Главная страница | Современная русская литература | Ежимила – Лопавелень инязоравине

Ежимила – Лопавелень инязоравине
Елена Николаевна Шилова
Повесть-ёвкс видечинь вечкиця ды видестэ свал теиця чевте седей Ежимила сеель-тейтернеде. Чачома пичевирест паломадо мейле сон тетянзо-аванзо ды вишка ялакскензэ марто юты эрямо лопав вирев. Ежимила сеедьстэ понгони эрьва-кодамо тевс, ды тень пингстэ несынзе вирень лия эрицятнень прянь ветямост, максы тенст питне. Тесэ сон вастсы Волкашка верьгизлевкскенть, кардасы берянь тевде ды тееви тензэ паро ялгакс.Те повестесь-ёвксось ёвтни ояксчиде, вейке-вейкенень лездамодо ды ладямодо.

Ежимила – Лопавелень инязоравине

Елена Николаевна Шилова

Редактор Мария Левщанова
Переводчик Дмитрий Таганов
Иллюстратор Тарина Кокова
Составитель Алексей Трофимов

© Елена Николаевна Шилова, 2024
© Дмитрий Таганов, перевод, 2024
© Тарина Кокова, иллюстрации, 2024

ISBN 978-5-0064-3201-7
Создано в интеллектуальной издательской системе Ridero
Вечкевикс оят!
Мон кеман, те книганть, конань ней кирдтядо кедьсэнк, ловносынк паро мельсэ. Лездадо Ежимила сеель-тейтернентень совавтомс лопав вирень эрицятнень юткс ояксчи, тонавтомс сынст прянь ветямонтень.
Мон капшан сёрмадомс поладкс ды ёвтнемс тенк од ёвкс Ежимилань ды Волкашань ояксчидест. Арсян эрьвантень эйстэнк муемс Ежимила сеельненть кондямо кеме ялга – видечинь вечкиця ды видестэ теиця.
Мир! Ояксчи! Ежимила!
Паронь арсезь, авторось.



Прявкс 1. Пичелесь ёмамолангсо
– Кирвазинек! Пожар! Палтано! – секе-тев сеересть сёрмань кандыйтне – сезякатне. Веенстнэ тандадозь ливтнесть качамосо копачазь Пичеленть велькссэ. Омбонстнэ чакасть вирень эрицятнень вальмаc ды кенкшес, снартнесть пувтамост. Истяко сезякатне парсте содылизь тевест, шкань апак сатстне кандыльть сёрмат, кулялопат, журналт. Ней вана сынськак эзть сода, кода пряст ветямс, секскак пижнемасост седеяк тандавтнесть апарос понгозь ракшатнень
– Ежислав, стяк, – тошказь пшкадсь паро сеелень нись ды кавто сеельлевксэнь авась Ежианна, сорновтызе мирденть лавтовонзо.
– Азё варштык, кие тосо пижни!
Ежислав кирнявтсь таркастонзо ды путынзе судонзо лангс сельмукшонзо. Куш сеелесь сон сатышка одольгак, сынтемест а кодаль тензэ. Чумольть теньсэ чертёжтне. Нинзэ ды вишка сеельлевксэнзэ андомга сонензэ чинек-венек савкшнось теемс чертёжт. Кудазорось ульнесь инженерэкс.
Ансяк Ежислав панжизе кенкшенть ды лиссь кузтемпес, качамонь ды палозь тикшень чинесь пештизе сеельтнень лембе кудост. Ежианна путынзе лапинензэ вейке омбоце лангс мештезэнзэ ды ризнэзь варштнесь удыця эйдензэ лангс. Таркасонзо кирьмицявозь, Ежимила прядсь покш тюжа дулядо ононть ваноманзо. Эли, паряк, акепедевикс якстере умарде. Тейтернесь эрьва валске ёвтнесь аванстэнь ононзо, конатнесэ сон ялганзо марто мукшнось эрьва кодат фруктат, мейле явность эйсэст эсь ютковаст вейкетьстэ ды сэвилизь. Та-а-антейть!
Ежимир, дюм вишка эйдесь, удось лавськесэ. Сон носксь ды удомсто аволясь вишка лапинесэнзэ. Бульчом, несь онстонзо, кода Ежимила нельгизе кедьстэнзэ пангине-потямканзо.
Те допрок аволь Ежимирэнь коряс ульнесь.
Ежислав чиезь лиссь пирявкскенкшканть. Весе виресь копачазель качамосо. Васолдо марявсь палыця чувтонь цятнома ды тандавтозь ракшань шалт. Палсь шабра Кузэлесь. Курок толось пачкоди Пичелескак. Ды вармась тензэ пек лезды теньсэ.
Шабратне тандадомадонть чийнесть кудодо-кудос, вешсть вейкень-вейкень кедьстэ парочист ды кедьгест ускомга крандазкеть.
– Максодо куш кептерне! – верьга вайгельть сеересть уртнэ ды ёртнесть алов пенчест-ваканост, пеште ды костязь панго марто кескавнест.
– Паро ракшат, лездадо! – секе-тев кайсететсь вирьсэнть.
Эрьмев овтонь кудораськесь пурнавсь орабине ваксс, конань сынь капшасть пештямс ули-паросост. Сталмодонть тонань чарытне пракшность кавто ёнга, ды орабинесь сявориль, ули-паротне срадыльть мода ланга.
– Тулапа! – азорось урнось ды чавсь чирь пильгесэнзэ моданть.
– Мекс истямо тужманат?! – овтаванть сёвнозь, уставиль орабиненть витнемензэ.
Се, чумонзо содазь, келемтнесь лапанзо ды одс уставиль орабанть пештямо.
Эрьва кудостонть ливтсть кескавт-кептерть, ды
пирявкстнэнь ваксс пурнавсть сэрей март. Нумолотне шканть а таргсемга ёртнесть парочист вальмава. Пичелень эрицятне анокстасть пряст эвакуацияс. Идесть васняяк аволь эсь пряст – ули-парост.
– Зыян, Ежианна, – кудос чиезь совамсто пшкадсь Ежислав нинстэнь. – Весе Кузэлесь тол потсо. Курок минек лангс каяви. Седе курок туема!
Ежианна, кона свал кунсолось мирдензэ, ней эзь са мартонзо вемельс:
– Паряк, вакска юты? Нацяс, валске туи пиземе ды мадстьсы Кузэлесэ толонть. Пичелентень а пачкодияк.
Пек арасель мелезэ стявтомс сеельлевкстнэнь. Седеяк – кадомс кружовав шаршав ды кодазь кияксацавкс марто лембе кудост.
– А юты! – керизе валонзо Ежислав.
– Зяро пурнамс-сэрнямс шкам? – састо пшкадсь Ежианна ды уставась мартост саемга сех эрявикс парочитнень пурнамо.
– Зярояк! – лоткавтызе Ежислав ды, кедезэнзэ Ежимилань саезь, мерсь: – Саик эйденть ды листь!
Ежианна истя тейськак. Вишка Ежимирэнь кедьсэнзэ кирдезь, аламос аштевсь кенкшлангсо, укстась, нардынзе сельведензэ ды ношкстась мирдензэ мельга.
Чувтот, чувтот, чувтот. Виренть пезэ арасель. Певтеме киланго, сельме таргат чоподасонть. Тетянзо кедьлангсо шкань-шкань кирнявтнезь, Ежимила кунсолось покштнень кортамост. Сон умок сыргозсь, ансяк пря эзь невте.
Ежимила пек тандавтозель. Корсяня качамось сэвсь сельметнень ды коцькерясь кирьгапаренть. Зярдо-бути сырькаезэ ёвтнекшнесь кодамо-бути кежей толдо. Тейтерненть мельсэ кирдевсь ансяк мень-бути якстере кель марто тандавкс. Ды весе. Содавольгак, толось карми Пичелест вакссо, седе парсте кунсоловоль сырькаензэ.
«Косто саевсь те пожарось? – арсесь Ежимила. – Сон алкукскак тандавкс, мик тетянь-авань пелеветь кармавтынзе кадомс кудост. Зярдо-бути сынь кортасть: вечкевикс вирест зярдояк а кадсызь, мезе илязо лисе».
«Арази те тандавксонтень, – седе тов арсесь Ежимила, – тунь а жальть ракшатне? Сайсь ды панинзе весень кудосто. Паро, Ежимирэнь кандыть кедьсэ – сон вишка. Кода чарькодемс сень: мон, допрок касозь тейтересь, кинь перть „ардан“ тетянь лангсо?»
Истя, покшокс касозь! Секс мекс Ежимила сядос ловомо, ловномо ды сёрмадомо машты. Тейтернесь ледстинзе кудос кадозь книганзо ты пек нусмакадсь. Сех жаль ульнесь меельцесь, ёвкс мартось… Сонзэ казизь Ежимилань чачома чистэнзэ. Кодат мазыйть эйсэнзэ артовкстнэ! Тейтернесь мельсэнзэ «велявтнесь» конёвлопатнень, ды седеяк пек кепететсть кежензэ толпаломанть лангс.
– Энялдан, Ежианна, иля лотксе! – мерсь тетяст, зярдо неизе аваст кадовоманть. – Миненек лиядо икеле лисема леентень ды печтема тона чирес. Мейле тесэ весе пурнавить ве таркас, ды миненек сави ансяк ёмамс-арамс. Бути а толдо, лиянь лепштямодо. Прянок идемс ули а кода.
Ежианнань сельме икелев стясь те тандавтыця артовксось, ды, меельце виень пурназь, сон келясь мирдензэ мельга. Ежимиланень ульнесь пек жаль авазо, ансяк лездамс тензэ а кодаль.
Вишка Ежимир правтызе пангинензэ ды ней секе-тев сыргозиль. Сон кольнесь ды вешсь вечкевикс потямкинензэ. Авазо те шкане моразевиль. Кода се таго матедевсь, Ежианна пеняцязевсь:
– Вай, Ежислав, варштак лангозонок! Мезть карматано тейнеме од таркасо? Ярмактомо, кемевтиця конёвтомо, ули-паровтомо. Монень а эряволь тонь кунсоломс, ды…
– Кодаткак «дыть»! – валонзо трокс прась мирдезэ.
– Минь теинек кода эряви. Парочись, конань кис тон истя мелявтат, одс пурнави. Мон теть киян? Сеель – кедьс асаевиця пеель! Истя корязон кортат? – ды раказевсь.
– Иля цяха! Ежимирэнь пувтасак, – вешкезевсь каршонзо низэ ды весе шканть перть васенцеде пейдезевсь.
Ежианна мольсь ды арсесь, кодамо сонзэ паро мирдезэ. Вейсэ сынь весе стакачитнень ютасызь. Сон макссь эстензэ вал зярдояк а пеняцямс ды а ризнэмс кадозь кудонть кисэ. Эйсэнзэ свал ульнесь пангоямонь чине, таргочистэ – дуля марто ламбамо прякань. Кудодонть ледстнезь, Ежианнань тусть сельведензэ. Ежимилаяк аварьгадсь. Качамось сэвсь сельмензэ, ды пекезэяк вачсь. Удыцякс прянзо невтемась седе тов эзь удала.
– Тетяй, зярдо прядови те аеркс килангось ды сы валскесь? – кевкстсь сон эль марявозь. Вачо пекинедензэ эзь видькстаяк. Мезекс седеяк апаркстомтомс тетянзо-аванзо? Ялатеке меньгак ярсамопелест арасель. Сонсь марясь, кода авазо мерсь, келя мезеяк мартост эзть сае.
– Цидярдт, Пупикай чирязавине! Кадовсь а пек ламо, дюм а пек, – дёлязь мерсь Ежислав ды седеяк кеместэ кутмордызе вишка инязоравинензэ.

Прявкс 2. Бобрентий ды печтямо тарка
Ашолгадомсто сеелень кудораськесь лиссь вирьчирес. Качамо чинесь тей эзь пачколе. Чись кузсь седе верев, ды икелест цитнезевсь лей. Чуросто аштиця чувтотнень тарадга цильнесть нармушкат, цецятнень велькска ливтнесть мекшть, тикшенть потсо цирнесть паксяцирькунт.
– Иневедь! Иневедь! – ялакскензэ стявтомадо апак пеле рангстась Ежимила.
Тона сыргозсь ды вешсь эсензэ ловсо таликанзо.
– Те аволь иневедь, те – лей, – витизе тейтерензэ тетязо.
– Ансяк иневедекскак лемдясак. Ванодо, кодамо келей!
– Окойники пачкодинек, – шождасто лекстясь Ежианна, – ней эйденекак андови.
Оймсема тарка сеельтне тейсть видьстэ лейчирес. Ежимила кирнявтсь тетянзо кедьстэ наронть лангс. Уставась кирнявтнеме, ойсеме-стякшномо – истя пильгензэ ливчакавтсь. А сеске те удалась тензэ. Васня пильгензэ чамордсть, теке Сователла сыре покш пря коршонть. Кода сон тосо? Кода тосо Пичелень лия шабраст?
Ежимилань мельс ледсть ялганзо – урнэтне, ривезькетне, еноткетне, верьгизнэтне. Тейтерькась кемсь: сынст весе паро. Паряк, сыньгак тетяст-аваст марто сыргасть те ёнов, ды курок вастовить? Паро, бути истя улевель.
Аваст озась вишка пичине алов ды андсь Ежимирэнь. Се мельспаросо гульнесь ды пувась сельгень байгеть-пувавкст, мейле матедевсь. Тетяст тусь леентень валгома кинь варштамо.
Ежианна тейсь чевте пичесалмукссто удома тарка ды путызе тов удыця Ежимирэнь. Сонсь тердизе тейтерензэ пангос. Истяко сон а мериль верекстэ ярсамодост. Пидиль эйстэст ям эли аламо ведь марто куватьс пидилинзе, – пек мелявтсь мирдензэ ды эйкакшонзо шумбрачидест. «Сеелень ярсамопельть» журналсо, конань сон эрьва ковсто сёрмадстнесь, истя тешкстазельгак: «Верек панготне колыть рунгонь шумбрачинть». Ансяк ней а савкшны молемс ормань панийтнень кармавтомаст мельга.
Тевесь лиссь. Ташто покш мукорь вакссто несть зярыя пангинеть. Теке секень кис кассть – сеелень кудораськенть андомс. Истя арсезь весе пертьпельксэсь: веенстнэ лездыть омбонстнэнень эрямо.
Ежианна кочкинзе панготнень панарэлезэнзэ, Ежимила вейкень-вейкень путсь зепеванзо. Тетяст яла арасель. Аваст талнозевсь.
– Тон, авай, сонзэ содасак, – оймавтсь тейтерькась, – паряк, сон чочкосто пурнась леень печтямс уемапель. – Ды кармась панготнень ванськавтомо: тетянзо, аванзо ды эсензэ туртов.
– Кедеть? Кедеть шлить? – авась кевкстизе Ежимилань. Ансяк мейле чарькодсь – а мекс кевкстнемс, ды лоткась. Сынь аволь кудосо стувор экшсэ ярсыть, видьстэ тикше лангсо, теке меньгак злыдарнеть…
«Вай, монь тякинень», – секе-тев кортась сон ды снартнесь порнемс сормсевезь панго верьксэнть. Сех покш ды паро пангонть сон кадызе мирденстэнь. Цёраломанентень виевекс кадовомань туртов эряви парсте ярсамс.
Окойники учовсь тетяськак! Сась кувакасто лексезь ды пек паро ёжосо.
– Минь идезтяно! – покш чинь вайгельсэ яволявтсь сон ды капшазь ярсамодо мейле кармась ёвтнеме, келя, лейлангсо ули венч, сон муизе азоронзо – миявонь. Бобрентий эри авасоло ды лезды тенст. Ежислав тенень кемсь. Эрямонзо перть сон истямоль. Ракшатнесэ несь ансяк паронть ды эзь учне апаронь арсемат ды тевть. Ансяк эрсесь, лиятне мартонзо пряст ветясть апарсте. А весть эрсесь.
«Сеель паз! Вечкевиксэм, а эряви улемс истямо кемицякс», – сеедьстэ кортась тензэ Ежианна. Мирдесь ансяк ахолдыль кедьсэнзэ ды мериль: «Эряви кемемс ракшатненень! Ды тейнемс лиятнень марто истя, кода тонсь арсевлить эсеть туртов теемадо».
Секскак ней Ежианна эзь кемезеве, кода истя асодавикс мияв стякодо усксынзе леень тона чирев. Ярмакост трёшникак арась…


Валсо пелькстамс аютколь. Тетят-ават саизь пакшаст
кедезэст ды капшазь тусть венчентень. Эчке, муюков Бобрентий чирязось учось лейчиресэ.
– Весе кудораськесь тесэ! – мельспаросо моткодезевсь муюконзо пачка.
– Пандынк усковтоманк ды ойседе «иневенчентень». Ярмактомо сон а сырги, – мерсь миявось ды раказевсь.
Ежианна сялдозь варштась мирдензэ ёнов. Вановтсонзо сёрмадозель: «Мезе эно мерекшнинь?! Вана теть – весе ракшатне вадрят!».
Ежимила тандадсь: бути а нолдасызь венчентень, сави мурдамс. Тосо – палытол! «Идемевсень лей! Идемевсень ярмаконь вечки мияв!» – моткодсь тейтернесь ды порсь турванзо.
– Марят, Бобрентий чиряз, – Ежислав снартнесь кортавтомс ускицянть. – Кода эно вейсэнь лездамось? А содатадо истямо? Эряви лездамс вейке-вейкенень, лездыця лапань максомо.
– А виздеманк, а визьксэнк арась! – апаргадозь серьгедсь Ежианна.
– Минь вень перть молинек вирьга, вачот, вийтеметь. Марядо седей куш вишка сеельнетненень! – ды покордавомадонть сельмензэ пешкедсть сельведте.
– Я, паро авине, стамбаро! Бути весенень седей марямс – вачодояк кулат. А пандат – а сыргат. Седеяк пек – а уят! – мерсь каршо Бобрентий чирязось ды гайтевстэ цяхазевсь.
Вишка Ежимир панжинзе удомадо позакадозь сельмензэ, амазый миявонть неезь, уракадсь. Ды истя пек – се пилензэяк потомдынзе амарицякс а теевемга.
«Истя теть эрявияк!» – арсесь Ежимила ды лекшкадсь аванстэнь.
Ежислав озавсь ды кундызе прянзо. «Сеель паз! Мезть ней тейнемс тенек? Мейсэ кемевтемс венчень азоронть?» – арсесь сеелень кудораськенть покшост. Курок лия ракшатнеяк сыть. Ды ушодови се, мезде пельстькак – ланга лангсек эцема ды тандадомадо превстэ лисема.
– Бобрентий чирязнэ, паряк, те маштови пандовксонь кисэ? – сорныця вайгельсэ пшкадсь Ежианна ды венстизе миявонтень медальононзо.
Сон аёвтавикс мазыель ды питнеель. Ансяк Ежианнань туртов сон питнеель лиянь коряс – те вейкине, мезесь кадовсь тензэ авадонзо мейле.
– Авакай, иляк максо! – прок ознозевсь Ежимила.
Мазылгавтомапелесь седеень кондямоль, копачавкске марто. Панжсак – тосо вечкевикс сырькаест чамаартовксозо.
– Сырькайне-е-ем! – таргизе валонзо тейтерькась, ды сельместэнзэ пургстасть сельведть.
– Лиякс а кода, – эль марявиксстэ мерсь Ежислав ды стясь пильге лангс.
Кода сон кецнесь те медальононтень! Те шкастонть сон ульнесь вейкине сынст идемапелекс. Ансяк меельце валось кадновсь Бобрентий мельга.
– Мекс а маштови? Пек мик маштови, – апак учо пшкадсь каршост миявось, ваннызе маласто медальононть. – Питней теевксэсь, – ды, сырькаест чамаартовксонзо зепезэнзэ ёвкстазь, поладсь: – Ойседе венчентень! Курокке!
Леесь сэтьмель, толкунтомоль, секскак милетне миявонть кедьсэ нимилявонь сёлмокс налксесть. Ежимила вансь ведентень ды арсесь Бобрентиень прянь ветямодонзо. Сон саизе сех питнеест, мезесь кадовсь кулозь сырькайдест мейле – чамаартовксонзо.
– Авай, сырькаенек а покордави? Сон а пры апаро ёжомарямос? – пшкадсь сеель-тейтернесь аванстэнзэ.
– Зярдояк! – мерсь Ежианна. Мейле кутмордызе тейтерьканзо ды поладсь: – Те теезь нуцьканзо ды эйкакшонзо идемга. Секскак иля мелявто ды иля арсе теде седе тов.
Ежислав марясь прянзо чумокс. Сон эзь арсекшнеяк Бобрентий чирязонть ярмакс истя прамодонзо. Кода парсте васня кортасть! Пертьпелькстэ, Пичеледе ды Кузэледе. Пельчас Ежислав кунсолось, кода стакаль эрямс миявонтень нинзэ марто.
«Пилакс кери ды кери, гуень прясь, кудовгак куш иля велявто», – пеняцясь се. Ули, нать, мезень кисэ. Ежислав ней чарькодсь. Астяко Ежианна тензэ свал кортыль: «Ракшань туртов кемть, ды пилеть вешкест!». Сон эзь кунсоло. Зярдояк а содат, ки вельтяви ракшань кедьсэ-понасо – ялга эли… вана истямо Бобрентий чирязнэ.
Венчесь нерькставсь лейчирентень, ды сеельтне валгсть.
– Ве сельмесэяк аволия нее! – кежейстэ ёвтась Ежианна, зярдо миявось мекев сыргамсто ахолязевсь милесэнзэ.
– Зярдояк чумонзо а нолдаса! У-у-у-у! – рангстась мельганзо Ежимила ды невтизе мокшнынензэ. Теяк мерят аламоль, кепедсь мастордо пичечуля ды ёртызе леентень.
– Мон арсинь корязонзо лиякс, – нусманясто пшкадсь нинстэнь Ежислав.
– Тонь, Ежианна, видеть валот: аволь весе ракшатне ялгат.
Тейтернесь вестькак эзизе марсе тетянзо киньгак лангс сёвномадо. Мокшнань сювордамодонть ды пичечулянь ёртнемадонть кортамскак а мезть. Истямоль те Ежислав инженерэнть корозо, лия сеельтнеде сех парсте тонавтозь-тирязь сееленть.
Тетясь, судостонзо валгозь сельмукшонзо витезь, седе парсте карязлангс тейтерензэ озавтозь, тейсь асодавикс масторсо васенце эскелькс. Янось келеель. Аваст, Ежимирэнь кедьсэ кандозь, мольсь вакссост. Ежимиланень те вечкевсь. Сон варштнесь тетянзо-аванзо ёнов ды арсесь, кодат сынь вадрят, паро седейть, превейть. Ялакскесь теке чарькодсь – патязо эзизе ледстя, кувсезевсь, кармась велявтнеме, теке покордавсь.
– Сех вадрясь юткстонок – тон! – витизе ильведевксэнть Ежимила, ды Ежимир сеске оймась.
Менелькирькссэнть неявсь вирь, аволь истямо покш, конасонть сынь эрясть. Чувтотне седе алкинельть ды човинельть, тарадост ланга таргавсть аволь салмукст – лопинеть. Васня тейтернесь талакадсь, мейле сонсь прянзо оймавтызе. Сырькаезэ свал кортась: «Од эрямонтень секс меритькак од, мекс весемесь эйсэнзэ од, весемесь лия».

Прявкс 3. Вечкиверьгиз чиряз марто содавиксэкс теевема
Чикуншкантень сеельтнень кудораськесь аштесь тусто лопав виренть чиресэ. Керш ёно сех сэрей поентень поводезель лазнэ. «Лопавеле» – шождасто ловнызе лементь Ежимила. Вить ёно пойденть седе вишка килеентеньгак поводезель лазнэ. Лангсонзо артозельть налонь кондят кикст ды кудынеть, сынь невтсть, ков пурдамс молемстэ. «Вирь азор, тонавтнема кудо, почта, надобиянь кудо…» – кармась ловномо Ежимила. Сёрмадозель ламо.
– Паро арсевксэсь, – шнызе Ежислав, невтемкатнеде арсезь. – Сеске чарькодят, косто Лопавелень азоронть муемс.
Васняяк сеельтне сыргасть сонензэ. Те сон явши кедь алонзо аштиця вирьсэнть эрямс меремат.
– Паро, лисевель тевенек, – мерсь Ежианна, – улевельгак сон таркасонзо ды нолдавлимизь Лопавелев!
– Косо эно ули? – апторгадсь Ежислав, теке тунь стувтызе, кода важодсь Пичелень азорось, пек нузякс Лосентий чиряз сярдось. Зярдояк таркасонзо арасель: чинь каршо эжни, моргов сюронзо ванськавтни, киньгак кедьсэ ведрасо чайде сими, – ды кияк вал тензэ эзь мере, сон – вирень азороль!
Ков седе виренть потс совасть сеельтне, тов седе пек мельс туиця ды апак тонадо таркакс сон неявсь Ежимиланень. Модазо вельтязель аволь пичесалмукссто кумбасо, кода Пичелесэ, – эрьва кодамо тюс ды парцун лопасо. «Прамсто сэредьксэсь тесэ седе карми марявомо», – арсесь тейтернесь, пильгалов ванозь. «Сестэ сави а пракшномс», – сеске сась мельс.
Тень кисэ те виресь марявсь седе валдокс. Тарадонзо аштесть аволь истя тустосто, кода Пичелесэ, чиналтнэ шождасто керясть натой сех тусто пумбрань чоподанть. «Аберянь, – сеске чарькодсь Ежимила, – куш чопотемас ялгацек налксек!» Сынст а муемадо тейтернесь эзь арсеяк. Сон курок муиль кель-вал эрьва ки марто, секс весе курок кармакшность тензэ ялгакс.
Вирень азорокс ульнесь однэ, шкань коряс мазыйсэ оршнезь верьгиз – Вечкиверьгиз. Лемезэ, чамаартовксозо поводезельть ракша марто вастневема кудонь совамо кенкшс. Чамаартовксонть ве пельксэсь ульнесь мизолдыця чачозо, омбоцесь – кирьгасонзо пек покш нимиляв-галстукось. Якстере, ашо кснавт-кснавт арцтонь, Ежимиланень сон неявсь карвопангокс.
– Несак, кода оршась! – артовксонть неезь, ракамодо пургстась аваст. – Мезеяк истямось, ламонь койсэ эсь прянь вечкиця верьгиз.
– Ежианна, энялдан икелеть… – кувакасто мерсь тетяст ды коня алга варштась аваст лангс.
– Каштмолян, – мерсь се, ды седе тов а ракамга лапинесэ пекстызе кургонзо.
Вечкиверьгиз чирязонть важодема нупальс совамо кенкшенть лангсо понгавтозель карькске, песэнзэ – вишка пиже дуля. Баягинень таркас. Вишка Ежимир, кона нувсесь аванзо кедьсэ, арсесь – те налкшке. Сон кундызе лапинесэнзэ дулянть ды таргизе. Сеелень эйдесь пек виевель.
Секскак дильневтемс, кода паро ракшанень, сынст эзь лисе. Савсь кенкшентень чакамс.
– Ды совадо эно! Совадо! – маризь азоронть апаро мельсэ артозь вайгелензэ ды совасть потс.
Вечкиверьгиз чирязось аштесь кроссвордсо валязь тумонь покш стувор экшсэ. Креслас пельсмадезь, сон сэвтнесь тусто прячерензэ. Неизе эйденть кедьстэ дулянть ды покордавозь пшкадсь:
– Ансяк сыде – парочи колатадо!


Ежислав эйдензэ кисэ нолдавтызе чумост ды ушодсь вановтсонзо нинзэ ды эйкакшонзо туртов озамс таркань вешнеме. Таркась вейкель – азоронсесь. Кадовсть аштеме стядо.
Зярс тетяст ёвтнесть толсо кершавозь Кузэледенть ды качамос ваязь Пичеледенть, Ежимила ваннось перьканзо. Стенасто сон неизе верьгиз-цёрынень чамаартовксонть, се аштесь нусманя сельме сёкань лангсо ласте. Прясонзоль ашо кснавсо артозь якстере кепка, кирьгазонзо сюлмазель тейтерненть туртов содавикс карвопанго нимиляв-галстукось. «Цёразо, содави», – сась Ежимилань превс, ды те видель.
Ежимир налксесь од налкшкесэнзэ, Ежианна паро мельсэ ваннось лия чамаартовкс. Эйсэнзэль якстере, ашо кснавсо артозь палясо покш, аламодо эчкелгадозь верьгизава. Прянзо мазылгавтсь недязь толга марто келей шляпа.
«Вый, кодамо амазый, – арсесь Ежианна, – карвопангонь тюссо оршамот – мень кой те Лопавелесэнть. Эрь, мезеяк, – сась мельс авась, – мон тонавтсынь оршневтеме пряст лия ракшань а ракавтомга».
Ежиславонь кунсолозь, Вечкиверьгиз олякстомтызе кроссвордтнэнь алдо кудонь книганзо ды кармась лопатнень велявтнеме. Эйзэнзэ сёрмадозельть Лопавелень весе эрицятне.
– Истя… ули монь ве кудом, умок чаво ашти, – ёвтась виренть азорось. Мейле пекстызе ды, Ежислав лангс ёжовсто ванозь, поладсь: – Мейсэ тынь кемевтьсынк сеелекс, аволь лия ракшакс улеманк? Кемевтиця меньгак конёвонк арасть…
Те кевкстеманть кияк эзь учне, а Ежислав, а Ежианна, а Ежимила. Секскак сынь талокадозь вансть вейкест-вейкест лангс.
Окойники кудораськень прявтонть ёвтавсь:
– Нолдык чумом, Вечкиверьгиз чирязнэ, мон а пек чарькодян. Кодат кемевтемат? Икеленк аволь овтот – сеельть аштить.
– Паряк, нумолот? – каясь апаргавтозь Ежианнаяк.
– Кода эно арсиде? – эсензэнть поладсь Лопавелень азорось. – Тынк арасть кемевтиця конёвонк, конатнесэ сёрмадозь: «Сеельть». Кода валозонк кемемс? Монгак вана нейке мерян – аволь верьгизан, бегемотан!
Сеельтнень арасель кодамояк мелест пелькстамс вирень азоронть марто, ды сынь кармасть макснеме каршо валт аэрявикс кевкстеманзо лангс. Ёвтнизь, мейстэ рунгост ашти, вечкевикс тевдест, ярсамопельдест, эрямо таркадост. Зярдо пензамось прядовсь, Вечкиверьгиз чирязось сёрмадстсь ниле кемекстамо конёвнеть. Эрьвасонть сёрмадсь «сеель» вал, путсь печать.
– Вана ней весе кода эряви! – мельспаронь марязь, мерсь Лопавелень азорось ды максынзе сеельтненень конёвост.
Мейле таго панжизе кудонь книганзо ды «Килеень куро,
8-це кудо» адресэнть каршо эчкестэ тешкстась плюс.
– Парова совадо Лопавелес! – ёвтась Вечкиверьгиз чирязось ды сыргась од кудос сеельтнень ветямо.
Ютамсто Ежислав кевкстизе Лопавелень азоронть, кода тесэ важодеманть марто. Инженерэкс улемадонзо марязь, Вечкиверьгиз пек кецясь. Ежианнань туртовгак тев муеви – паро стыця тевтеме а карми аштеме, улить тесэ веенст мирдеть-нить.
– Бульчом, эсензэ нинзэ кирди мельсэ, – мирдензэ пилес тошкстась Ежианна, карвопангонь тюсонь чамаартовкстнэнь ледстязь.
Сеельтне варштасть сельмеде-сельмес ды пейдезевсть. Содавольтькак, кодат апарот канды тенст Вечкиверьгиз чирязонть кудораськензэ марто содавтовомась. Зярс сынь паро мельсэ ды кенярдозь мольсть Лопавелень азоронть мельга. Пек покшоль мелест неемс од кудонть ды ушодомс эйсэнзэ эрямонть.

Прявкс 4. Тень лемезэ кудо?
Кудось, ков Вечкиверьгиз ветинзе сеельтнень, аштесь Килеень куронть песэ. Икеле тосо эрясь кажварчонь кудораське. Косо сон ней – Лопавелень азорось эзь ёвта. Ежианна кевкстиксэлизе, ды эзь карма. Эзь вечкеве тензэ те цибаройстэ оршницясь – ялатеке видестэ а ёвты.
– Вана пачкодинекак! – мельспаросо яволявтсь верьгизэсь, эль а прыця пирявксонть ваксс лотказь.
Ансяк айгизе пирявкскенкшенть, се чикордозевсь ды прась кардазс. Теевезь варяванть сеельтнень лангс вансь ташто, умок кадозь чувтонь кудыне. Олгонь прясонзо тыцкадезель пельскаладо труба. Пиресь умок таргавсь тикшесэ. Вишка увтямо лисьмась валязель коське тарадсо ды наксадо лопасо. Кузтемпентень янось весе лазнототсь, лазовкстнэ теке раужо гуйнеть ланганзо артозельть. Конасткак мик эскельдямо пельсь ёнонзо.
Весементь учость сеельтне, ансяк а тень! Ежианна кундась мештезэнзэ, Ежислав – прянзо кундызе, Ежимила – аванзо паляс кундась. Истяко каштмолезь аштестькак, валост эзь ёвтаво.
– Тень лемезэ кудо?! – васенцекс пшкадсь Ежимила.
– Тесэ тенек эрямс?
– Тень лемезэ кудо! Тесэ тенк эрямс, – валдо-валс тейтерненть каршо мерсь Лопавеленть азорозо.
– Лия арась, Вечкиверьгиз чирязнэ, седе паро? – кевкстизе Ежислав, кода ансяк валозо ёвтавсь.
– Сон а маштови вишка эйкакш марто эрямс! – кирдизе мирдензэ меленть Ежианна ды кежейстэ варштась верьгизэнть лангс.
– Бути тенк а эряви, те тынк мелесь, – покордавсь се. – Курок Пичелестэнк лия сыцят кармить. Лапанек сезьсызь!
«Видеяк, – арсесь кудораськенть прявтось, – сави саемс».
«Сеель паз… – арсесь Ежианна, – зяро сави тесэ важодемс куш аламнеде паролгавтомганзо».
«Тосо, бульчом, шанжавт эрить», – сеске сась превс Ежимиланень ды мик тарск-тейсь. Сон пельсь эйстэст масторлангсонть сехте пек.
Ансяк вишка Ежимир мездеяк эзь арсе, эзь мелявто. Сон несь пирявкспрясто нармушка ды покш мельсэ вансь мельганзо, гогокстнесь – снартнесь сень ладсо цилик-цилик тейнеме.
Ежислав нардынзе сувсо таргазь сельмукшонзо ды мерсь:
– Миненек мезеяк лия а каднови, Вечкиверьгиз чиряз, кода прамс мартонк вемельс, – ды поладсь: – Сюкпря лездамонть кисэ.
– Те вана тев! – кеняргадсь верьгизэсь.
– Эрядо! Бути мезе эряви, содатадо, косто вешнемсан, – ды сыргась кияванзо, судалонзо моразь: «Со-оды вечке-емантень кисть, вечке-евикс верьги-из».
– Се оштё лелясь, – мерсь Ежианна, Лопавелень азоронть ёнов прянзо пурдазь, зярдо се тусь веёнов.
Сеельтне совасть кудос. Потсто сон седе пароль. Латось куш таштольгак, вармадо ды пиземеде ванстась. Кенкш вакссо вачказель каштомо. Аламодо веёно аштесть стуворт-эземть, вальманть ало – кавто удома таркат. Вана весе ули-пароськак.
Кудось пек рудазоволь! Ежианна тонавтозель ваньксчис, секскак эль ёжовтомо эзь пра, зярдо неинзе чельке потсо шаршавтнень-стуворруцятнень. Кедьгетне ёртнезельть масторга. Эрьва ужосонть нурьгсть шанжавонь коцтт.
«Кода арсинь, тесэ эрить шанжавт», – ансяк сась Ежимилань превс, ды сеске пижакадсь. Сон неизе вейкенть – кодамо сон куя! Апаргадозь нерь шанжавось валгсь сурензэ вельде ды оргодсь вальмава.
– Одс иля саяк! – серьгедсь мельганзо тейтернесь.
Шанжавось мезеяк эзь алта.
Перьканзо варштазь, Ежислав снартнесь кеняргавтомс нинзэ ды тейтерензэ.
– Эрямс маштови, – мерсь сон ды мик мизолгадсь.
Ансяк Ежимир энгамсь ды матедевсь, ават-Ежимилат менчизь-сювордызь ожаст ды ушодсть кудонь ванськавтомо. Тетяст тусь лисьманть варштамо. Сась аволь ансяк ведь марто – фруктаткак тусь!
Ежимила, кенерезь ожо дулятнень тетянзо салмукс лангсто неезь, кецязь цяпазевсь.
– Косто тон саить, вечкемнем? – кевкстизе аваст.
Пичелесэ дулятне эзть касо. Базаров сынст тукшность микшнеме ансяк таргочистэ. Зярдо эйкакштне невак удость, Ежианна туилинзе кептерьсэнзэ ды паниль мартост тантей прякат. Вана велявтоволь се шкась!
Зярдо пекест пештизь, Ежислав, ёжовсто кончтазь, мерсь:
– Адядоя, тейтерть, мон тенк кой-мезе невтян.
– Алкуксонь умарьпире! – зярдо сынь пачкодсть кудост удалов, Ежимила мельспародонть кармась кирнявтнеме.
– А кемевияк… – пельвайгельсэ мерсь Ежианна.
Умарьпиресь, кода кудоськак, кадозель-стувтозель, ды эно мезеяк. Сехте вадрясь – эйсэнзэ кассть фруктат, конатнень сеельтне пек вечкилизь – дулят ды умарть. Мельгаст чувтопрява кузнемсак а сави! Ванат, анокт, аштить масторо – кенерезть, ламбамот. Эряви – истяко ярсак, ули мелеть – пидек варения, ули мелеть – костяк теленень.
Ежимила аванзо марто кармасть дулянь ды умарень кочкамо. Капшазь пурнасть сынст Ежианнань панарэлес, теке пельсть, кияк нельгсынзе. Элес эзть кельгстяво, прыльть мода лангс. Сынь раказь таго пештясть. А кунсолыця фруктатне кирнявтнесть одов масторов.
Сеелесь вансь, кода кецнить-кеняркшныть низэ ды тейтернезэ ды арсесь: «Эрямось, аля, витеви».
Норовонь пурнамось сезевсь виев авардемасо. Вишка Ежимир сыргозсь. Вакссонзо киньгак апак нее, тандадсь ды тердсь тетянзо-аванзо ды Ежимилань.
– Вана таго ве «сеель – кедьс асаевиця пеель» касы, – паро мельсэ мерсь Ежислав, кудост ёнов ванозь.
– Тетяй, тон сонзэ лапасо, лапасо! – превс путсь
Ежимила.
Ды колмонест кулость раказь. Машты ракавтомо. Ды мейле чиезь тусть буянгадозь Ежимирэнь оймавтомо. Эйдесь тошнакалесь лавськензэ ды налкшкензэ кис.
Эрьвантень мезесь-бути эзь сатно. Ежимиланень – мазый артовкс книганзо, аванстэст – ламо тюсонь кире ды кодамо салмукс марто кептернезэ, тетянстэст – чертёж марто эчке альбомозо.
Окойники сеелень весе кудораськесь оймась. Покштнеяк, эйкакштнеяк паро мельсэ-ёжосо маднесть ды удость. Те ульнесь Лопавелесэ васень вест.

Прявкс 5. Сюрот ды казнеть
Ежимила сыргозсь пекставиця кенкшень чикордомадо. Сон панжинзе сельмензэ ды кундась судозонзо. Маряви! Лисни, а уды. Лисни, Пичелестэ Лопавелев якамост аволь онстонзо неявсь, алкукс ульнесь.
Покштне тусть пертьпельксэнь ванномо.
Ежимирэнь а пувтамга тейтерькась пильгесур лангсо мольсь стуворонтень ды уставась сёрминень ловномо. «Ковгак иля туе. Курок сатано. Ават». Тетянзо-аванзо свал истя сёрмадыть сёрмаст. Ежимила, нама, свал ловнось сынст. Виде валось! Эли малав свал, зярдо а стувтылизе.
«Ков истя тусть?» – превть яжась тейтернесь. Ды нацяс несь вальмасто кавто тарадт. Сынь лыкасть кершев-витев, эзть аште ве таркасо. Ежимила пек тандадсь ды кекшсь стувор алов. Якиця чувтот! Я! Истяяк эрси? Мейле неезевсь пря.
Неть меньгак аволь тарадт – те ульнесть Лопавелень ванстыцянть, Олентий чиряз сёканенть, сюронзо. Сон валскень ванкшномань тевензэ теемстэ варштась кадозь кудоюртонтеньгак. Ежимила содызе Олентий чирязонть. Те сонзэ лангсо ласте аштесь верьгизлевксэсь Вечкиверьгизэнь нупалень стенас поводезь чамаартовкссонть.
Ежимила лиссь стувор алдо, панжизе вальманть ды пшкадсь:
– Шумбра валске!
– Шумбракс тенк улемс! – ушманокс каршо мерсь сёканесь, сон вальмава ваннось кудопотмонть. – Мон виренть ванстыцязо, Олентий чиряз.
– Мон Ежимила. Минь тесэ од эрицят, исяк сынек, – поладсь тейтернесь. Ды, тетянзо свалшкань валонзо ледстязь, капшазь мерсь:
– Минь – Пичелестэ сеелень паро кудораське.
– Тень минь вансынек. Икелень эрицятнеяк истя кортасть. Сынсь оно мень шукшпря мельгаст кадсть… – кувакасто ёвтась Олентий чирязось.
Мейле вирьванстыесь мерсь, келя, кенярды содавиксэкс теевеманть кувалма, ды, моргов сюросонзо шатазь, тусь. Лопавелесь покшоль, коень колыцятнеде тесэ, кода ламо виртнесэяк, сатышкальть. Секскак Олентиень тевензэ эзть прядново.
Курок мурдасть тетятне-аватне. Ды а ськамост. Мартост ульнесь эль а весе Лопавелесь, пелезэ, ловт. Истя неявсь Ежимиланень. Сёрмань кандый сезякатне невак исяк весенень ёвтнесть од эрицятнеде. Секскак ламонь ульнесь мелест теевемс мартост содавиксэкс ды лездамс од эрямо таркасост нолдамс седе кеме ундокст.
Ежислав марто Ежианна мольсть икеле, мельгаст пецек эскелясть вирень ракшатне. Веенстнэнь лапасост кептернеть, омбонстнэнь копорьсэст сюлминеть, конатнесэ сынь кандсть казнест.
– Монь, монь учомизь! – секе-тев сеересь нерьгазось.
Сон эскелясь сех меельцекс ды яла кадновсь весемеде. Самоварось, конань сон кандсь, снартнесь нолажтомо кедьстэнзэ.
Кудынентень ялатеке весе авольть кельге, секс Ежианна весень кудос эзинзе тердеяк. Тенень ульнесь лия тувталгак. Ежимила содась теде. Авазо свал кенярдсь инжень самонтень, ансяк ней сон виздсь эсь апак паролгавто эрямо таркадонть.
Ракшатне ойсесть кудонть ваксс, наронть ланга, ды путнизь казнесткак. Ежимила лиссь кузтемпес ды цяпазевсь. Мезе ансяк тесэ арасель!


Чинемесь тусь пенчть-вакант.
– Од кудос – од кедьгеть! Карматадо панго марто капстаямдо коршамо ды монь ледстеме! – эзь стувто шнамс эсь прянзо.
Бурундуктне-кавтаськетне тусть чувтонь чапомань-витемань кедьёнкст: наструг, узере, молотка ды пила.
– Кудораськень покшонтень сынтемест а кода! – мерсть ве вайгельсэ. – Кода эно трубанть витнемс ды од пирявкс путомс?
Сеельтне ансяк сюконямо кенерекшнесть эрявикс ды а пек казнетнень кисэ вирень ракшатненень. Ды сайсть весементь. Лиякс – покордавлизь ракшатнень. Аваст чамазо якстерьгалесь, тетясь одс ды одс кортась:
– Паро тенк, эзь эряво истя… Минь минськак… Миненек истя аён…
Максазеесь туинзе журналонзо ды теске уставась невтнемест. Ансяк сокороль ды кирдсь сынст прянзо лангс. Секс Ежимиланень эзь чарькодеве, мезе лангсост артозель.
– Монень сынь а мезекс, – апаркстомозь мерсь максазеесь. – Мон ней сельмукшсояк тешкстнэнь а неян, – ды, суронзо менельс кепедезь, цётызе: – Ловномась парос а пачти.
«Мезть а эряви корты, – арсесь Ежимила. – А эряви ловномс чоподасо ды кикстнемс чертёжт лампань валдосо». Аваст свал истя корты сонензэ ды тетянстэнь.
Нумоло авакась таргась кептерьстэ эйдень панарнэть ды понкскеть. Онкстызе тейтерьканть прясто пильгес ды мельспаросо мерсь:
– Кодамо паро – покшолманть содыя! Онкстытяя!
Ежимила мик покордавсь, поти эйдекс ловизь. Нумоло авакась кодаяк эзь энгамо. Оймась ансяк зярдо удыця Ежимирэнь туизь ды оршизь од оршамос.
Урнэтне цянкаесть чакшкесэст. Ежимила ловсь мик комсь чакшкеть!
– Ков тенек зняро? – виздезь кевкстинзе Ежианна чакшкетнень ды лапужа вакашкетнень саемстэ.
– Мейстэ эно инженк чайде симеме кармить? – сеске мерсь вейке урнэсь. – Яла маштовить!
– Сюкпря, – мерсь Ежианна ды поладсь: – Минек самоваронокак арась…
– Те кода арась? – марявсь оймень стакасто таргсиця нерьгазонть вайгелезэ. Сон ансяк кенерсь само. Путызе наронть лангс цитниця самоваронть ды ёвтась: – Бути те аволь самовар, сестэ мон аволь нерьгазан – верьгизан, седе виде меремс, Вечкиверьгиз чирязан.

Конец ознакомительного фрагмента.
Текст предоставлен ООО «Литрес».
Прочитайте эту книгу целиком, купив полную легальную версию (https://www.litres.ru/pages/biblio_book/?art=70935772?lfrom=390579938) на Литрес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.