.” Steven a leba ditepising a tlogela Nick go tšea sephetho sa gagwe.
A dumela ka hlogo gomme a thoma go lebelela lebato la ka tlase la kereke. Gantši dintatauwane tše dibe… di rata lebato la ka tlase. O be a sena taba le go khuta ge a nyakišiša ka gobane lenaba le kgona go bona ka leswiswing bjalo ka yena.
A hwetša lebati la go ngwalwa ‘lebato la ka tlase’, Nick a le bula gomme a fologa ka ditepisi. A šošobanya nko go monkgo wa ditšhila, wa go thapa gomme a ethimola. Ka mehla o be a hloile mabato a ka tlase.
Steven o be a dira sa go swana le seo lebatong la godimo, a bula mabati le go hlodimela ge a feta. A bona lebone le thumašitšwe ka tlase ga lebati ka kantorong yona yela ya bošego bja go feta, ka nako ye a kokota. O be a kgona go dupelela monkgo wa go feta lebating gomme a tseba monna wa motšofadi a noši.
“Ke wena, Jewel?” lentšu la mokgalabje la kwagala.
Steven a boela morago ka pela ge lebati le bulega… yena le moruti ba lebeletšana. Sefahlego sa go tšofala sa go loka le tlhagišo ye bonolo ya fetoga ka go nanya, mahlo a gagwe a tomoga ge dipounama di bulega. Steven a ntšha seatla sa gagwe a tseba seo se tlago latela, gomme seo sa se mo nyamiše ge moruti a leka go tswalela lebati mahlong a gagwe.
A kgorometša lebati, Steven a tsena ka phapošing gomme boima bja mokgalabje bja tswalela lebati ka morago ga gagwe. A retologa, a swara sebetša seo se lego kgauswi gomme a se lahlela go selaganya phapoši ka go tenega. “Ke go boditše ka nako ya go feta, ga se nna vamphaya.”
“Ke tsogile ke le ka kloseteng.” Moruti a mo gopotša ge a gomela tesekeng. Steven a hemelana ge a bogela diatla tša mokgalabje di nyaka ka tesekeng go le molaleng gore di leka go hwetša sebetša se sengwe. A emiša ntšhi ya leihlo ge a bona menwana ya gagwe e swara go dikologa seteipolara sa boima.
“Ga ke nyake go go gobatša,” Steven a mo tsebiša. “Efela ge o sa tlogele seteipolara seo, o tla leba ka kloseteng gape.” A dumela ka hlogo ka tebogo ge monna a se tlogela ka go nanya gomme a emelela thwii, mo go sa kgonegego ge go bapetšwa le yena.
“Ke na le maikutlo a gore ga se o tle fa go ipobola.” Letšhogo le be le sa kwagala ka lentšung la mokgalabje.
“Joo Moruti, ke a tseba gore ke dirile dibe,” Steven a myemyela efela ge a bona gore motlae woo ga ba abelane ka wona a swara setulo gomme a se retolla ge a bona monna a tšutšubana ka mosepelo wo wa lebelo. O ile a nyaka go kgokološa mahlo a gagwe gomme a dula ka go phatlalatša maoto setulong, a bea matsogo a gagwe ka morago ga sona. “Seo ga o se balele bjalo ka karolo ya lebaka ka gore o sa phela? Ge nkabe ke sa go tloša tseleng, o be o ka se be ka lehlakoreng la barongwa gape.”
“Goreng o…” moruti a bonala a tšofetše le go feta ge a leba ka morago ga teseke gomme a dula fase ka boima. “Ge ke tsoga, ke ile lebatong la ka tlase ka hwetša batho ba šele ba hlwekiša. Tlhakahlakano yeo… ke ile ka khuta. Ba potlakile gomme ba homotše ka seo. O ka dira dilo tšeo ka moka?”
“O ka nkgolwa ge nka go botša gore re be re na le morongwa ka lehlakoreng la rena?” Ge monna a emiša seledu sa gagwe gomme a mo lebelela ka maatla Steven a tšwela pele, “Mogwera wa ka le nna re fa go netefatša gore kereke e sa hlwekile.”
“O nagana gore go sa na le tše dingwe?” moruti a phophola sefahlego sa gagwe.
“Ke a tseba gore go sa na le tše dintši. Potšišo ke gore, ba fa naa?” Steven a emelela ka go tseba gore ke kgale a tlogetše Nick a nnoši. Mogwera wa gagwe o tsebega ka gore ga se lefšega gomme seo sa mo dira gore a se dudišege. “Ga re nyake go ipušeletša ga tiragalo yeo ya bošego bjo bongwe.”
Moruti a mo lebelela ka sekgauswi o kare o nyakana le maaka. Mafelelong, mokgalabje a goga moya gomme a dumela ka hlogo, “Go lokile, ka lebaka le lengwe ke a go kgolwa. Ka dinako tše dingwe Modimo o šoma ka ditsela tša go makatša. Dira seo se go swanetšego.”
“Ka kholofelo, ka nako ye o ka se hwetše selo… matemone le wena le ka no se robale ge le ka tshepiša go dula fa.” A gopola seo moruti a se boletšego ge a bula lebati. “Go na le yo o mo emetšego?”
“Ee, o be a swanetše go tla fa bošego bjo bongwe, efela…” a šupa klosete ka monwana wa gagwe. “O nteleditše iri ya go feta a re o tseleng.”
Steven a kwa morethetho wa pelo ya gagwe o fofa. “Go be go na le mosetsana bošego bjo bongwe yo ke nyakago go bolela le yena… wa meriri ye mesehla, yo mobotse. A o a mo tseba?”
“Jewel?” moruti a botšiša. “Ka nnete, ke swanetše go mo nyala.”
“Eng!” Steven a bolelela godimo gomme a rora, “Go tloga neng bakgalabje ba baruti ba nyala makgarebe?”
“O hlalefile,” moruti a šikinya hlogo gomme a gatelela seo a se bolelago. “E sego nna… gape ga se taba ya gago. O tlogele ngwana yola a nnoši. O na le mathata a go lekana le dintatauwane tšeo a šetšego a di tseba. O se mo gogele ka ntweng ya matemone.”
Steven a nyenyebala a sa rate ka mo seo se kwalago. A ka petšha ka tšhelete gore moruti o be a nyaka go re digongwana e sego dintatauwane. O be a se na taba gore ke ba mohuta ofe, wo a šomanago le ona. Ba rata go dula Lesedi la Bošego ka gobane ke ye nngwe ya ditlelapo tša bošego tša maemo a godimo mo toropong. Go ba thuša go ikhutša ge bareki ba maemo a tlase ba sa fihlelele go tsena mabating.
O be a ba kitimiša ka go nanya mengwagangwaga gape ge go na le bothata, se sengwe ka mehla se be se tšwelela gomme ba tla tloga goba ba timelela saruri. Segongwana sa maIrish, segongwana sa maItalia, segongwana sa maRussia, maloko a IRA, KGB ya kgale, Yakuza, gape le maloko a kwagalago gore ke a Illuminati ye tumilego… Steven o be a sa kgathale. Ka moka ga bona ba a swana go ya ka yena. fela ka dinako tše dingwe go be go swanela gore o be le ba mmalwa ka lehlakoreng la gagwe.
“Mo lletše gomme o mmotše gore a se tle lehono bošego.” A kgoromeletša mogala kgauswi le mokgalabje gomme a phutha matsogo a mo letela go netefatša gore moruti o dira ka mo a kgopetšwego.
Mokgalabje a sesefatša dipounama tša gagwe. Ge a ka lletša legae la gagwe gomme tatagwe a araba, Jewel o tla ba bothateng bjo bogolo gomme a ikhwetša a le ka mmileng wa ka morago lefelong le lengwe. Le ge yena e le moruti go ka se mo phološe le gatee. “Ga a tle,” a bolela ka go belaela, ka morago a bušeletša ka go tiišetša ge a lebelela sešupanako sa lebotong. “O be a swanetše go ba a le fa gabjale ge nkabe a etla.”
Steven a kwa a nyamile ka go se mmone gape le kgotsofalo ya go tseba gore o bolokegile ya kwagala go gongwe ka kgareng ya gagwe. Go nyaka se ka tlošago kgopolo, a emelela a bušetša setulo morago ka mo a se hweditšego. “Ke tla boa go go tsebiša ge eba re feditše.”
“Emanyana!” moruti a bitša ge Steven a bula lebati. “Ge o ka mmona…”
“Ke tla mo romela thwii go wena,” Steven a tshepiša gomme a tšwa.
Ge a tswalela lebati, Steven a šikinya hlogo gomme a thoma go leba ka holong. Lebato leo le be le hlwekile gomme a swanelwa ke go hwetšana le Nick pele se sengwe se hlaga. Ge a eya lebatong la tlase, a lebelela gohle efela a se bone Nick kae goba kae.
“Go lokile, gabotse o ile kae?” Steven a realo gomme a thoma go lebelela ka morago ga mabati a go tswalelwa.
A hwetša lebati la lebato la ka tlasetlase le bulegile gomme a nyaka a ipethile ge a lemoga magato a monagano wa Nick. “Mafelo a go fifala, ka tlase ga mabu… JOO!”
Ge a netefatša gore o hlola lešata le le ntši, Steven a fologa ditepisi gomme a šošobanya nko ya gagwe ka phišo ya go thapa. “Akgaa go a nkga ka fa.”
A leba lebati le lengwe la go bulega gomme a tsena ka gare. Nick o be a eme ka pele ga sebidiši gomme lebati la sona le bulegile gomme a kgotla se sengwe ka mollong ka tšhipi.
“O hweditše se sengwe?” Steven a botšiša.
Ka karabo, Nick a ntšha tšhipi ka mollong e na le mašaledi a legata la hlogo le lekeletše ka mošoba wa leihlo ka mafelelong. “Ke nagana gore go bolokegile go bolela gore yo mongwe wa batho o lenaneong la batho ba timetšego gomme a ka se hwetšwe le gatee.”
“Ke nagana gore kereke ye ke lefelo la tlwaelo la ba bangwe ba dikebekwa tša selegae go dira mošomo wa bona,” Steven a hlaloša.
“Ka kerekeng ya seKatoliki?” Nick a botšiša. “Naa ga go sa na tša sedimo le gatee?”
Steven a emiša magetla, “Go swana le mmolelwana wa go re, ga go selo sa nnete ntle lehu le motšhelo.”
Nick a lahlela legata leo ka sebidišing gomme a tswalela lebati. “Ka serena, ke boya le dikatsana.”
Banna ba babedi ba goga moya ka lethabo pele Steven a boela madulong gannyane. “Go lokile, re swanetše go tšeela seo hlogong.”
Ba ahlologana, mongwe le mongwe a tsoma ka lehlakoreng la go fapana la phapoši ye kgolo go fihlela Steven a bona se sengwe ka morago ga kane ye kgolo ye tletšego mapolanka. “Hei Nick, nthuše ka se.”
Nick a leba fao gomme a thuša Steven go šutiša kane go lekana gore ba kgone go lebelela gabotse, gomme seo se be se se kgole. Thanele ya sekgoba se sennyane, e betlilwe leswikeng gomme e tsena thwii ka tlasetlase. Leswiswi e be ele la maleba gomme dikatse tše pedi di na le bothata bja go bona ka gare.
“Re tla swanelwa ke go lekola seo,” Nick a bolela gomme a leba pele go gapeletša mmele wa gagwe o mosesane go tsena ka lešobeng.
Steven a obelela le go swara letsogo la Nick gomme a šikinya hlogo ya gagwe. “Aowa, a re boele morago re tsebiše Warren le Quinn ka se re se hweditšego. Katse ya naga e tee e timeletše gomme, ka kgopolo ya ka, katse ya naga e tee ke ba bantši. Ga ke nyake go oketša lenaneo ka lengau, gape.”
“Gona ge,” Nick a myemyela gomme a kakatlela letsogo la gagwe ka maatla la Steven yo a tšhogilego. “Wena...” a nkgelela go fetiša tekanyo gomme a tšwela pele ka lentšu la go thuthumela. “O tloga o na le tlhokomelo.”
Steven ka kgakanego a kgorometša Nick, lengau la wela lebotong. “Sethotho,” a realo ge Nick a sega. “A re tloge fa.”
Ka nako yeo ba fihlago ka godimo ga ditepisi, Steven o be a kgolwa gore Nick o lahlegetše ke tlhaologanyo mogongwe mo tseleng. Kereke e be e homotše kudu gomme Steven a lebelela holo yeo e lebago kantorong ya lebato la ka godimo mo moruti a ba emetšego.
“Ema fa gannyane,” Steven a realo. “Ke swanetše go ya go bolela le moruti.”
Nick a emiša magetla gomme a ithekga ka ye nngwe ya diphilara go mo letela.
“Dumela, Steven.” Lentšu la tšwa lefeeleng.
Nick a fofa gomme Steven a goa ka makalo pele a thetšwa ke maoto a gagwe a wela fase. Nick a ponyaponya ge monna wa meriri ye meso a etšwa ka leswiswing a myemyela kudu go Steven.
“Akgaa, Dean!” Steven a goeletša ge a emelela lebatong. “Emiša go leka go ntšhošetša ka tsela yeo.”
Dean a myemyela gomme a ithekga go ye nngwe ya diphilara kgauswi le dipanka gomme a phutha matsogo kgareng ya gagwe. “Ka go hloka mahlatse ga ka swanela go leka.”
“Ntlogele hle!” Steven a rora. “Ke ya go bolela le moruti, ke tla boa.”
“O netefatše gore o bušetša roupe ya khwaere yeo o e adimilego.” Dean a mo rumula. “Ke hloile go bona mošemane wa batho a sa kgone go aparela kereke.”
Steven a tšidifala ge Dean a bolela mantšu ao gomme a retologa go lebelela yo a welego.
“Roupo ya khwaere?” Nick a botšiša gomme a emišetša dintšhi tša leihlo go ka fihla go mothaladi wa moriri wa gagwe. “O apara roupo ya khwaere?”
“Ke ile ka fetoga, e be e le tšhoganetšo. Ke ile ka swanelwa ke go phološa mosetsana gore a se gogwe madi ke vamphaya ya setlaela,” Steven a itšhireletša.
“Ijoo,” Dean a realo. “Mosetsana yena yola o ilego wa bethwa marago ka pele ga gagwe.”
“O kare wena ga senke o bethwe marago,” Steven a iphetolela.
Dean a ema gomme a nagana ka motsotswana. “Aowa, ga senke ka bethwa marago efela a ile a tulwa.”
“Akgaa!” Steven a rora, a betša matsogo moyeng gomme a leba holong ye nngwe.
Nick a lebelela Dean, “O na le kakanyo ya gore o utile roupo kae?”
“Ka tlase ga mpete wa gagwe,” Dean a araba.
Nick a myemyela, “Ke setlabelo se sebotse sa pipamolomo, ke a leboga.”
“Ke nnete, nka rata go mmona a llanyana… seo gape o bonala a nagana gore ke ile go mo raga marago ka mehla goba se sengwe.”
“O rata ge bangwe ba ekwa bohloko,” Nick a realo ka myemyelo.
“Ke nna yo a welego,” Dean a realo. “Ga re na tše dintši tšeo di ka re thabišago.”
Steven a leba lebating la kantoro ya moruti gomme a emiša seatla sa gagwe go kokota ge a ekwa mantšu ka thoko tše dingwe. Leo a le lemogilego ke la moruti, le lengwe ke la mosadi. A iša seatla fase, a gatelela tsebe ya gagwe kgauswi le lebati gore a kgone go theeletša.
Jewel o be a eya fase le godimo a leka go nepiša efela go le boima. Sa mathomo seo se tlilego monaganong wa gagwe ge a tsena ka kantorong ke ge a hlaselwa ke divamphaya gomme a bona monna ka lepono goba mofetogi… goba seo a lego sona. O sa tšo fetša metsotso ye mehlano a araba dipotšišo tša moruti ka ga bošego bjola bjo bongwe efela gabjale o na le mathata a magolo a go feta ao.
“Ga wa swanela go khukhuna gare ga bošego,” moruti a realo. “Go kotsi. Go tla ba bjang ge tatago goba yo o nyalanago le yena a ka go swara?”
Jewel a leba tesekeng ya gagwe thwii gomme a bethantšha legoswi la gagwe go yona. “Aowa, ke bona ba dirago gore go be kotsi… ke tšwa ka lefasetere le go khukhuna ge ke feta baletakgoro ba go itlhama bao ba ntirilego mogolegwa gape le go khukhuna ke boela morago ntle le go swarwa.”
“Tatago o leka go go šireletša.” A leka go iša matswalo a gagwe fase efela a tseba gore seo a se bolelago ke nnete. Tatagwe o be a etla fa beke ye nngwe le ye nngwe go ipobola… a hlapa madi matsogong a gagwe le letswalong la gagwe.
“Aowa, o leka go nkgapeletša go nyalana le modirišani wa gagwe wa kgwebo go lefela mokitlana! Mokitlana wo o sa nkamego. Naa ga go na molao kgahlanong le bokgoba ka nageng ye?”
“Efela ge wena le Anthony ge le etla fa kopanong, o rile o a mo rata ka pelo ya gago ka moka.” Moruta a šupa seo. “Seo ga se mohuta wa selo seo o swanetšego go bolela maaka ka sona. Ke kgobošo mahlong a Modimo.”
“Ee gabotse, baletakgoro ba be ba eme ka morago ga ditulo… O sa ba gopola? Wa ka morago ga ka o be a nkgotla ka boswarelelo bja sethunya ka mokokotlong wa ka. Nka se tsoge ke ratile setlaela sa go šomiša maatla sa go ikgantšha sa go swana le Anthony. O ntshepišitše go mpolaya le tate ge nka se tsenele lenyalo le. Gomme lehono bošego, ge ke leka go botša tate gore ga ke nyake selo sa go amana le Anthony, o mpethile ka maatla gomme gabjale ke tseba mo dinaledi di lego, ka gobane nka kgona go di balela.”
Jewel le moruti ba ile ba tšhoga ka bobedi ge lebati la kantoro le bulega ka maatla gomme la betha leboto le go dira gore diswantšho tše mmalwa le sefapano sa go pentwa ka gauta di wele fase.
Steven a ema monyako a ba lebelela ka bobedi. Efela, go teteana ga madi ga go fifala lerameng la Jewel gwa dira Steven a bone bohubedu. “Bobedi bja lena le swanetše go tloga le nna.”
Dikhuru tša Jewel tša ba bokoa ge a bona monna yo wa go makatša a sa phela. O be a nagana ka yena gore o bolailwe ke divamphaya makga a mmalwa go tloga mola a mo tšhabelago. Makga a mmalwa o ile a ba a itshola ge a be a rothiša dikeledi. Gabjale ka ge a be a kgona go hema gabonolo, o be a nyaka go goeletša.
Goreng ka mehla ge a etla go bolela le moruti ka sephiring, go eba le tšhoganetšo? O be a sa tšhoše ke mofetogi yo le gannyane go feta monyalani wa gagwe wa go dula a swere sethunya gomme go fihlela a ekwa ditemošo tša mollo goba a bona sefahlego sa meno a matelele, ga a ye felo.
“E sego ka nako ye,” Jewel a mo tsebiša a phutha matsogo a gagwe kgareng ya gagwe.
“Nka se no tloga kerekeng e sena mohlokomedi,” mokgalabje a realo efela Steven a mo kgaola ka pejana.
A tšea dikgato tša maikemišetšo a batamela kgauswi le teseke ge a bolela, “O dilrile kwano le sathane gomme o akantše go fepa divamphaya ka pheriši ya gago? Ke wena yo a fišago ditopo tša bona ka phapošing ya sebidiši?” Ge moruti a bula molomo wa gagwe a sa bolele selo Steven a tšwela pele, “Goba ke badiradibe ba o ba rerelago bao ba hlotšego dipolao ka bontši kua lebatong la tlasetlase le go epa thanele ya go tšhaba?”
“Joo nna wee,” mokgalabje a fa Steven tebelelo ye mpe. “Ge ke tloga kerekeng, go tla tšea nako ye kaakang go fihlela ke boa?”
“Mphe nomoro ya sellathekeng sa gago. Ke tla go lletša mo diiring tše mmalwa. O se boye go fihlela re lokiša tšohle.” A goga moya ka tsebo ya gore o fentše ngangišano ge mokgalabje a thoma go phophola ka diterowareng tša gagwe go hwetša dilo tšeo a ukamago gore di bohlokwa kudu go ka tloga le tšona.
Jewel a leka go itshwara mola a hlohlomiša tsela ya gagwe ya go leba lebating leo le sa bulegilego. Tokologo… goreng a dula a ikhwetša a tšhaba banna ba digaswi?
“O se ntire gore ke go kitimiše,” Steven a lomantšha meno a gagwe ge a retollela hlogo ya gagwe ka thoko gomme a kopanya mahlo a gagwe le yena. “Ke rile a ka ya gae… e sego wena.”
Dipounama tša Jewel tša bulega ge a tšidifala mosepelong wa gagwe. Ke yena mang yo a ka mo fago taelo? A lomantšha meno ge a lemoga gore o mo obametše. A emiša seledu sa gagwe ka ntwa ge a tšea sephetho. Ka nako yeo a ka kgonago go tšhaba… o tla tšwela pele le go tšhaba… go bona ka moka, go akaretšwa tatagwe.
“O ile go dira eng ka yena?” moruti a botšiša ka pefelo.
“Ke ile go dira seo o sa kgonego go se dira… go mo šireletša,” Steven a goeletša a sa nyake go lwa ka seo. Go teteana ga madi sefahlegong sa Jewel go hlakahlakantšhitše megalatšhika ya gagwe ka nnete gomme go ka se kgonege ge eba o ile go mo romela morago go monna yo a dirilego seo.
“Ga ke nyake mošireletši,” Jewel a retologa gore a tloge efela a ema ka pela ge a bona banna ba babedi ba go bonala ba le kotsi ba thibile monyako.
Dean o ile a kwa go ngangega ga monagano ga Steven kua tlase ditepising gomme gabjale o be a lebeletše mosetsana yo a hlolago seo, o bone a kgona go bona lebaka la seo. Ge a bala semoya sa gagwe, a swara tebelelo ye fetago ya morongwa wa lehu ye sa bonalego gabotse.
“O fošitše.” A sepela ka lebelo, le bafetogi ba babedi ka phapošing ba se bone selo. “O nyaka mošireletši.”
Jewel a nyaka go goeletša ge seatla sa monna se mo gatelela lerameng leo le lego bohloko gomme mahlo a gagwe a fetoga a ba le mmala wa mekhuri. Seatla seo sa go tonya seo se bego se mo swareletše pelong ka menwana ya go tonya lebaka le letelele sa nyaoga. Ka bjako, a gopotšwa ka maikutlo ao a lebetšego gore a gona… borutho, polokego… lerato.
Moruti a ithekga ka teseke ya gagwe ge moriti wa maphego o fofa go tšwa ka morago ga monna, a phadima gabotse kudu, ka morago a timelela.
“Ke tla ba kua lebatong la tlase,” Dean a realo ge phefo e fokela ka gare le go tlatša sekgoba seo a timeletšego go sona.
Steven ga a tsebe gore ke ka lebaka la eng Dean a kgethile motsotso wo go utulla maatla a gagwe efela o be a thabile ge yo a welego a dirile seo. Lerama la Jewel le be le fodile gomme moruti a bonala eke o bone lesedi.
“Re swanetše go tloga… gona bjale,” Nick a bolela a le monyakong.
Steven a swara seatla sa Jewel gomme a thoma go leba lebating, a thabišwa ke gore letšhogo le tlošitše ntwa go yena ka nako yeo.
“Emanyana,” moruti a bitša, a dira gore Steven le Nick ba eme ba mo lebelele. “Ke eng seo…?” a realo, a šupa lefelo leo Dean a bego a eme go lona pejana.
Steven a myemyela ka nnete ka lethabo ka mahlong a moruti. “Ee… go bjalo.”
Moruti a myemyela ge Steven le Nick ba tloga ka phapošing le Jewel a ba šetše morago. A dumela ka hlogo gatee gomme a thoma go kgoboketša didirišwa tšeo a di nyakago. Ka kgopolong ya gagwe, Modimo o beakanya lefase go tlo boa ga Gagwe.
Steven le Nick ba tšwa ka kerekeng efela Steven a goga Jewel gore a eme gore a lebelele lefasetere la kantoro. A goga moya wa kimologo ge a bona lebone la kantoro le timilwe.
“Go bonala mokgalabje a tšere keletšo ya rena,” Nick a realo.
Steven a šikinya hlogo, “Go swana le gore o bone Dean seo e lego sona gomme o na le maitemogelo a mohuta wa sedumedi. O mphile nomoro ya mogala wa gagwe. Ke tla mo lletša ge tšohle di lokile.”
“Ga ke nagane gore diiri tše mmalwa di tla lekana,” Nick a mo tsebiša.
“Ke seo e lego sona.” Steven a araba. “Gabjale, a re boeleng morago tlelapong gore re tsebiše Warren le Quinn ka ditaba tše.”
Dean o be a dutše hlakeng ya kereke gomme a myemyela ge a bona boraro bo tloga kerekeng ka sa ka nthago. O file Nick thušo ye a e hlokago efela maleatlana a go thoba maswafo a mosetsana a ka se kgotlelele sebaka. O be a ekwa leswiswi ka tlase ga moago le thoma go gola ge divamphaya di thoma go tšwelela thaneleng ya bona.
Go se swane le bale ba bošego bjo bongwe, bao ba be ba šušumetšwa ke se sengwe sa go fifala kudu, sa kotsi kudu, seo Dean a sa kago a kopana le sona.
Dean a nyenyebala a ipotšiša gore ke ka lebaka la eng a se a kwa seo ge ba hlwekiša sehlopha sa mathomo seo se bego se dula fao. Tšhušumetšo e be e le ya kgale kudu gomme e na le maatla a mantši. Ka bjako ge a sena go kwa seo, leswiswi la apoga gomme ya ba fela go ba gona ga divamphaya mo a go kwago.
Yo a welego a hwetša phihlelelo gape ya go ya ka kerekeng go lekola mokgalabje le go netefatša gore o tšwele a phela.

Kgaolo ya 4
Trevor le Kat ba lotile vamphaya yeo ba e utulotšego mo gare ga motsesetoropo.
“Gabotse o dira eng?” Kat a hebahebetša, a thoma go gononwa.
“Go bonala eke o ya go reka,” Trevor a araba ge vamphaya e ema ka pele ga lefasetere la lebenkele gomme a lebelela go taetšo ya go fifala.
Vamphaya ye ke ye nnyane, e kaba le mengwaga ye lesomeseswai go ya ka mo a bonalago. O na le meriri ye meso ya thwii gomme o apere digalase tša mahlo tša rimo ya nkgokolo. Ka ge meriri ya gagwe a e gogetše morago, a ka bonala a hlomphega kudu ntle le letlalo le lesehla kudu.
Ka bobedi ba akgofa ge vamphaya ka bjako e retologa lefaseteremg gomme ya thoma go leba tlase ga mmila gape. Le ge mabenkele a tswaletšwe, ditsejana tša ka thoko di be di tletše batho ka nako ye ya bošego.
Ba hwetša setopo sa motšwasehlabelo wa mafelelo se robetše godimo ga bjang bja go hlokomelwa kudu. Ka dikwi tša bona tša go nkgelela, ba ile ba kgona go lota mohlala wa senwamadi ge vamphaya e fihla Rodeo Drive. Go tloga fao, Trevor o ile swanelwa ke go swarelela Kat gannyane le go mo hlalošetša gore go na le batho ba bantši go dikologa fao le gore ba ka se no kitima felafela.
Gabjale, ba fihlile fa, ba latela vamphaya ka maoto gomme ba sa boledišane. Sa go latela seo ba se tsebago, ba be ba le ka gare ga pese ya motsesetoropo ba sa šetše le gore eya kae. Mafelelong, vamphaya e ile ya obelela ya goga lerala gore e fologe. Kat le Trevor ba ya go boemapese bja go latela gomme ba fologa pele ba thoma nyakišišo ya bona. Vamphaya ya tšwela pele go sepela gomme Kat a rora ka kgakanego.
“Ke thoma go nagana gore vamphaya e tšea diokobatši. Re šetše re dirile leboyo la go felela.” A ngongorega. “Re no ba bokgole bja dipoloko tše mmalwa go tšwa tlelapong.”
“Bona mo a lebago!” Trevor a realo gomme a kitimela mmileng wa ka morago mo vamphaya e nyameletšego ka bjako.
Diteki tša Trevor di be di dira lešata ge a fihla molomong wa mmila wa ka morago gomme a hlodimela fao. Kat o be a le ka thoko ga gagwe, a boetše fase gannyane gore ba kgone go hlodimela go dikologa sekhutlo.
“Akgaa,” Trevor a rogana gomme a ntšha sethunya sa 9mm sa gagwe.
“Ga ke kwešiše gore ke ka lebaka la eng o swara sethunya,” Kat a realo le ge a tseba gore le Nick o a se swara. Ga se sethunya seo Nick a se tshepilego… ke seo se dirilwego ka go kgethega sa dipulete tša legong tšeo di loketšwego go sona. “Dilo tšeo ga di šome go divamphaya.”
Trevor a myemyela, “O lebala gore ke šomela mang. Dipulete tše di akanyeditšwe ka go kgethega go thuthupa ge di thuntšha go lešoba leo le phuntšwego gomme tša tlatšwa ka esiti ya muriatic. Gomme seo se tla ja se sengwe le sengwe.”
“Goreng esiti e sa je pulete gona?” Kat a botšiša, a kgoboketša tshedimošo ka sephiri go ba pipamolomo go Nick ka yona.
“Go na le go agelelwa ka gare ga pulete ge e phunywa gore esiti e se e je. Ke lebetše leina la yona ka sebaka se.” Trevor a hlaloša. “E tiile kudu gore e se senywe ke esiti efela e bonolo kudu go pšhatlega ge e thulana le se sengwe.”
Kat a emelela ka go nanya thwii, “Re ka tsena?”
Trevor a tiišetsa tshwaro ya gagwe sethunyeng gomme a tsena pele, a latelwa ke Kat ka mphaka wa legare la bogale ka seatleng se sengwe le se sengwe; ditebogo go Trevor. Ba ile ba tsoma mmila wa ka morago ka botlalo pele ba lemoga gore vamphaya e nyameletše.
Trevor a letefatša boemo bja gagwe gomme a iša letsogo la sethunya fase. “O ile!”
Kat a ntšha moya wa kgakanego, “Gabotse, ka ge re be re batametše, gona a re boele tlelapong.”
“Boipshino bjo ke bilego le bjona bošegong bjo ke etile pele ditlaela tše pedi gohle mo motsesetoropong,” lentšu la bolela ka morago ga bona. “Ke swanetše go gapeletša gore le emele matena.”
Kat le Trevor ba retologela go lentšu gomme ba tšdifala ge ba bona vamphaya yeo ba bego ba e lota e na le ba bangwe ba bahlano.
“Ngwana wa moloi o be a tseba gore re mo šetše morago,” Trevor a rora ge a bušetša sethunya madulong gomme a se lokiša.
Ka maboto ka mahlakoreng a mararo gomme divamphaya di le ka pele ga bona, Kat o be a tseba gore Trevor o tla lwantšha tsela ya bona ya go tšwa fa. O ile khunamela tlase ge vamphaya e ba batamela ka potlako. Ye nngwe ya meriri ya bohubedi bja mollo ya fofa gore e wele go bona, ka nnete.
Kat ka potlalo a ya godimo go tšwa go khunameng ga gagwe gomme a hlasela vamphaya moyeng. Manala a gagwe a swana le dinala le ge e le gore ga se a fetoge. Ba wela fase vamphaya e wele ka mokokotlo ka tlase ga gagwe.
Senwamadi sa swara lenakaila la gagwe la magoja ka go tiiša, a kwa marapo a thoma go šilana mmogo gabohloko. Ge a metša sehlabi seo, a nyopaganya lenakaila la gagwe go ya tlase, a hlaba lenakaila la vamphaya ka mphaka bjalo ka pušeletšo. Ge a hwetša tokologo ya gagwe, Kat a se senye nako gomme a hlaba kgara ya ntatauwane ka letsogo la magoja gomme a ntšha pelo ya gagwe.
Trevor o ile a lebantšha le go thuntšha vamphaya yeo ba bego ba e lota bošego ka moka. Pulete ya betha sebopiwa mogolong gomme, ka motsotswana, a no lebelela Trevor ka tlhagišo ya go se kgolwe pele a thoma go goeletša le go tsenya dinala molaleng wa gagwe. Lešata la kgaotšwa ka bjako ge esiti ye lokolotšwego ka puleteng e fihlelela lepokisi la lentšu la vamphaya.
Trevor ga se a bone seo se hlagilego gabotse ka ge a ile a hlaselwa ke vamphaya ye nngwe. Mmele wa gagwe wa beletšwa lebotong la mmila wa ka morago mo a thedimogetšego fase. 9mm ya gagwe ya fofa ge a leka go se bale dinaledi tšeo di hlamegago ponong ya gagwe. Vamphaya ye nngwe ya batamela ge Trevor a ekwa se sengwe leotong la gagwe. Ge a lebelela tlase, a bona hlogo ya vamphaya yeo a e thuntšhitšego gomme a e oblelela.
A swara hlogo yeo e kgaogilego ka meriri, Trevor a beletša selo seo se kgaogilego go senwamadi seo se tlago. Sebopiwa sa e efoga gomme sa mo ntšhetša meno, se ikemišeditše go mo hlasela. Selo se sengwe sa go phadima sa kgadima ponong ya gagwe gomme Trevor a bona mphaka o etšwa ka kgareng ya yona. Ge a retolla hlogo, Trevor a bona Kat a eme fao a bonala bjalo ka tlhakahlakano ya madi.
“Hlokomela!” Trevor a goeletša.
Kat a emiša mphaka o mongwe gomme a felelwa ke moya ge vamphaya e swara seatla sa gagwe le go lebiša legare fase ka areka, e lebile thwii bogareng bja serope sa gagwe. Bohloko fela bja mo fa maatla a go kgoromeletša vamphaya kgakala. A katakata ka santhago go ya go Trevor gomme a kgona go ntšhetša mphaka ka ntle ga serope sa gagwe. Seela sa borutho sa latela ka pejana se dira tsela ya go leba tlase leotong la gagwe.
Trevor a tseba gore se sengwe se swanetše go dirwa. Ka bobedi ba be ba gobetše gabjale. O be a ekwa sehlabi dithapeng tša gagwe le legetleng mo a thutšego leboto gomme go le boima go hema. Ge a lebelela Kat, yo a bego a eme ka tšhireletšo ka pele ga gagwe, a nagana ka mosepelo wa go latela.
O swanetše go fetogela go selo se sengwe se segolo kudu sa maatla a go lekana go lwa le bona gomme ba phele. Bothata ke gore ge a ka fetoga, o tla utulla tlhago ya gagwe ya nnete go Kat. Mohuta wa gagwe o be o sa kwane le merafe ye mengwe ya bafetogi ka lebaka la go fapana ga bona. Ba kgona go tswakana le dihlopha tše dingwe gomme ba timelela ntle le go hwetšwa, ka dinako tše dingwe mengwaga ye masomesome ka nako. E be e le dibetša tša maleba ntweng.
Ka lebaka la seo, phoofolo efe goba efe yeo a e kgethago ka mehla eba le maatla a go feta makga a lesome a phoofolo yeo e itšego. Ka sebopego sa bomotho melao yeo e a šoma, efela ga se e ba thuše go fihla gabjale. Efela, ge a ka se fetoge, ba ile go ba bolaya.
Ka bjako Kat a lahla sebetša sa gagwe gomme a khunama. Ka lebaka la dikgobalo tša gagwe, phetogo e be e nanya ka metsotswana go feta ka tlwaelo. Mmele wa gagwe wa fetoga go fihlela a ema ka a mane. Diaparo tša wa mmeleng wa gagwe gomme bosehla bjo bobotse le boya bja marontho a maso a bonagala.
Ye nngwe ya divamphaya tša go šala ya hlasela gomme Kat a emelela ka maoto a morago, a mo thibela ka go mo swara ba katana. Dinala tša gagwe tša tsenelela magetleng a sebopiwa gomme meno a gagwe a matelele a mo loma. Ntle le go nagana gabedi, Trevor a kgetha motsotso wo go fetoga.
Divamphaya tše pedi tša go šala tša goa ka pefelo ge batho bao ba bego ba ba fenya ba fetoga go ba dibera tša Kodiac. Trevor a hwidinya borofa bjo bogolo go wa kgauswi gomme a ngwathaganya bogare bja mmele wa gagwe, a tlogela maoto a ewa a hloka bophelo. Ka go tseba gore vamphaya ga se e hwe, Trevor a e leba gomme a pšhatlaganya hlogo ya yona ka mehlagare ya gagwe ye maatla.
O ile a emelela ka maoto a gagwe go thuša Kat ge divamphaya tše pedi tša mafelelo di mo hlasela ka maatla a magolo. Trevor a katakatela morago ka dikgato tše mmalwa pele a rora ka lešata gomme a goga yo mongwe, a mo lahlela fase mmileng. A rora gape ge wa mafelelo a tsenya meno a gagwe lerapong la legetla. A kwa lengau le goeletša gomme a kwa leboto la ditena le wela ka thoko ga hlogo ya gagwe pele a wela fase ka boima bjo.

*****

Quinn le Warren ba tsomile lefelo ka moka ka ratiase ya dimaele tše hlano go tloga tlelapong.
“Ga go selo go dikologa fa.” Quinn a realo gomme a leka go tloša kgakanego ya gagwe. Se sengwe ga se maleba… o be ekwa seo moyeng.
Warren a kwa go kitlelana ga lentšu la Quinn. “Ka morago ga ntwa kua ntlong ya bobolokelo, seo ga se mmakatše.” Mogala wa gagwe wa lla gomme wa dira gore banna ka bobedi ba fofe le go lemoga ka mo ba gategilego ka gona. A ntšha sellathekeng ka morabeng wa ditšene.
“Dumela,” Warren a realo sellathekeng gomme a dumela ka hlogo ka morago ga motsotswana. “Go lokile, re tla ya go lekola.” A tima mogala gomme a o bušetša ka morabeng wa gagwe. “E be e le Nick, go bonala ba hweditše thanele ya ka tlase ga mabu ka tlase ga kereke.”
“Re swanetše go yo lekola seo,” Quinn a realo a leka go hlokomologa taba ya gore letlalo la gagwe le tletše ka ngangego gomme ga a na sešupo sa gore e tšwa kae.
Go goa go tsebagalago ga lengau gwa hlabeletša bošegong bjo homotšego le go dira gore banna ka bobedi ba tšidifale mesepelong ya bona. Ba retollela dihlogo ka lehlakoreng la modumo pele ba lebeletšana.
“Kat!” ba realo ka bobedi.
Warren ka bjako a tloša sellathekeng ka morabeng wa gagwe gomme a o bea go holesetara ya elasitiki go dikologa kgokgoilane ya gagwe.
Ba se dikadike gomme ka morago ga metsotswana ye mmalwa banna ba babedi ba fetoga gomme ba kitimela tlase mmileng. Batho ba be ba goeletša le go tšhaba dikatse tše pedi tše dikgolo, ba hlola tlhakahlakano ye kgolo. Quinn a eta pele le go kitimela ka sephethephetheng a hlola gore koloi e letše diporiki. Koloi ya ka morago ya thula ya mathomo ka morago, gwa hlolega ditiragalo tša tatelano.
Warren a fofela poneteng ya koloi ya mathomo le go lebelela go netefatša gore batho ga se ba gobale pele a kitimiša Quinn go seleganya mmila.
Mootledi wa koloi o be a tšhošitšwe ke seo se sa tšwago go hlaga gomme a topa sellathekeng sa gagwe.

*****

Jason o be a jewa ke bodutu kudu. Ga go seo se hlagilego mo matšatšing a mmalwa a go feta gape ka ge Tabby a sego toropong, o be a ekwa a gafa.
Ge mogala o lla a nyaka go fofela ka ntle ga letlalo la gagwe gomme a o obelela go araba.
“Setiši sa marentšara,” Jason a realo ka lentšu la bodutwana.
“Ee,” lentšu la go thothomela la araba. “Ke nyaka go bega selo se sengwe sa go se tlwaelege.”
Jason a goga moya ka monagano gomme a swara pene le pampiri. “Go lokile, mpotše selo o se bonego, morena.”
“Selo sa go makatša seo ke sa kago ka se bona,” monna a realo a hemelana. “Ke sa tšwa go bona katse ya naga le lengau di kitima gohle ka gare ga toropo. Ka letša diporiki ge katse ya naga e kitima ka pele ga ka gomme lengau la bonagala poneteng ya ka, la ntebelela, gomme la kitimiša katse ya naga.”
“Di swanetše go ba di ngwegile lešokeng la diphoofolo,” Jason a realo, le ge e le gore seo ke maaka ao ba a botšago setšhaba go khutiša taba ya gore motsesetoropo o bonala o tsenetšwe ke diphoofolo tša naga tša kotsi matšatši a.
“Aowa,” monna a bolela. “Lengau le be le na sellathekeng se bofeletšwe kgokgoilaneng ya morago.”
Jason a lebelela lerentšara le lengwe ka kantorong le yena, Jacob Savage.
“Ka fao o re lengau le be le na le sellathekeng se bofeletšwe leotong la lona?” Jason a botšiša.
Jacob a nyaka a kgamile ke kofi ya gagwe gomme a bea komiki fase, a phumula nko ya gagwe go laetša gore seela se sengwe se ile godimo go yona.
“Ke sona seo ke se bolelago!” Monna a goeletša ka maatla gomme le Jacob a kgona go mo kwa.
Jason a dumela ka hlogo, “Go lokile morena, iša matswalo fase. O re le kitimile, ka fao o bolokegile. Re leboga ge o leditše, re tla hlokomela seo.”
Jason a tima mogala ka potlako gomme a o lebelela mtsotswana o kare sedirišwa se tla fofa gomme sa mo ja.
“Go lokile gona,” Jacob a realo ka morago ga go ntšha sehuba mogolong.

*****

Warren mafelelong a swara Quinn ge ba batamela mmila wa ka morago mo monkgo wa Kat o lego bogale. Ge ba dikologa sekhutlo, ba fihla ka nako go hlatsela ge Kat a kgaola molala wa vamphaya ye nngwe gomme bera ye kgolo e betha ye nngwe kgareng ka dinala tše dikgolo. Lenala la bera la tšwelela ka mokokotlong wa vamphaya, a swere pelo ya vamphaya a e pinyeletša go swana le paluni ya meetse.
Kat a ponyaponya, a lemoga gore ka tsela ye nngwe ka nako ya ntwa divamphaya di ile tša atafala… divamphaya di atafetše. O be a sena nako ya go goga moya pele a hlaselwa ke ye nngwe ya divamphaya tša go šala. O ile a lokolla kgoeletšo ya sephoofolo ge meno a matelele a bogale a tsena ka thoko ga gagwe. Dinala tša gagwe tša hlaba mokokotlo wa vamphaya yeo e lekago go mo hlasela. Ka bjako, boima bja godimo ga gagwe bja tloga gomme a wa, a idibala ka bohloko, go lahlegelwa ke madi, le go lapa.
Quinn a bona vamphaya e hlasela Kat gomme a kwa pefelo e hlamega ka kgareng ya gagwe. O ile a kitimela tlase mmileng wa ka morago a sa kgathale ge eba Warren o na le yena goba aowa. A wišetša vamphata fase, a e ngwapa sefahlegong ntle le lešoko pele a e kgaola molala ka meno a bogale a gagwe. O be a ekwa dinala tša yona di mo epa ka tlalelo efela o be a sa kgathale ka ge a be a tšwela pele go e kgaola. A kgoromeletša hlogo ka thoko, a retologela go Kat gomme a rora.
Trevor a dira mošomo o mokopana ka vamphaya ya mafelelo, a e kgaola ka bogare go fihlela go sa šale selo efela setopo sa go hloka hlogo, le mmele. A lebelela godimo ge a ekwa kgoeletšo ya Kat gomme a bona katse ya naga e betha vamphaya ya go mo hlasela. Ge a boela go sebopego sa bomotho, Trevor a šuta le go ema mmeleng wa gagwe wa lepono wa go idibala, a khunamela fase go mo šireletša go tlhaselo ye nngwe.
Go rora ka maatla gwa goga šedi ya gagwe gomme a kopana le tebelelo ya katse ya naga ya go befelwa e mo lebile ka maikemišetšo a go bolaya… Quinn Wilder.
A ikemišeditše go lwa, gomme Trevor o be a lapile gomme seo sa dira gore go ikarabela ga gagwe go nanye. O be a sa kgone go kgorometša Quinn gomme a tšea maatla a magolo ka lehlakoreng. Trevor a bethantšhwa go selaganya mmila gomme a wela lebotong la ditena la bobedi bošegong bjoo.
Trevor a rora gomme a kgona go ema ka maoto a morago mo go palomoka ya metsotswana ye mebedi pele a ithekga gomme a thedimogela fase mabung. Quinn o be a batamela efela a sa nyake go fetoga ka pele ga katse ya naga efela a tseba gore o swanetše go dira seo. Kat mafelelong o tla mmotša… ka fao o tla lahlegelwa ke eng? Ka ge a sa kgone go bona dintho tša gagwe ka tlase ga boya, a fetoga ka go nanya gomme a leka gape go emelela ka maoto a gagwe.
Quinn a emanyana ge a bona monna wa motho wa go tšwa ka pareng… Warren o rile ke Trevor. A hebahebetša ka dikwi tša go nkgelela tša gagwe tšeo di mmoditšego gore Trevor ga se mofetogi wa tlwaelo… goba mohuta ofe goba ofe wo a ilego a kopana le ona. Go se tsebe gore o gahlane le eng gwa se iše matswalo a gagwe fase.
A tšea kgato ye nngwe ya go ya pele efela Warren a ema ka pele ga tebelelo ya gagwe ge a leba Trevor, a fetogela go sebopego sa bomotho ge a dira bjalo. Ge Trevor a tekateka, Warren a mo swara ka letsogo gomme a mmeya legetleng la gagwe. O be a sa bone lebaka la gore Quinn a rage monna mola a šetše a le fase.
Trevor a lebelea Warren gomme a myemyela ge a lemoga seemo sa bona. “Tlhakahlakano ye botse, gabjale ka moka re ka mapono,” a ngunanguna gomme ka bjako a idibala.
Warren a šikinya hlogo gomme a se itshware efela a myemyela ka gobane Trevor o be a bolela nnete. Ke dinako tša go swana le tšeo ke mo a thabišwago ke go tla le sellathekeng sa gagwe le go se rwala ka tsela yeo a dirilego ka gona. O ile a bea Trevor lebotong ka boleta gomme a re o tšea sellathekeng sa gagwe ge a kwa Quinn a thoma go rora.
Quinn o fetogetše go sebopego sa bomotho gomme o lebeletše sebopego sa Kat sa go idibala. Diaparo tša gagwe di be le bokgole bja dikgato tše mmalwa go bona, di gagotšwe ke go fetoga ga gagwe gomme di ka se aparege. A akanya ka go nagana ka seo moragonyana, Quinn a thoma go hlahloba dintho tša gagwe ge a bona madi a sa tšwa bokagareng bja serope sa gagwe.
Ge a šutiša leoto la gagwe gore a kgone go hlahloba mo madi a tšwago, a tšidifala ge a bona leswao la molekani wa thobalano. Go rora gwa tsoga mogolong wa gagwe pele a ka go emiša. go na le yo a ikopantšego le Kat, a mo fa leswao gomme a mo tlogela.
Quinn a kwa mona o hlamega ka garegare gomme a batamela kgauswi go dupelela letlalo la gagwe ge eba go monkgo wo o sa šetšego. Seo se ile sa mmefediša le go feta… o be a sa nkge go swana le monna yo mongwe, o be a nkga bosana.
Ge a lebelela monna yo mongwe yo Warren a mo okametšego, Quinn a ipotšiša ge eba leswao la molekani wa thobalano o le filwe ke mofetogi wa bera yo mosehlana.
Warren a ntšha sellathekeng gomme a akanya go hlokomologa go itetša ga Quinn lebakanyana. Kat o nyaka thušo gomme o be a sa nyake go botša Quinn gore leswao la molekani wa thobalano ke la mang. E re a ye diheleng go hwetša seo ka boyena.
“Mdi. Tully?” Warren a botšiša gomme a myemyela. “Ke gabotse mohumagadi. Ke kgopela gore re kopane kua go Mmino wa Ngwedi. Sesi wa ka le mogwera wa gagwe Trevor ba gobaditšwe gomme ba tsoma tlhokomelo ya kalafo yeo wena fela o ka e abago.”
Warren o ile a homola lebakanyana gomme a dumela ka hlogo, “Ke a leboga, Mdi. Tully.”
“Ke be ke sa tsebe gore o tseba Tully.” Quinn a realo ka lentšu la tlase. O kopane le Tully ka morago ga gore malapa a ahlologane.
Warren a myemyela ge a lletša nomoro ye nngwe. Naa Quinn o nagana gore ke yena fela yo a dumeletšwego go ba tlhodi? “Nick o tsene mathateng a mantši go feta ka mo a gopolago. Mdi. Tully ka mehla o be a mo lokiša gomme legae la gagwe le butšwe ge re nyaka go timelela gannyane.”
“Ke a makala ge re sa kopama pele ga fa.” Quinn a araba gomme a thoma go gonona gannyane.
“Nick, re mmileng wa ka morago mo dipolokong tše lesome ka bodikela bja tlelapo gomme re tsoma senamelwa. Etla le diaparo tša banna ba bararo, sesi wa gago, gomme o otlele Hummer.” Warren a tima mogala ntle le go emela Nick gore a arabe gomme a retologela go Trevor.
“Ke yena yo a filego Kat leswao la molekani wa thobalano?” Quinn a botšiša.
“Seo, mogwera wa ka, ga se kanegelo ya ka yeo nka e anegago.” Warren a realo ka kgegeo.

Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию (https://www.litres.ru/pages/biblio_book/?art=66740998) на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.