Главная страница | Спорт, фитнес | Очурга оҕустарыы, кыайыыга кынаттаныы

Очурга оҕустарыы, кыайыыга кынаттаныы
Вячеслав Павлович Карпов


Көҥүл тустууга саха уолаттарыттан бастакы ССРС чемпиона, Д.П. Коркин биир чаҕылхай талааннаах үөрэнээччитэ Вячеслав Карпов бэйэтин очурдаах, өрө тахсыылаах олоҕун, улуу тренерин, бииргэ алтыспыт доҕотторун туһунан сэһэнэ.





Вячеслав Павлович Карпов

Очурга оҕстарыы, кыайыыга кынаттаныы



Киһи олордоҕуна олорор. Күөгэйэр күннэрбэр сылдьан, хаһан эрэ ыалдьыам, сырдык-хараҥа икки ардыгар былдьаһыы амырыын тымныынан хаҕыстык тыынарын субу билиэм диэн санаа олох суох буолара. Орто туруу-бараан дойду баарын тухары үрдүбэр күлүм күн мэлдьи мичээрдии туруоҕун, үтүөкэннээх атастарым-доҕотторум өрүү чэгиэн-чэбдик сылдьыахтарын курдук саныырым. Баар үһү дуо ама ыарыы, өлүү-сүтүү? Сымыйа!

Ол бэйэм 60 сааспыттан лаппа тахсан баран, сүрэх ыалдьара диэн тугун биллим. Түөһүм иһигэр ааспакка-арахпакка ньириһийэрэ, эдэрбэр хайа да чымаан хайа чыпчаалыгар тэппит атахпын кубулуппакка сүүрэн дабайар бэйэм (бу түгэҥҥэ 1969 сыллаахха Володя Андросовы, Коля Захаровы кытта Болгарияҕа Шипка хайатын чыпчаалыгар диэри тыһыынчаттан тахса үктэли биир тыынынан элэҥнэтэн тахсыбыппытын өйдөөн кэллим) билигин иккис да этээскэ тахсарбар аҕылаан барарым дьулатар буолбута.

Балыыһаҕа быраастарга көрдөрөөрү күнү быһа уочаракка олорору олох сөбүлээбэт суолум да буоллар, ыарыым тулутарыттан ааста, хайыам баарай, хаһааҥҥа диэри маннык туруктаах сылдьыамый – бырааска көрдөрбүппэр: «Сүрэххин хааччыйар сүрүн тымырыҥ улахан аҥаара бүөлэммит, онон атаҕыҥ тымырынан киирэн, тымыры кэҥэтэр стентирование диэн операция оҥоруохха наада», – диэтилэр. Биллэн турар, урукку өттүгэр улаханнык ыалдьан көрбөтөх киһиэхэ сүрэххэр эпэрээссийэ оҥоробут диэбиттэрэ ыраас халлааҥҥа этиҥ эппитинии соһумар этэ.

Үрүҥ халааттаах аанньаллар барахсаттар (хирурдарбар Петр Иванович Захаровка, Григорий Дмитриевич Бугаевка, Петр Борисович Кривошапкиҥҥа тыыннааҕым тухары махтана туруом) өр-өтөр гыммакка эпэрээссийэлээн, доруобуйам кэм чөлүгэр түспүт курдук да буоллар, чэгиэммин-чэбдикпин диэн эрдэттэн быһа этэн кэбиһэр табыллыбатын өйдөөбүтүм. Балыыһаҕа палаатам үрүҥ үрүтүн одуулаһа сытан саныырым: «Киһи Таҥара илиитигэр сылдьар дииллэрэ уот харахха эбит, саха өһүн хоһоонугар баарыныы, уол оҕо биир күн ат уорҕатыгар, иккис күн ат өрөҕөтүгэр. Бүгүн этэҥҥэ курдугуҥ тугу да билбэт, хаһан баҕарар эҥин дьүһүн буолан хаалар олох ыраахтан буолбатах. Ыччаттарбар анаан тугу да ахтыбакка, суруйбакка хааллахпына, ким кэлэн оҕолорбор, сиэннэрбэр, бары миигин билэр дьоммор мин түһүүлээх-тахсыылаах, үөрүүлээх-хомолтолоох олоҕум туһунан кэпсиэ буоллаҕай?»

Мутугунан быраҕар муҥур үйэбэр ситиһии-кыайыы өрөгөйүн да, охтор-самнар алдьархайын да билбитим. Быһата, бэйэм очурдаах-чочурдаах дьылҕам туһунан кэпсээн көрүүм, баҕар, кими эмэ сэҥээртэҕинэ, өссө үчүгэйэ – хайа эмэ ыччакка олоҕун суолун буларыгар, быстах уустуктартан сынтарыйбакка өрө охсон, уустук балаһыанньаттан тахсарыгар көмөлөстөҕүнэ, мин туруоруммут сорукпун сиппиттии сананыах этим.




1


Мин төрөөбүт-үөскээбит Чакырбын биир дойдулаах убайбыт, саха классик суруйааччыта Семен Степанович Яковлев-Эрилик Эристиин бэргэнник этэн кэбиспитинии Дьаҕа Баһа диэн ааттыыллара. Чахчы да, биһиги аччыгый эрдэхпитинэ, ылбычча киһи тиийбэт ыраах сирэ, соҕуруунан Амма улууһун кытта быысаһар, «ырааһыран ыла-ыла ыбыллаҕастаммыт, ыллыга-аартыга бүөлэммит» үрэх баһа дойду этэ. Ол иһин массыына тоҕута сүүрбэтэх сирдээх-уоттаах, уматык ыыра-дьаара тунуйбатах күөх сирэм дойдубар, өлбөт мэҥэ уутуттан итэҕэһэ суох угуттуур мүөттээх салгыннаах Дьаҕам Баһын алаастарынан, хатыҥ, тиит былаастаах тыаларынан оонньоон-көрүлээн, көтөн-мөҕөн оҕо сааһым ааспыта. Оччотооҕу кэмтэн өйдөбүлүм – күн манна Толооҥҥо (Чакыр диэн нэһилиэгин, оттон Толоон диэн дэриэбинэтин ааттара) ордук чугаска, сир-дойду быдан ырааска, чаҕылхайга дылыта, миигин, эрдэ аҕата суох хаалбыт уолчааны, дэриэбинэҕэ билэр-билбэт дьонум-сэргэм өрүүтүн таптаан-атаахтатан тахсаллара.

Кэлин дьон ахтыытыттан биллэххэ, түөрт хостоох дьиэни Тураҥнаах диэн сиртэн көһөрөн аҕалбыттарыгар Эрилик Эристиин иккис кэргэнэ, биэлсэр буолан бу дьиэттэн үс хоһун ылан өлүөр диэри олорбут. Билигин бу дьиэ музей буолан турар. Дьиэ соҕурууҥҥу киэҥ хоһо дьахтар оҕолонор палаатата эбит. Мин манна 1947 сыллаахха кырыа кыһын кыйданан, сааскы таммах чоллурҕаччы түһэн эрдэҕинэ, чыычаах уйа туттубат, киһи үлэлиэ суохтаах ытык күнүгэр – Былаҕасыанньайап таҥаратын чэчиэринньигэр, ол аата ыаллар алаадьы астаан бырааһынньыктыыр кэмнэригэр – муус устар 6 күнүгэр төрөөбүппүн.

Аҕабынан төрүттэрбит Байаралар диэн эбиттэр. Аҕам Павел Дмитриевич, эппитим курдук, эрдэ, мин үс саастаахпар, суох буолаахтаабыт. Эдьиийим кэпсээнин сабыдыалыттан дуу, эбэтэр дьиҥ-чахчы оннугу көрбүтүм хатанан хаалбыта дуу – хаар кыыдамныыр күһүҥҥү хаҕыс күнүгэр хоруобу сыарҕалаах акка тиэйэн илдьэн эрэллэрин, миигин эдьиийим көтөҕөн турарын өйдүүр курдукпун, олус лүҥкүрбүт, хобдох-курус күҥҥэ дылыта…

Ийэм Евдокия Егоровна биһигини иитээри үлэттэн ордубата: повар да, лааппыга атыылааччы да буола сылдьыбытын билэбин. Онон борбуйбун көтөҕүөхпэр диэри сайын аайы эһэм Дмитрий Павлович миигин көрөн-истэн улаатыннарбыта, сөбүгэр дьарыйан, ардыгар атаахтатан, уол оҕо бары дьарыгын сатыыр буоларга уһуйбута. Күүтүүлээх сайыҥҥы каникул саҕаланнар эрэ, Толоонтон көс курдуктаах сиргэ – Соҕуруу Эбэҕэ барарбыт. Эһэм атын миинэн баран, миигин кэннигэр мэҥэһиннэрэрэ, ол кэнниттэн айахпыт хам буолбакка кэпсээн-ипсээн бөҕөнөн аар тайҕа иһигэр киирэн, ыркый ойуурунан айаннатан дибдитэрбит.

Биһиги, Карповтар, өбүгэ саҕаттан олохпут дьиэбититтэн арҕаа, икки биэрэстэлээх Хоспохтоох диэн сиргэ баар. Алаас Эбэттэн Хоспохтооххо лиҥкир тиит тыаны быһа түстэххэ, төрүт-уус алааспытыгар, оттуур сирбитигэр тиийэрбит. Бу алаас халдьаайытыгар дьон уҥуохтарын кириэстэрэ, баҕана мастара эмэҕирэн тураахтыыллар – ити биһиги төрүттэрбит, ол иһигэр аҕам, уһуктубат уһун ууларыгар утуйа сыталлар. Дойдубар тиийдэхпинэ, мин ытык дьонум кэриэстэригэр сүгүрүйэбин, санаабар, кинилэр миэхэ күүс-уох биэрэн, мэлдьи алгыыр-араҥаччылыыр курдуктар…

Алааспыт барахсан сайын ахсын «кэлиҥ, күөх быйаҥтан сомсуммахтаан хаалыҥ» диэн ыҥырар-угуйар курдук күөх отунан тыа саҕатыгар тиийэ тыалтан долгулдьуйа олороро көрүөххэ сүрдээх да үчүгэй буолара! Аны тыатыгар куобахха сохсо охсорбут. Абаҕам Бүөтүр үс биэрэстэлээх сиртэн сүүрбэччэ куобаҕы сүгэн киирбитин туһунан сөҕөн-махтайан кэпсииллэрэ. Аны санаатахха, бэйэтин кыанар, тэтиэнэх киһи эбит.

Ити курдук эһэбин батыһа сылдьан, хайа баҕарар саха оҕотунуу үлэлии, бултуу-балыктыы үөрэммитим – ходуһабытыгар Бөтүрүөп Таҥаратын саҕаттан күһүн маҥнайгы хаһыҥнар түһүөхтэригэр диэри илиибитинэн охсон, мунньан, кэбиһэн моой оттуурбут, быыспытыгар күөлгэ мундуга, бөчөөххө илимниирбит, туу угарбыт, эһэм така-йыытынан куобахха, куртуйахха туһахтыырым, сохсо иитэрим, хороччу улаатарым саҕана саас-күһүн куска, куобахха сааланарым. Эһэм, омос көрдөххө, сүрдээх дьиппиэн, оҕо бары улаханнык толлор, саллар кырдьаҕаһа этэ. Оттон мин куруутун эҥээрдэһэ сылдьар буолан билэрим – ис дьиҥэр киирдэххэ, кини курдук аламаҕай, элбэҕи билэр-көрөр, сүбэ-ама буолар, сиэнин ис сүрэҕиттэн таптыыр үтүөкэннээх эһэ ахсааннааҕа эбитэ буолуо.

Эһэм да, аҕам да коммунист этилэрэ, ол иһин наар кырдьыгы эрэ өрө туппутунан олорон аастахтара. Син оччотооҕу партия чилиэннэрин курдук, тус бэйэ туһугар, байарга-тайарга дьулуһуу диэни билбэккэ, бар дьон бүттүүнэ дьоллоох-соргулаах олохтоох буолуохтаах диэн өйдөбүлүнэн салайтараллара. Эһэм Эрилик Эристиинниин араа-бараа саастаах үөлээннээхтэр, суруйааччылыын алтыс-пыт кэмнэриттэн кэпсиирэ да, оҕочоос буолан долоҕойбор тутан хаалбатахпын, арай наар: «Сэмэн эбэтэр Дьаакыбылап», – диирин өйдүүбүн. Эрилик Эристиин туһунан кинигэҕэ эһэм кылгас ахтыыта киирбит, онно суруйааччы айымньыларыгар баар дьон кимнээхтэрин ыйбыт эбит.

Аҕам сэрии ыар сылларыгар холкуоска бэрэссэдээтэллээбит, хоргуйуу ыар күннэригэр дьону салайыы курдук кытаанах эбээһинэһи толорбут. Кинини кытарар кыһыл этэ диир сатаммат, сорох былдьаһыктаах түгэннэргэ баартыйа тыйыстык ирдиир, дьону үлүгэргэ умса анньыах айылаах дьа-һалларын ылыммакка, бар дьонун тыыннаах хаалларарга туһуламмыт хардыылары оҥортуур эбит. Ол курдук сэрии сылларыгар Хатылыга «Кыһыл ыллык» уонна Чакырга Молотов аатынан холкуос-тарга бэрэссэдээтэллии сылдьан, хоргуйан барыы буолбутугар ыксаан, кистээн сүөһү өлөттөрөн, бар дьонун аһатан, холкуоһун дьонун үрүҥ тыыннарын өллөйдөөбүтүн туһунан оччотооҕу кэм тыыннаах туоһулара – кырдьаҕастар кэлиҥҥэ диэри махтанан ахталлара. Хата, оччолорго ону үөхсэр-харсар биир да хара санаалаах көстүбэтэҕэ аҕам дьоло эбит.

Толооҥҥо дэриэбинэ ортотугар хатыйыы күрүөлээх дьиэбин мин сааһыран баран сотору-сотору ахтан-санаан кэлэбин, түүлбэр кытта киирэр. Ол дьиэм таһыгар оонньуурбун, бүтүннүү алтан төбө ньээм-ньээминэн саһарар тэлгэһэҕэ сымнаҕас окко сытарбын өйдүүбүн. Итиннэ мин биэс саастаахпар диэри олорбуппут. Ийэм, Кытаанахха олорбут Абрамовтар диэн бэйэлэрин кэмигэр кыахтаах, баай аҕа ууһун кыыһа, олус эрдэ төгүрүк тулаайах хаалаахтаабыт. Ол кэнниттэн мин аҕабын кытта билсэн, Чакырга сүктэн кэлбит.

Аҕам өлбүтүн кэнниттэн кыра оҕолоох огдообо дьахтар отун-маһын булунан, сүөһүтүн көрөн соҕотоҕун олороро уустугуттан Мындаҕаайыттан сылдьар Егор Аммосов диэн киһиэхэ эргэ тахсыбыта. Онон биһиги Толоонтон көһөр буоллубут. Мин кииринньэҥ аҕа буола сылдьыбыт Дьөгүөрү үдүк-бадык соҕус да буоллар өйдүүбүн. Тута: «Аҕаа!» – диэбиппин, кини элбэх баҕайы кэмпиэт аҕалан, ытыһым муҥунан кутан үөрдүбүтүн умнубаппын.

Толоонтон көһөрбүтүгэр, биһиги өлүүбүт диэн төбөлөөҕүнэн 14 сүөһүнү илдьэр буоллубут. Өр баҕайы айаннаабыппыт, суола-ииһэ суох Дьаҕа баһыттан тахсан, оруобуна били Уулаах Уйбаан «сиһиктээх систэри бысталаан, адырҕайдаах аппалары туораталаан Дьаҕа Баһын ыырыттан тахсан, дьиэрэҥкэйдиир тиҥилэх тиэрийбит дьэрэкээн хонуулар устун» диэбитинии, ыт мунна баппат ыркый ойуурдартан тахсан, Амма өрүс үрдүгэр киэҥ нэлэмэн хочолорунан хаамтаран алтахтатан, Мындаҕаайыга тиийбиппит.

Мындаҕаайыга баара-суоҕа 6 саастаахпар мин оскуолаҕа бэлэмнэнии эбэтэр норуокка этэллэринии «ньулубуой» кылааска киирбитим. Олус аһыныгас, үчүгэйкээн майгылаах учууталга түбэспитим (хомойуох иһин, аатын умнан кэбиспиппин). Дьиэбэр барарбар миигин атааран, суолум айаҕар киллэрэн биэрэрэ, оттон дьиэбэр Бэскэ диэри син балачча ырааҕа, икки биэрэстэ курдук быһыылааҕа.

Суолбар баар үрэх сыырыгар оонньоон, дьиэбэр бүтүннүү хаар-сиик буолан тиийэрбин өйдүүбүн. Саас биирдэ сыыртан өҥөс гыммытым – үрэхпит эстэн, мууһа күөрэлэнэн, көмүөл бара турар эбит. Дьиэбит сүүрүк хоту, аллараа баара, онон муустарга олорсон устар санаа көтөн түстэ да, суумкабын туппутунан кытылы кыйа баран иһэр мууска ойон киирэн, айаннатан даллаһыта турбутум. Хата, соччо ырааппакка, дьиэм туһаайыыта от-мас сыыр үөһэ элэҥнээн көстөрүн кытта, кытылга ойон кэбиспитим. Дьиэбэр ол «дьоруойдааһыным» биллибэккэ хаалбыта. Ийэм ону көрбүтэ буоллар, төһөлөөх куттаныа этэй диэн билигин кэлэн кэмсинэбин.

Оскуолаҕа куһаҕана суохтук үөрэммитим. Мындаҕаайыга сылдьан, арааһа, 5—6 саастаахпар буолуо, Дьокуускайтан тахсан практикалана сылдьар студент уол саахымат хаамыыларыгар үөрэппитэ. Итинтэн ыла саахымат-дуобат олоҕум арахсыспат аргыстара буолбуттара. Кыра кылааска үөрэнэ сылдьан, саахымакка күрэхтэһэ аан маҥнай куоракка киирбиппин өйдүүбүн. Кыһыҥҥы каникулга тоҥ хаһаа автобуһунан түҥкүр-таҥкыр түһэн айаннаабыппыт. Тииспит тииспитигэр сыстыбат гына бабыгыраччы тоҥмут оҕолор иккис оскуола интернатын булан, икки этээстээх сылаас баҕайы дьиэҕэ киирэн, биирдэ харахпыт сырдаабыта. Бачча улахан дьиэ оһоҕо суоҕун, ол оннугар түннүктэр анныларыгар ыйаммыт кэрдиистэнэр хаптаҕай турбаларынан ититэллэриттэн сөхпүппүт, итинник аан маҥнай радиаторы көрбүтүм.

Туох эрэ табыллыбакка, онно саахымакка күрэхтэһиннэрбэккэ эрэ биһигини Чурапчыбытыгар төттөрү утаарбыттара. Ол да буоллар ити кэмтэн ыла саахымат-дуобат дуоскатын кыбыммытынан сылдьабын, урутаан эттэххэ, билигин саахымат-дуобат республикатааҕы киинин салайарым быһыытынан, Сахабыт сирин бастыҥтан бастыҥ саахыматчыттарын, дуобатчыттарын кытта күннэтэ эҥээрдэһэбин, бэйэм дуобакка маастарга кандидат нуорматын толорбутум.

Бииргэ оонньоон-көрүлээн улааппыт оҕолорбуттан Чакырга сайын аайы элбэхтэ моҕотойдоон сүүрбүт-көппүт, сөтүөлээн чомполоммут уолбун Проня Егоровы, билиҥҥэ диэри дьиэ кэргэнинэн доҕордоһор атаспын Мэхээччэ Ефремовы анаан-минээн ааттаталыам этэ. Сайын буолла да, эһэм атынан кэлэн Чакырга илдьэ барара. Бэл, Мындаҕаайы курдук ыраах, быстар куһаҕан суоллаах-иистээх дойдуттан эһэм «ньулубуойу» бүтэрдэҕим сайын эмиэ кэлэн, эмиэ аппытыгар мэҥэстэн, үөрэ-көтө дойдубутугар айаннаабыттаах этибит.

Биһиги дьиэ кэргэн Мындаҕаайыга син бэркэ олоруох быһыылаахпыт даҕаны, кииринньэҥ аҕам күүскэ иһэн кэбиһэр буолан иэдэппитэ. Арыгы эҥээрдэспит ыал олоҕо туох аанньа буолуой, били 14 сүөһүбүт ханна да барбыта биллибэккэ эстибитэ, соҕотох ынахтаах эрэ хаалбыппыт. Мин маҥнайгы кылааска төрдүс чиэппэргэ үөрэнэн эрдэхпинэ, ийэм Дьөгүөрдүүн туох да айдаана, иирээнэ-чаараана суох арахсан хааллылар. Онон муус устарга сир-дойду садырыын уутунан туолан турдаҕына, тэлиэгэлээх атынан Чурапчы сэлиэнньэтигэр көһөн киирдибит. Суол уһун буолан, аара Баһылай алааһа диэн сиргэ ыалга хонон аастыбыт.

Чурапчыга кэлэн, биир томтор аннынан тэлиэгэбит талыгыратан эрдэҕинэ, эмискэ үрдүбэр бөдөҥ баҕайы саҥалаах киһи соҕотохто тоҕо барбытыгар, куттанан тэлиэгэ түгэҕэр умса түһэ оҕустум. Саҥа тохтообокко биир күрүс эҥээрэриттэн дьиктиргээн, өндөйөн тулабын көрбүтүм – остуолбаҕа ыйаммыт тэллэҕэр тэрил иһиттэн кэпсээн-ипсээн аан дойдуну толорон доргута аҕай турар эбит. Кэлин билбитим – ол военкомат томторо диэн эбит.

Хайа эрэ ыал олбуоругар киирдибит, дьиэлээх-тэр «һуу-һаа» буолан тахсан, биһигини эргийэн кэбистилэр, көрөн-истэн айманан, ону-маны ыйы-талаһан бардылар. Дьэ, ити курдук ырыаҕа ыллам-мыт, хоһооҥҥо холбоммут, киэргэттэхтэринэ «тоҕус томтордоох иккис Москва» диэн ааттыыр Чурапчы сэлиэнньэтин дьоно буоллубут.




2


Ол күн Дьөгүөр биһигини Чурапчыга аҕалан баран Мындаҕаайытыгар төнүннэ, оттон ийэм биһикки ыалга дьукаах киирдибит. Ийэбиниин, бэйэбит бас билэр дьиэтэ суох дьон, мин улаатыахпар диэри Чурапчыга ыалтан ыалга көһөн да биэрбиппит! МТС, райпо, оскуола, интернат-оскуола томтордоро, Милиция Алааһа, Арҕаа Бас, Илин Бас…

Чурапчы орто оскуолатыгар маҥнайгы кылааска төрдүс чиэппэрбин салҕаан үөрэнэрбэр, бэрт кытаанах ирдэбиллээх, чиҥ-чаҥ Александра Ильинична Герасимова диэн учууталга түбэстим. Өссө аатырбыт Уот Субуруускай уола Константин Николаевич эмиэ үөрэппитэ. Ийэм үлэлии бардаҕына, соҕотох хаалабын. Ол иһин ийэм көрдөһөн, уолбун ханна да хаалларар сирим суох диэн сайабылыанньа суруйан, мин үсүһү бүтэриэхпиттэн урукку педучилище базатыгар тэриллибит интернат-оскуолаҕа төрдүс кылааска киирбитим.

Манна үөрэммит сылларбын олус күндүтүк саныыбын. Киэҥ нэлэмэн Чурапчы эбэ кытылыгар үс муус маҥан куба олорорунуу, интернат-оскуола маҥан оппуохалаах корпустара ыраахтан туналыһаллара. Маҥнайгыта – үөрэнэр, иккиһэ – олорор, үсүһэ – остолобуой уонна мастарыскыай дьиэлэрбит буолаллара.

Иитээччилэрбит, учууталларбыт олус да үчүгэй дьон этилэрэ, республика араас муннуктарыттан кэлбит, үксүлэрэ тулаайах оҕолорго кинилэр туох да омуна суох ийэлэрин-аҕаларын солбуйбуттара. Иитээччибит Евдокия Яковлевна Барашкова хас биирдиибитин араҥаччылыы, харыстыы сылдьар курдуга, икки чаас уруок аахтарара. Иллэҥ кэммит буоллаҕына, Евдокия Яковлевна кинигэ тутан киирэрин кэтэһэрбит. Иитээччибит сахалыы кинигэлэри дорҕоонноохтук ааҕара. Тылбаастанан тахсыбыт «Тисса үрэх үрдүгэр» диэн курдук быһылааннаах сырыылардаах, үспүйүөннээх, хабыр киирсиилэрдээх айымньыны аахтаҕына, сэриигэ сылдьан суругунан билсибит кыыһыгар Терезаҕа айаннаан иһэр Иван Белограйы аара суолга өлөрөн баран, кини оннугар кубулунан кыыска тиийбит үспүйүөнү субу тутан ылыахтыы абаран-сатаран, сутурукпутун бобуччу тутан, тыынарбытын да кыатанан истэрбит.

Сэрии ветерана, бойобуой уордьаннаах иитээччибит Петр Егорович Спиридонов туһунан үөрэтэр ньымалардаах, оҕолору бэйэтигэр тардар, улаханнык ытыктыыр иитээччибит этэ. Кини сэрииттэн аҕалбыт, мэктиэтигэр, Чурапчы күөлүн уҥуоргу өттүгэр тиийиэх айылаах сытыы уотунан быһа курбуулуур немецкэй трофейнай банаарыгар ымсыыран да биэрэрбит! Бэйэбит бокуойа суох тутааҕын бобута туппахтаатахха «жык-жык-жык» тыаһаан, атахпыт эрэ иннин сырдатар мөлтөх уоттаах-күөстээх аҕыйах банаардаах этибит.

Интернат-оскуола маҥнай утаа түөрт эрэ кылаастааҕа, онон кырабыт эҥин диэн үлэттэн куотунар кыах суоҕа. Бары кылаас оҕото көхтөөхтүк кыттан, уокка оттор маспытын эрбээн, хайытан, оһох ахсын таһан кэбиһэрбит. Кырдьыгынан эттэххэ, ньуулдьаҕай оҕолорго күн ахсын сүктэриллэр бу үлэ илистиилээх этэ да, тото-хана аһаатыбыт, оонньоон-көрүлээн бардыбыт да, сылайбыппытын тамты умнан кэбиһэрбит. Остолобуойбут аһа олус тотоойу этэ, килиэби, хааһыны испит ыларынан мотуйарбыт, аны күнүс хайаан да миин иһэрбит, бырааһынньыкка хаһан да харахтаабатах дьаабылыкабытын амсайан үөрүү-көтүү буолара.

Саллаат гимнастеркатыгар маарынныыр алтан тимэхтэрдээх күрэҥниҥи формалаах этибит, онтубутун эмиэ алтан бирээскэлээх курунан быакаччы тардынан кэбиһэрбит. Улахан бырааһынньык иннинэ курбутун, тимэхтэрбитин тиис суунар бороһуогунан чаҕылыйа сылдьар гына кылбаччы ыраастыырбыт. Өссө сайын кэтэрбитигэр лаахтаах куондардаах фуражка биэрэллэрэ, бары эрээттэринэн кэккэлээн, ньиргиччи ыллыы-ыллыы, тэҥҥэ үктээн хааман оскуолаҕа, остолобуойга баран иһэн, кыайыылаах Кыһыл Аармыйа саллааттарыттан итэҕэс санаммат быһыылаахпыт.

Аны оскуолабытыгар духовой оркестрдаахпыт. Ырыа уруогар олус истиҥ, нарын куоластаах Анна Николаевна Седалищева үөрэтэрэ. Билигин дөрүн-дөрүн республика радиотынан Анна Николаевна «Үрүмэччи маҥан аты» толорбутун биэрдэхтэринэ, учууталбыт умнуллубат куолаһа уйаҕастык ыллаан намылытан бардаҕына, интернат-оскуолабын, миигинниин биэс хааһах диэбиккэ дылы, оскуола хоругар ыллаһарбын сүр сытыытык өйдөөн кэлэбин. Оччотооҕу хартыына субу кэлэр – түннүктэрбит бүтүннүү кырыаран, таһырдьа туох да көстүбэт тымныыта будулуйар, оттон ичигэс дьиэ иһигэр Анна Николаевна дирижердаан далбаатанарыгар сөп түбэһиннэрэн биһиги күргүөмүнэн ыллаан ньиргитэрбит.

Аны Өктөөп эбэтэр Пиэрибэй Маай бырааһынньыктарыгар оркестрбыт турбалара сатарыйа тыаһаан, алтан тэриэлкэлэри охсуолаан чаҥырҕатан, эрчимнээхтик тэбис-тэҥҥэ үктэнэ-үктэнэ: «Вихри враждебные веют над нами…» – диэн ыллаабытынан барааттааччылар холуонналарыгар кутулла түһэрбит.

– Оо, интернат-оскуолалар кэллилэр! – диэн дьон хайгыыр-киһиргэтэр сиэринэн саҥа аллайалларын үөрэ истэрбит.

Интернат-оскуолаҕа учууталларбыттан өссө нуучча тылын үөрэппит Николай Николаевич Павлов-Тыаһыты, биологияны наһаа кэрэхсэбиллээхтик биэрбит Василий Федотович Ермолаевы ахтыам этэ. Биирдэ Василий Федотович хантан эрэ чырылыы-чырылыы сүнньэ суох курдук төбөтүн хайа баҕарар, ол иһигэр 360 кыраадыс тохтоло суох эргичитэр көтөрү кылааска аҕалла уонна:

– Бу вертишейка диэн буолар, – диэтэ.

Сөҕөрүм диэн баар – онтон ыла хаһан да вертишейканы көрбөтөҕүм. Кэлин анаан-минээн биология кинигэлэриттэн биллэхпинэ, вертишейка диэн хотугулуу-арҕаа Африка уонна Евразия тыаларыгар баар тоҥсоҕойдуҥулар биис уустарыгар киирсэр сүүрбэччэ сантиметр уһуннаах чыычаах диэбиттэр. Василий Федотович ити вертишейканы хантан булбута буолуой, биһиги Чурапчыбыт тыатыттан дуо? Ити курдук интернат-оскуолаҕа олорон, бэртээхэй учууталларга үөрэнэн, үтүөкэн уолаттардыын доҕордоһон, билбэтэхпин билэн, көрбөтөхпүн көрөн, коллективка сылдьарга үөрэнэ улааппытым.

Оскуолабытыгар пионерскай дружинабыт герой-пионер Леня Голиков аатын сүгэрэ, баһаатайбыт Иннокентий Семенович Окоемов наһаа кыһаллан-мүһэллэн араас өрүттээх үлэни ыытара, бэйэтэ каллиграфическай буочарынан олус ыраастык, кыраһыабайдык суруйарыгар ымсыырар этибит. Үөрэнээччилэртэн дружинабыт сэбиэтин салайар Валя Баишева, Нюта Местникова диэн, маҥан булууһаларын сиэҕигэр түөртүү кыһыл бэлиэҕэ тиийэ анньыммыт (звеньевой биир, этэрээт командира икки оннук бэлиэлээх буолаллара) биһигинньик дьоҥҥо иэдээннээх хотун кыргыттардаах этибит. Түөрт муннуктаах хордуону жетон диэн биэрэллэрэ, мэниктээн элэҥнэтэ сылдьан хотуттарга түбэстиҥ да, быраһаай – жетон муннуга быһа кырыллара. Түөрт муннуга быһыннаҕына оскуолаттан үүрүллүөххэ сөптөөх куттал суоһуура. Инньэ гынан баһаатай да, учууталлар да, «хотун» кыргыттар да бэрээдэги сүрдээхтик тутан, араас кэрэхсэбиллээх дьаһаллары ыытан, дружинабыт бүтүн Советскай Союз пионерскай дружиналарын ортолоругар бастаан, улахан үөрүү-көтүү буолбуттааҕа.

Биирдэ муус устар ылааҥы күнүгэр үөрэнэ олордохпутуна, арай ааммыт тэлэллэ түстэ, олус үөрбүт киһи хаһыытаан бытарытта:

– Оҕолоор! Космоска сэбиэскэй киһи көппүт!

Биһиги бары «ураалаан» ньиргиппитинэн таһырдьа сырсан таҕыстыбыт. Линейка, уруйдаһыы-айхаллаһыы бөҕө буолбутун өйдүүбүн. Оччолорго «космос» диэн тугун билбэт да буолларбыт, туох эрэ сөҕүмэр кыайыы ситиһиллибитин эппитинэн-хааммытынан сэрэйбиппит, ыйга дуу, сулустарга дуу киһи көппүтүн тэҥэ санаабыттаах этим.

Кыра эрдэхпититтэн доҕорбунуун Петя Калачев-туун лүөччүк буолуохпут диэн ыраланар этибит. «Валерий Чкалов», «Повесть о настоящем человеке», «Два капитана» курдук киинэлэргэ баар тоҥтон толлубат, ириэнэхтэн иҥнибэт хорсун-хоодуот Валерий Чкалов, Алексей Маресьев, Саня Григорьев курдук лүөччүктэр сырдык уобарастара оннукка иитэллэрэ. Бэһис кылааһы бүтэрэн баран, Петялыын Дьокуускайга юннатскай станцияҕа оҕуруот аһын бүөбэйдэһэргэ үөрэнэ киирэр буоллубут. «ЯК-12» диэн лүөччүктэн ураты үс эрэ киһи олорор, тэмэлдьигэни санатар сөмөлүөккэ киирэн үөрэ-көтө олордубут. Баһаатайбыт нуучча кыыһа баара. Сотору кылгастык сүүрэн баран, сөмөлүөппүт өрө эгдэс гынна уонна чэпчэкитэ бэрт буолан, кыра да тыалы билинэн, өрө-таҥнары биэтэҥнэппитинэн барда. Өр-өтөр буолбакка, Петям хотуолаан ыһылыннарда. Мин тулуһа сатаатым да, аллара, атахпыт анныгар Өлүөнэ эбэ иэнэ киэҥник-куоҥнук чаҕылыҥныырын саҕана, эмиэ тулуйбакка, хотуолаан эрэрбин эрэ өйдөөн хааллым. Маҥан аэровокзалыгар салбаҕырбыт сирэйдээх-харахтаах, салыбырас буола мөлтөөбүт дьон киирдибит.

– Туох ааттаах тимир доруобуйалаах дьоно лүөччүк буолалларый? – дэһэбит.

Петя биһикки ити курдук лүөччүк буолан бүттэхпит.

Хата, юннатскай станцияҕа бэркэ сылдьыбыппыт, оҕуруот аһын олордорбут, көрөрбүт-харайарбыт. Дьиибэтэ диэн, буспут кыһыл помидору аанньа ахтыбат этибит, ол оннугар сиикэй помидору хардырҕаччы сиирбит. Арааһа, туох эрэ битэмиин тиийбэккэ, итинник аһыырбытыгар күһэйбит буолуохтаах.

Сайын үчүгэй даҕаны, кыһын бэйэтэ туһугар ураты тардардаах. Кыһыҥҥы тымтар тымныыга дьиэҕэ хаайтаран олорон, аны биир үтүө дьыалаҕа өрүһүлтэтэ суох өйдүүн-сүрэхтиин бас бэриммитим – наар кинигэ ааҕан тахсарым. Манна маҥнай өй укпут, литератураҕа тапталы сахпыт киһинэн мэлдьи ырыа-хоһоон аргыстаах сылдьарын иһин Ойуунускай диэн хос ааттаммыт Бүөтүр Захаров буолар. Кини олус элбэҕи аахпытын быыс-тала суох кэпсиирэ, бэйэтэ эмиэ хоһоон суруйарга холоноро. Ити курдук мин улам кинигэ ааҕыытын «ыарыытыгар» ылларбытым.

Муус-мас киллэриитин курдук үлэлэри уонна дьиэтээҕи сорудахтарбын толордум, уруоктарбар бэлэмнэнним да, кинигэ умсугутар-тардар дойдутунан айаннааммын киэһэ буолбутун билбэккэ да хааларым. Ити сылларга мин хараҥа тастаах, нууччалыы-сахалыы тылларынан тахсыбыт «Дьулуруйар Ньургун Боотуртан» саҕалаан, саха суруйааччыларын айымньыларын барытын кэриэтэ ааҕары ааһан, өссө нууччалыыттан сахалыы тылбаастаммыт «Эдэр гвардияны», «Ыстаал хайдах хатарыллыбытын» эҥин биир тыынынан бүтэртээбитим.

Билигин биири бигэтик этэбин – кинигэ киһиэхэ истиҥ доҕор, эрэллээх сүбэһит диэн саамай сөпкө этэллэр. Сахам сирин, төрөөбүт норуотум уруккутун кэрэхсииргэ, киэн туттарга «Сааскы кэмтэн» үөрэммиппит, «Эдэр гвардияттан» Ийэ дойдуну төлөннөөхтүк таптыыр патриотизм тыыныгар иитиллибиппит. Билигин төһө да ахсарбат быһыынан ахтыбыттарын иннигэр, «Чөөчө», «Чүөчээски» курдук кэпсээннэр кырдьыксыт, чиэһинэй буоларга, батталы-атаҕастабылы утары охсуһарга уһуйбуттара, оттон улаатан барыыбар Войнич «Тигээйитин» сыттыгым анныгар укта сылдьан ааҕарым, эр киһи быһыытынан кытаанах, бэйэ соругун толорорго дьулуурдаах, кыра ыарыы аайы ынчыктаабат, ханнык да ыарахаттарга бэриммэт күүстээх санаалаах буоларга Риварес уобараһа ыҥырара.

Оту-маһы тардыалаһан эрэр кэммитигэр Чурапчыга Ленинградка үрдүк үөрэҕи бүтэрэн кэлбит учуутал, I разрядтаах тустуук Дмитрий Петрович Коркин дьону эрчийэн эрэр үһү диэн буолла. Биһиги сүрдээҕин сэҥээрэн, интернакка кэпсэтиибит наар ол туһунан буолла. Спортсмен диэни харахтыы илик оҕолор санаабытыгар I разряд диэн айыы бухатыыра Чурапчы сиригэр бэйэтинэн кэлбитигэр тэҥнээх курдуга. Арай эмиэ сурах тарҕанна: «Коркин интернат-оскуола оҕолорун эмиэ тустууга үөрэтэ кэлэр үһү».

Дьэ, бары тустуохпутун, кыахпытын билиэхпитин туох да наһаа баҕардыбыт, дьиҥэр ыллахха, оскуолаҕа араас куруһуок баара – хаартыскаҕа түһэрэргэ, уһанарга үөрэтэр, тыыннаах муннукка (онно, бэл, сибиинньэлээх этибит) төһө баҕарар дьарыктаныахпытын сөп этэ да, уолаттар үксүбүт тустуу диэн баран утуйар да уубутун умуннубут. Дьэ, ол кэнниттэн биир үтүө күн кэтэһиилээх тренербит бу киэһэ секция ыыта кэлэр диэн буолла.




3


Кыра кулууптаах этибит. Онно муннукка бааталара онон-манан логлоруттан тахсыбыт мааттар кыстанан тураллара. Тренировочнай көстүүмнээх, аргыый аҕай саҥарар тренер секцияҕа кэлбит оҕолору кэккэлэтэн баран маҥнай билистэ, тус-туу туһунан билиһиннэрии быһыытынан кэпсээтэ, аан дойдуга аатырбыт бөҕөстөрү аҕынна, эт-хаан өттүнэн эрчиллиилээх киһи дэгиттэр үчүгэй буоларын, өйө-санаата чэбдик, чөл сылдьарын тоһоҕолоон бэлиэтээтэ. Онтон муннукка турар мааттары тэлгэттэрдэ, итиэннэ онно оонньотон, сүүрдэн-көтүтэн таҕыста.

Биһиги, кыра бэдиктэр, мэниктиир кыах бэриллибититтэн мааспыт табыллан, оонньоон булумахтанныбыт, ол быыһыгар тустан да хачыгыратан ылабыт. Бөтүрүөбүс тугу да саҥарбакка, тула хаама сылдьан болҕомтолоохтук одуулаһар. Билигин санаатахха, кини айылҕаттан мындыр педагог буолан саамай сөптөөх хайысханан барбыт – тута тустуу албастарынан, эти-сиини илиһиннэрэр кытаанах бырахсыыларынан чаҕытан кэбиспитэ буоллар, ахсааннаах оҕо секцияҕа иҥнэн хаалыа, үгүс өттө тустуунан салгыы дьарыктаныан баҕарыа суоҕа эбитэ буолуо. Оттон эргийэ сылдьан оонньуурбутун көрөрө диэн – биһигиттэн хайа уол ордук имигэстик хамсанарын, утары бырахсар дьоҕура төһө түргэнин, сүһүөхтээҕин эҥин, быһата, тустууга сыһыаннаах буолуон сөптөөхтөрү чинчийэн билгэлиир эбит.

Ити курдук оонньуу-көр быһыытынан барбыт маҥнайгы дьарыкпыт бүттэ, биһиги Бөтүрүөбүс хаһан кэлэн секция ыытарын кэтэһэр дьон буоллубут. Кини нэдиэлэҕэ иккитэ-үстэ Чурапчыттан анаан-минээн кэлэн, киэһэтин дьарыктаан барара. Мэниктииргэ көҥүл ылбыттыы, мин биир секция кэмигэр наһаалаан кэбистим быһыылааҕа – Бөтүрүөбүс кытаанах баҕайытык окумалбыттан тутан лэглэритэн илдьэн, хараҥа хоско хаайан кэбис-тэ. Хайыахпыный, оҕолор күлсэн-салсан, оонньоон-көрүлээн ньамалаһалларын истэ-истэ хараҥа хоско турдаҕым дии. Онтон ыла Бөтүрүөбүс баарыгар бары да наһаалаабат буолбуппут, кэм нэмин билэн сүүрэр-көтөр этибит.

Бэйэтэ да оҕо уйулҕатын ымпыгар-чымпыгар тиийэ билэр, кытаанахтык көрөн кэбистэ да – ханна да барыаххын-кэлиэххин билбэккэ, сири-буору кымыстыы турар буолаҕын. Сыыйа-баайа тустуу албастарын үөрэтиигэ, бэйэ-бэйэни кытта тустан көрүүгэ киирэн бардыбыт. Ордук кыһаллан-мүһэллэн бииргэ үөрэнэр уолаттарбыныын Петр Калачевтыын (кэлин спорт маастара), Виктор Малышевтыын эрчиллэрбит.

Аан маҥнай күрэхтэһиигэ кыттар буоллубут, бадаҕа, 1960 с. этэ. Хаһан эрэ Сеня Оноев кууппал кириэһин төбөтүгэр кыһыл былааҕы баайбыт Таҥаратын дьиэтигэр оройуон оҕолоругар көҥүл тус-тууга бастыыр иһин күрэхтэһии буолбута. Киһи бөҕө мустубут этэ, мин таптаан туттар ньымаларбынан – атахха киириинэн, өттүктээһининэн хас да утарылаһааччыбын ыраастык хоппутум, тиһэх киирсиигэ уҥуоҕунан да улахан, күүһүнэн да баһыйар уоллуун тиһэх свистокка диэри иэмэх мас-тыы эрийсэн очконан баһыйтарбытым.

Иккис миэстэ буолан грамота туттарбыттарыгар, атаҕым сири билбэт буолуор диэри үөрбүтүм. Тута ийэбэр наҕараадабын көрдөрө охсоору ыстаммытым. Ийэм маҥнай утаа, «илиигин-атаххын эчэтиэхтэрэ» диэн, мин тустарбын сөбүлээбэт этэ. Ол киэһэ чэй иһэ олорон, грамотабын эргим-ургум тута-тута, аҕам ыһыахха хапсаҕайдаһан тустарын туһунан, бэйэтэ ыйааһына кыра да буоллар, бөдөҥ баҕайы бөҕөстөрдүүн харса суох хачыгыратыһар үгэстээҕин кэпсээбитэ. Онон төрүт-уус хааныгар баар дьыала диэтэҕэ буолуо – итинтэн ыла тустарбын бопсубат-хаайсыбат буолбута.

Аны биһиги дьиэ кэргэҥҥэ улахан уларыйыы буолла. Бэһис кылааска үөрэнэ сырыттахпына, ийэм хоско ыҥыран киллэрдэ уонна:

– Һыллыай, аҕата суох иккиэйэҕин эрэ олорорбут куһаҕан баҕайы дии, мин кэргэн тахсаары гынабын, ону эн туох диигин? – диэтэ.

– Кимиэхэ? – диэн ыйытан чап гыннарабын.

– Хатылыга үлэлиир Миитэрэй Сэдээлиһэп диэн киһи, – диир ийэм оргууйдук.

– Бэрт буоллаҕа дии, – диибин.

Онуоха ийэм кууһан сыллаан ылаахтаата, арааһа, утарсыа, сөбүлүө суоҕа дии санаан баран, кэбирэхтик сөбүлэспиппиттэн үөрдэҕэ.

Дьоппуону кытта сэрии кыттыылааҕа, иккис кииринньэҥ аҕам буолбут Миитэрэй олус бөдөҥ-садаҥ көрүҥнээҕэ уонна, бөдөҥ киһи холку буолар дииллэринии, хаһан да кыыһырбат киэҥ көҕүстээҕэ. Кэлин мин ССРС-ка бастаабыт сылбар күһүн сэтинньигэ өлбүтэ, ити тухары биирдэ мөхпүтүн, куолаһын улаатыннарбытын өйдөөбөппүн. Маҥнайгы кииринньэҥ аҕабыттан арахсан кэһэйбит буолан, кинини аҕаа диэн ааттаабатаҕым, хата, Миитэрэй оҕолордоох эбит, онон соҕотохто Аня уонна Дима диэн эдьиийдээх бырааттанан хаалбытым. Дьэ, ыал ыалынан буолан, ньиргийэ түстүбүт. Ийэм Миитэрэйдиин өлүү араартыар диэри наһаа тапсан олорбуттара. Мин оскуолаҕа үөрэнэн бүттүм да, спортивнай саала диэки ханньары таттара турабын.

Маҥнай утаа тустуунан оонньуу-көр курдук дьарыктанан иһэн, быһа холоон 13—14 сааспыттан, хайаан да үчүгэйдик тустуохтаахпын, Саха сирин ааһан, Россия, Союз таһымнарыгар тахсыахтаахпын диэн бигэ сорук туруоруммутум. Оннук санааны тренербит Бөтүрүөбүс да иитиэхтиирэ, кини интернат-оскуола оҕолорун эрчийэр кэмигэр: «Оҕолоор, эһиги кэлин Советскай Союз чемпионнара буолуоххут», – диирэ хайаан да туолуохтааҕар адьас итэҕэйэ, инникибитигэр бүк эрэнэ истэрбит. Оттон, кырдьыгынан эттэххэ, оччолорго, 50-с сыллар ортолоругар, тустууга спорт маастарын тыыннаах бэйэтин көрбөккө да сылдьан, тиэргэммититтэн тэлэһийбэтэх, Москва, Ленинград курдук улахан куораттары түүлбүтүгэр да оҕустарбатах, Дьокуускайга да ахсааннаахтык сылдьыбыт оҕолорго, Чурапчыга локомотив күүһүнэн барбах умайар лаампатын борук-сорук саалатыгар, бааталара орҕосто сылдьар мааттарга кэккэлэһэн турар оҕолор иннилэригэр тренербит: «Эһиги Союзка бастыаххыт», – диэһинэ баһырхай былаан эбит. Бөтүрүөбүс ол ыра санаата барыта олоххо киирбитин кэннэ санаатахха, олус да ырааҕы өтө көрбүт, бэйэтин туруоруммут соругар бигэ да эрэллээхтик, күүстээх да дьулуурдаахтык барбыт уонна биһигини сирдээбит эбит.

Итиччэ үрдүк сыаллаах-соруктаах дьон олус ымсыыран-баҕаран туран туста сатыырбыт. Тренерим үөһэ Чурапчыга икки-үс биэрэстэ курдуктаах сиргэ баар, биһиэхэ нэдиэлэҕэ аҕыйахта кэлэн барар. Ол иһин мин сылааска велосипедынан, тымныыга сатыы күөлү уҥуордаан киниэхэ тиийэн эрчиллэбин.

Билигин алта уоммуттан тахсан олорон эргитэ санаан көрдөхпүнэ, Дмитрий Петрович учуутал да, тренер да, киһи да быһыытынан, туох да омуна суох үөһэлэртэн айдарыылаах улуу киһи кэлэн ааспыт. Бэйэтэ киһи быһыытынан олус ыраас, чиэһинэй, ханнык да көр-нар, бэл, булт-алт диэҥҥэ аралдьыйбакка, олоҕун бүтүннүүтүн тустууга анаабыта. Кини биир да дьарыгы көтүппэтэ, хайа да оҕо туох санаалааҕын, туох дьоҕурдааҕын курдаттыы билэр сүрдээх мындыр психолог этэ. Кини баарыгар оройдорунан көрбүт, уолуктарынан тыыммыт, араас улуустан кэлбит, баппатах атамааннарынан аатырбыт ыччат кытта имиллибит сарыылыы сымныыра, мэниктиир туһунан өйүгэр оҕустарбата. Учууталбыт хас биирдии тылын сыыска-буорга түһэрбэккэ истэн, көбүөргэ албастары хос-хос хатылаан чочуйарбыт. Бөтүрүөбүс диэн Таҥараҕа тэҥнээх киһи буолара, кинини кытта мөккүһүөхтээҕэр буолуох утары да көрбөт этибит, ол курдук олус ытыктыырбыт. Кини ыччат доруобуйатыгар охсубат, төттөрүтүн туһалыырын курдук барытын ааҕан-суоттаан ноҕоруускалаан дьарыктаабыт эбит.

Билигин биири бигэтик этэбин – Дмитрий Петрович курдук улуу тренер тахсыбатаҕа буоллар, саха норуота ХХ үйэҕэ Олимп чыпчаалын дабайара саарбах этэ.

Тустуу секциятыгар сылдьар оҕолор сыл курдук улаханнык тустубакка, оонньоон, сүүрэн-көтөн тахсыбыппыт. Иккис сылбытыттан саҕалаан, дьэ дьиҥнээх эрчиллиилэргэ киирэн бардыбыт. Бөтүрүөбүс тустуу сүрүн албастарын барытын үөрэппитэ, олох уу чаккырас буолуохха, дьиэҕэр тиийэн, хоскор киирэн ороҥҥун эрэ нэһиилэ булардыы сылайыаххар диэри биир албаһы хатылат да хатылат буолан, быһата, бэйэҥ да өйдөөбөккүнэн хайа баҕарар балаһыанньаттан оҥорор буоларгар тиэрдэ сатыыра. Холобура, синньигэс маһы тутан баран, ол аннынан умсан атахтатара, сыыйа маһын намтатан иһэрэ – ол ахсын, маакка сыста сыһа-сыһа, хаптас гынан атахха киирэрбит. Маҥнай тобуктуу-тобуктуу атахтыырбыт, кэлин турбутунан хайа баҕарар атахха түһэн өрө баһан таһаарар буолбуппут.

Ити эрээри хас биирдии улахан бөҕөс физиологиятын, этин-сиинин уратытыгар, күүһүгэр, хамсаныытыгар, түргэнигэр-бытааныгар сөп түбэһиннэрэн, киниэхэ тус бэйэтигэр эрэ барар тус-туспа албастардаах буолааччы. Атыттар төһө да ону оҥоруохтарын баҕарбыттарын, үтүктэ сатаабыттарын иннигэр кинилэр курдук эҥкилэ суох табыллааччыта суох. Холобура, биһиги олимпиецтарбытын ыллахха, Роман Дмитриев ханнык баҕарар түгэҥҥэ утарылаһааччытын атаҕыттан чыпчылҕан түгэнэ ылбыта эрэ баар буоларын, онтун туппутунан бэйэтин атаҕынан олуйарын, Александр Иванов кэнниттэн кууспут бөҕөһү бэрт сылбырҕатык утары албастаһан быраҕар ньыматын, Павел Пинигин тардыалаһан иһэн, киһитин ходьох гыныар диэри охсорун, утарылаһааччы хардараары даллах гыннар эрэ, Павел, соҕотохто хоннох аннынан хардары хаамаат, тиэрэ көтөр албаһын бары билэллэр эрээри, ким да кинилэр курдук кыайан оҥорбот. Манна даҕатан эттэххэ, Пинигин ааттаах үчүгэйдик техниканы баһылаабыт бөҕөс, кини хас биирдии хамсаныытын эрдэттэн былааннаан оҥороро, уһаты-туора туттуо диэн саараама даҕаны. Тустууга аҥаардас охсуһан, сырбатыһан, күүскүнэн өттөйөн, киһини кыайбаккын, кинини албынныыр, хотор туһугар кыл түгэнэ урутуур реакциялаах, олус сайдыылаах интуициялаах буолуохтааххын.

Оттон миигин «карповтааһын» диэн миэлиҥсэ аҥаардаах быраҕыыны айбыт киһинэн ааҕаллара да, дьиҥэр, мин ыксаатахпына абырыыр, саамай сөбүлээн туттар албаһым утарылаһааччым ыраах атаҕар киирии этэ. Аан дойду таһымнаах улахан бөҕөс олох хараҕын да быһа симэн баран эҥкилэ суох сатыыр албаһыттан куотар уустук буолааччы. Холобурга аҕаллахха, японец Осаму Ватанабэ атахха киирэриттэн көмүскэнэргэ, утары албастыырга Нодар Хохашвили үс сыл бэлэмнэммит уонна Ватанабэны утары туста киирэн баран, сонно тута атаҕын былдьаппыт, дьиэтээҕи бэлэмэ туһалаабатах.

Тапталлаах хаан-уруу Чурапчыбар дьон байарга-тайарга улаханнык дьулуһа сатаабата, ол оннугар спорт диэн баран муннукка ытаабыт үгүс этэ. Биһиги кэммитигэр хайа да Чурапчы киһититтэн ыйыттахха, тустуунан эбэтэр дуобатынан, тенниһинэн эбэтэр волейболунан, хайыһарынан эбэтэр баскетболунан утумнаахтык дьарыктаммыт буолаллара, саамай сатамматаҕына – спорт хайа эрэ көрүҥүн эҥкилэ суох өйдүүр ыалдьааччылар бааллара.

Эргэ, хомойуох иһин, билигин умайбыт кулууп-путугар тустуу буоллаҕына, киһи турар да сирэ ордубат гына лыык курдук дьон мустара. 1956 сыллаахха оройуон чемпионатыгар ытык ыалдьыт быһыытынан ыарахан ыйааһыҥҥа көҥүл, классическай тустууларга Россия призера, Москва куорат чемпиона Иван Васильевич Морозов ыалдьыттыы кэлэ сылдьыбыта. Атыыр оҕуһу туруору туппут курдук дыыдаллан дьэ киһи да киһи! Моой суох, төбөтүттэн санна биирдэ силтиллэн тахсыбыт, тыыллар саһаан үрдүктээх, көннөрү киһи буутун саҕа модьу илиилэрин, онтон икки бүк суон атахтарын быччыҥнара көппөрүҥнэһэн ылаллар, биир күдьүс эт лахса, чиэппэр күүстээх киһилэрэ диэн арай итинник ини. Кини ыйааһыныгар тэҥҥэ үктүүр бөҕөһө суох буолан тустубатаҕа эрээри, көрөөччүлэр көрдөһүүлэринэн сыгынньахтанан баран көбүөргэ тахсан хаамыталаабытыгар да сөп буолбуппут, «хастаабыт тиит курдук харылаах, суллаабыт тиит курдук сотолоох, сытыы кылаан сынтарыйар сымара таас түөстээх» дьиҥ чахчы нуучча бухатыыра хааман даадаҥнатара харахпар билигин да баар.

Тустууга мин, уончалаах уол, дьон атаҕын аннынан сыыллан киирэн, адьас чугастан тутуһа сытан көрөрүм. Оччотооҕу биир хапсыһыы уон икки мүнүүтэ устата барара, ортотугар хайаан да партерга туруоруулаах. Сайыны быһа от-мас үлэтигэр эриллибит тыа уолаттара атахтара муус маҥан, курданардарыттан үөһэ өттүлэрэ күн уотугар килэриччи сиэтэн хап-хара буолан, утарыта киирэллэрэ. Маҥнай утаа улахан албаһы оҥорбокко, нөрүччү туттан баран, биир сиргэ иҥнэҥнэһэ, тэпсэҥнэһэ сылдьаллара. Ол сылдьан эмискэ холоруктаһан, хапсан ылаллара. Уһуннук, сындалҕаннаахтык барар хапсыһыы 0:0 ахсаанынан, ол аата тэҥнэһиинэн бүтэрэ аҕыйаҕа суоҕа. Ити да үрдүнэн саалаҕа мустубут эмээхсинниин-оҕонньордуун, кыра оҕолуун сарсыардаттан түүн үөһүгэр диэри барар күрэхтэһиилэргэ бөҕөстөр хас биирдии туттууларын-хаптыыларын сыыска-буорга түһэрбэккэ кыраҕытык кэтээн көрөллөр уонна туох эрэ хамсаныы буоллаҕына: «Оок-сиэ, барахсан инньэ гынна, дьэ үчүгэйдик да оҥордо ээ!» – диэн сибилигин көрбүттэрин хайҕаан-сөбүлээн күйгүөрсэ түһэллэрэ.

Оччолорго Чурапчыттан Коркин уолаттара ааттара-суоллара саҥа дуораһыйан эрэрэ. Ити сыллартан саҕалаан улахан дьон: Василий Шадрин, Федор Винокуров, Петр Николаев, Сидор Попов, Федор Эверстов, Виктор Кривошапкин, Максим Сибиряков уо.д.а. республика таһымыгар тахсан, ымсыылаах-баҕалаах разрядтар нуормаларын аһара көтөн, уламмаастар чэрчитин диэки эрэллээхтик айаннаан испиттэрэ.

Ити курдук күүстээх бөҕөстөрү аан маҥнай көрүү, кинилэр тустар ньымаларыгар сүгүрүйүү эргэ кулууппут барахсантан саҕыллыбыта. Төрөөбүт дойду ахтылҕана диэн ураты да күүстээх ээ! Мин ол кулууппун олус күндүтүк саныыбын, үллэр үйэбэр, саллар сааспар элбэх күрэхтэһиигэ кытыннаҕым, үгүстэ бастаан да, бириистээх миэстэҕэ тиксэн да аастаҕым. Ол эрээри ол Чурапчым умайбыт кулуубун үрдүк кирилиэһигэр турдахпына, ааһан иһэр дьон дорооболоһон баран: «Хайа, Слава, хайастыҥ?» диэтэхтэринэ, киэн тутта: «Бастаатым», – дииртэн ордук үөрүү суохха дылыта.




4


Ол эрээри мин саҥа тустан эрэрим, киэн туттуу иэйиитигэр куустаран, пьедестал үрдүк чыпчаала буолбут Чурапчым кулуубун кирилиэһигэр тиийэрим олох ыраах этэ. Оччолорго 49 киилэҕэ диэри ыйааһын баара, ситэрим-хоторум саҕана тустарбын онтон саҕалаабытым, аан маҥнай 1962 сыллаахха үөрэнээччилэр ортолоругар Чурапчы оройуонун чемпиона буолуохпуттан ыла кимиэхэ да сүгүн-саҕын хотторбот этим. Сэттэ сыл ааһан, интернат-оскуолабын экзаменнары туттаран түмүктээн, 8-с кылааска Чурапчы орто оскуолатыгар үөрэнэ киирэбин.

Биһиги тыыллан-хабыллан тахсыыбыт Чурапчы орто оскуолатыгар үөрэммит сылларбытыгар буолбута диэн тоһоҕолоон бэлиэтиэх этим. Ахсыс кылааска дьиэбэр олорон тустуу секциятыгар сылдьыбытым. Онтон тохсуска үөрэнэрбэр, оччотооҕу оройуон спорткомитетын бэрэссэдээтэлэ Афанасий Кирикович Софронов көҕүлээһининэн, орто оскуола директора, сэрии ветерана Гаврил Дмитриевич Ефимов өйөөһүнүнэн ДЮСШ – оҕо спортивнай оскуолата тэриллибитэ. Үрдүттэн интернаттаах этэ, онон 1963—1965 сылларга 10-с, 11-с кылаастарга үөрэнэрбэр интернакка олорбутум.

Дмитрий Петрович күрэхтэһиилэргэ эҥин сылдьан, сөбүлүү көрбүт оҕолорун, үчүгэй бөҕөс тах-сыан сөптөөх диэбит уолаттарын араас оройуоннартан ыҥыртаан аҕалан, интернакка олохтуура уонна тустууга эрчийэрэ. Мин үөрэнэрим саҕана Тааттаттан Владимир Андросов баар буолбута. Барахсан кыыһырар диэни билбэт, олус холку майгылаах Дыгын оҕото этэ. Бачча сааспар диэри кини курдук техникалаах бөҕөһү көрө иликпин диэтэхпинэ алҕаһаабат инибин.

Биһиги тэҥ баайыылаах бөҕөспүтүн хапсыһыы устатыгар албыннаан-аралдьытан баран, сөптөөх түгэнигэр биирдэ тоҕо түһэн албастыыр буоллах-пытына, кини хайа да бэйэлээххэ киирдэҕинэ, бииртэн биир албаһы субурутар сүрдээх ураты ньымалаах тустуук этэ. Билиҥҥи бөҕөстөртөн оннук ньыманан Бувайсар Сайтиев тустарын көрөөччүбүн. Атыннык эттэххэ, Володя бэйэтин кэмин урутаан испит эбит дии саныыбын.

Бөтүрүөбүс ыарахан ыйааһыҥҥа туһуннараары Сергей Шерварли диэн грек төрүттээх уолу аҕалбыттааҕа, олус сымнаҕас майгылаах, үтүө санаалаах уолчаан этэ, ол иһин бары сөбүлүүрбүт. 120 киилэни үктүүр буолан, пааралаһан эрчиллэр да, тустар да уола суоҕа. Онон төһө кыахтаах оҕо кэлэ сылдьыбытын билбэккэ хаалбыппыт. Өлүөхүмэттэн Гоша Корнилов диэн уол эмиэ улахан ыйааһыҥҥа туста сатаабыта, 1972 сыллаахха Н.Н. Тарскай бирииһигэр республика чемпионатыгар 90 киилэҕэ бастаабыта. Оттон Сахааччалаах, Роман Дмитриевтээх, Александр Ивановтаах мин оскуоланы бүтэрбитим кэнниттэн Чурапчыга кэлбиттэрэ.

Чурапчыга Дзержинскэй аатынан уулуссаҕа олорорум, аара суолбар Ленин уулуссатыгар Проня Шестаков дьиэтэ баара. Баран иһэн киниэхэ таарыйан, эрчиллиигэ илдьэ барарым. Уолум бастаан утаа сүрэҕэлдьиэх курдук этэ, кэлин улам ылларан, олус үлүһүйэн, баҕаран туран дьарыктанар буолбута. Минскэйгэ физкультурнай институкка үөрэнэ киирэригэр, 1966, 1967 сылларга Советскай Союз уолаттарга икки төгүллээх чемпиона диэн ааттаах-суоллаах этэ.

Дмитрий Петрович, оччолорго отутуттан тахсыбыт киһи буоллаҕа, албас көрдөрөрүгэр наар биһигини кытта көбүөргэ тустан хачымахтаһара, бэйэтэ самбист буолан, олус үчүгэйдик атахха тэбэн, тас уорҕабытынан ыыталыыра. Бөҕөс бөҕөстөн үөрэнэр, ким эмэ соҕурууттан тустан кэллэр эрэ тренербит: «Хайа, дьэ тугу билэн-көрөн кэллиҥ, көрдөр», – диэн буолара. Ол курдук буруолаабытынан сылдьар сонун албастары, ньымалары билэрбит.

Аны көбүөрбүт үрдүгэр киинэ экрана ыйанан турара, Бөтүрүөбүс сөп буола-буола онно улахан тустууктар хапсыһа сылдьалларын тыктаран, кинилэр ньымаларыгар уһуйа сатыыра. Саха киһитин этэ-сиинэ нууччаларга буолбакка, азиаттардыын биирин быһыытынан, Токиоҕа Олимпиадаҕа сылдьан устубут кадрдарын, Япония олимпийскай чемпионнара Уэтаке, Йошида, Ватанабэ тустууларын хос-хос көрдөрөрө, кинилэр хапсыһар ньымаларын үтүктэрбит, «ватанабэлааһын» курдук албаһы үгүстэр таптаан туттар буолбуппут.

Тренербит күүһү хачайдааһыҥҥа улахан болҕом-тону уурара, ол иһин бэйэтэ толкуйдаан араас мас снарядтары айыталаабыта, ыарахан бэрэбинэ тэриллэри көтөҕөлүүрбүт, эркиҥҥэ эрэһиинэнэн иҥиннэриллэн көнөн кэлэр дүлүҥнэри харахпыт ирим-дьирим буолуор диэри тардыалыырбыт, өттүктүүрбүт, халыҥ былаахы кирилиэскэ үктэллэрэ кырыыбалыы саайыллыбытыгар тарбахтарбыт төбөлөрүнэн тутуһан өрө хатаастан тахсарбыт, ыарахан штанганы сытан эрэ түөспүтүттэн сыыйа өрүтэ анньыалыырбыт. Бөтүрүөбүс барыбытын кэрийэ сылдьан, сүбэлиирэ, көрдөрөрө, ыйан-кэрдэн биэрэрэ.

Тустуу, ис-иһигэр киирдэххэ, син ырыа ноталарын кэриэтэ, эбэтэр саахымат, дуобат теориятын курдук, үөрэтэргэ-билэргэ араас ньымалардаах. Аны сайдыы баран истэҕин ахсын урукку умнуллар, соччо туттуллубат буолар. Биһиги урут партерга охтордохпутуна ууннары тардыы (растяжка) эбэтэр туроктыы кыптыыйдааһын (турецкие ножницы) албастарын туттар буоллахпытына, билигин биилиттэн кууһан, мостиктаан баран бэйэ нөҥүө эргитии (накат) баһылыыр-көһүлүүр суолталанна. Үөһэттэн куустуһан баран, араастаан атаҕынан эрийэн, санныга сүгэн быраҕыыга сүгүн-саҕын киирэн биэрбэт буоланнар, аны наар атахтааһын күүскэ тэнийдэ. Киһи саамай кэбирэх сирэ – атаҕа, онтон хайа да түгэҥҥэ ылыахха сөп.

Уон биэһим эргин лаппа күүһүрбүппүн, улахан да дьоҥҥо таһаҕас буолардыы эбиллибиппин өйдөөбүтүм. Интернаппытыгар биир саҥа иитээччи баар буолла, арай киэһэ дьарыкка тиийэн кэллэ уонна:

– Уолаттар, тустан көрүөҕүҥ эрэ, дьэ ким баарый? – дии-дии, өттүк баттанан баран эргим-ургум, сирэйбитин-харахпытын кэриччи көрөр.

Бөтүрүөбүс суох кэмэ этэ, оттон бу киһи, бадаҕа, ханна эрэ дьарыктаммыт, бэйэтин син сэниэлээҕинэн ааҕынар чинчилээҕэ. Кэтэмэҕэйдээн баран, мин киирэн утары турунан кэбистим. Уолаттартан ким эрэ судьуйалаата, хамаандалыырын кытта түһүнэн кэбистибит. Арай мин санаатаҕым аайы атаҕыттан ылабын, илиитэ сүрдээх кытаанах, күүс баҕас баар быһыылааҕа да, биир да албаһы билбэт, хара күүһүнэн эрэ хам баттаары хадьыктыы сатыыр, мин хаста да атахтаан умсарыта түһэртээн баран, кэлин миэлиҥсэлээн саннын хаптаҕайыгар лик гына түһэрдим. Киһим улаханнык кыһыйда, көбүөртэн тахсан иһэн тииһин быыһынан сыыйан: «Щенок», – диэбитигэр, «бэйэҥ буруйдааххын» диэн күлэ санаатым.

1963 сыл сайыныгар үөрэх министерствотын тэрийиитинэн уолаттарга республика чемпионата буолла. Дьокуускай куорат пааркатыгар үҥкүүлүүр балассааккаҕа көбүөр тэлгэтилиннэ. Мин ыйааһыммар биир дойдулааҕым Степан Собакин баар. Чурапчыттан илдьэ барбыт тренерим: «Ыстапааҥҥа түбэстэххинэ, сэниэҕитин эһимэҥ, эрэйдээбэккэ эрэ кыайыыны биэрээр», – диэтэ. Кырдьыга, ити саҕана миигин ким да билбэт, оттон Степан миигиттэн сааһынан аҕа, республика күүстээх тустуук уолаттарын ахсааннарыгар киирэн, биллэн-көстөн эрэр кэмэ. Онон кинилиин сирэй көрсүһүүгэ улаханнык утарса сатаабакка, очконан хоттордум уонна атыттары барыларын лаһырҕаччы кыайталаан, иккис миэстэ буоллум.

Саха тустуутугар кыһыл көмүс буукубаларынан суруллубут 1964 сыл үүммүтэ. Бу сыл бэс ыйыгар Дьокуускай «Спартак» стадионугар РСФСР көҥүл тустууга чемпионата ыытыллыахтааҕа. Хаһыаттарга онно бэлэмнэнии туһунан кэпсэтии нүөмэри көтүппэккэ саҕаламмыта. Ордук саха спортивнай журналистикатын төрүттээбит Иван Семенович Кычкины махтана ахтыам этэ. Кини чемпионакка бэлэмнэнэ сылдьар бөҕөстөртөн ылбыт интервьюларын, Борис Васильев доҕордуу көр-күлүү уруһуйдарын биири да көтүппэккэ ааҕарбыт.

Аты эрчийэн, баайан, хатаран баран, баайааччы тренер сүүрүүгэ илин былдьаһыннара киллэрэрин кэриэтэ, Бөтүрүөбүс миигин: «Сөп буолла», – диэтэҕэ буолуо, араас күрэхтэһиилэргэ утуу-субуу кытыннаран барда. Саха театрыгар республика оҕолорго чемпионата ыытылынна. Ол аайы былырыыҥҥы Степаным суох, онон бэркэ баран иһэн, Руслан Игнатьев диэн уолтан иҥинним, очконан хотторон, атыттары тулуппакка, иккис миэстэ буоллум. Аны улахан дьоҥҥо тахсан, Ытык Күөлгэ буолбут Алексеевскайдааҕы производственнай управлениеҕа (Чурапчы Таатталыын холбоһон кылгас кэмҥэ итинник ааттана сылдьыбыттара) 52 киилэҕэ бастаатым. Таатта бөҕөһүн кыайбытым да, билигин аатын өйдөөбөппүн.

Аан маҥнай Сахам сирин тас өттүгэр, Сибиир уонна Дальнай Восток чемпионатыгар кытта республика сүүмэрдэммит хамаандатыгар киирсэн, саас Улан Удэ куоракка көтөн тиийдибит. Чурапчым, Чакырым хаарынан ытыллар тибиилээх-тиһиктээх, кубулҕаттаах-дьибилгэттээх кулун тутарынан охсон буолуо – хаатыҥканан барбытым, доҕоор! Ол дойдуга уу-хаар, чалбах, бадараан бөҕөтө тахсан, бүтүннүү баллырҕас-биллирҕэс, сөрүө оннун да саҕа хаар ордубатах. Киһи хайдах да хаатыҥканан сылдьыбат дойдута буолбут. Хата, хаһаайыстыбаннай киһи Юра Васильев саҥа бачыыҥка ылынан абыраата, эргэтин мин ытыһым үрдүгэр түһэрэн ыллым.

Манна эмиэ иккис миэстэ буоллум, финалга Потлицын диэн уоллуун күөн көрүстүбүт. Тэбис-тэҥҥэ барбыт хапсыһыы түмүгүнэн кыайыыны киһибэр биэрдилэр. Ол эрээри оччолорго республика тас өттүгэр тахсан, чемпион буолуу улаханнык хойдо илик буолан, ити иккис да миэстэбиттэн астыммыт курдук этим. Биһигини илдьэ сылдьыбыт Бөтүрүөбүс даҕаны хомойбут чинчитэ суоҕа.

Чурапчыбар төннөн кэлэн, тохсус кылааһы бүтэрээт, аны Россия уолаттарга чемпионатыгар бараары, Коля Сивцевтааҕы кытта Дьокуускайга бэлэмниир эрчиллиилэргэ сырыттыбыт. Мин ыйааһыммар баар дьону, Россия чемпионатыгар кыттаары сылдьар бөҕөстөрү – Николай Сафоновы, Владимир Корякины, Иван Аянитовы кытта сороҕор бииргэ дьарыктанабыт. Дьонум спорт маастардара, ол эрээри кум-хам туппаттарыттан, тэҥҥэ кэриэтэ эрийсэрбиттэн улахан эрэл уота умайбыта.

Күүтүүлээх Россиябыт чемпионата буолар күнэ дьэ үүннэ. Биһиги, туста бараары сылдьар уолаттар, дьэ күннээтибит – аатырбыт бөҕөстөрбүт биир да хапсыһыыларын көтүппэтибит. Сырылатан-сырбатан куйаас да күннэр этилэр! Ону ол диэбэккэ, аан маҥнай Россия чемпионата Дьокуускайга ыытыллар буолан, киһи да киһи! Билиэккэ тииһиммэккэ айдаан, хата, биһиги сүүмэрдэммит хамаандалары кытта тэҥҥэ эрчиллэр буолан, пропуһунан киирэн, тутан олорон көрөр кыахтанныбыт.

«Да, были люди в наше время» диэбиттии, Петр Алексеев хайа да бэйэлээҕи хамсатан иһэн, тиэрэ тэбэр сатабылын, Эдуард Гегеев утарылаһааччытын сототун атаҕынан эрийэ ылан баран үөһэнэн кыыратан түһэртиирин, Алкивиад Иванов хас биирдии хамсаныытын чопчутук ааҕан-суоттаан оҥорор албастарын, Петр Попов көбүөргэ ыҥырылыннаҕына, эдэр саас, күүс-уох символа буолан, сүүрэн мөтөһүйэн кэлэригэр көрөөччүлэр күргүөмүнэн: «Бө-тү-рүүс! Бөтү-рүүс!» – диэн ньиргитэллэрин, ол кэннэ кини киирэн-тахсан, тустан кылбаҥнатарын! Манна даҕатан эттэххэ, Петр Егорович мин оҕо эрдэхпинэ холобур оҥостор бөҕөһүм этэ, кини хаартыскатын интернакка оронум үрдүгэр ыйаан туруорбутум. Ок-сиэ, үтүө да кэмнэр этилэрэ, чахчы да биһиги саҕана бааллара уол оҕолорун мүлтүрүйбэт үс уһуктаахтара, кыларыйбат түөрт кырыылаахтара! Эчи дьүһүннэрэ-бодолоро кыраһыабайа, тутта-хапта сылдьаллара дьоһуннааҕа – кимиэхэ баҕарар тустууга умсугуйууну үөскэтэллэрэ. Улахан маастардарбыт хаартыскалара куорат киинигэр, дьон кэлэр-барар, тоҕуоруһар сирдэригэр бааллара, анныларыгар ыраах тырымныыр маяктардыы угуйар-ыҥырар, оччолорго саныырга сөҕүмэр улахан суолталаах «Мастер спорта СССР» диэн сурук биһигини магнит курдук бэйэтигэр тардан, хаста да аттынан аастарбыт, син биир хайаан да тохтоон, хаартыскалары сирийэн көрдөхпүтүнэ, суруктарын аахтахпытына эрэ астынарбыт.

Россия чемпионатын түмүгүнэн Алкивиад Иванов, Петр Алексеев, Альберт Захаров, Эдуард Гегеев аҕыс ыйааһынтан түөрдүгэр чемпионнаан, Николай Гоголев, Алексей Ермолаев, Владимир Данилов үрүҥ көмүскэ, Николай Алексеев боруонса мэтээллэргэ тиксэннэр, саргыбыт салаллыбыта, өрөгөйбүт үрдээбитэ. Ити күннэргэ, туох да омуна суох, саха дьоно бары тустуу салгыныгар, умсугутар-угуйар тыыныгар куустаран олорбуттара.




5


1964 сыл миэхэ эмиэ умнуллубат күрэхтэһиилэри аҕалбыта. Оренбурга Россия уолаттарга чемпионатыгар тиийэн туһуннубут. Мин Деберов диэн Дагестантан кэлбит уол кэнниттэн иккис миэстэ буоллум. Ыйааһыным 56 киилэ, онтон 49 киилэҕэ быраҕар олус илистиилээҕэ уонна бииртэн биир субуруһан барар уһун унньуктаах хапсыһыыларга уу испэккэ, аһаабакка сылдьарбыттан, үөрүйэҕэ суох буолан, маҥнай утаа сүрдээҕин сылайар да этим. Манна биир үөрүү буолла – Коля Сивцев биһиги Сахабыт сирин спордун историятыгар аан маҥнай уолаттарга Россия чемпионун үрдүк аатын ылла. Күрэхтэһии кэнниттэн миигин РСФСР хамаандатыгар киллэрэн, сүүмэрдиир эрчиллиилэргэ хааллардылар, көхсүгэр «РСФСР» диэн суруктаах спортивнай форма биэрдилэр. Актюбинскайга буолар ССРС уолаттарга чемпионатыгар кыттыахтаахпыт.

Саха сиригэр кэлэн, биһиги бөҕөстөрбүтүн Россия чемпионатыгар быһаччы бэлэмнээбит Аркадий Сергеевич Карапетян биһигини эрчийэр, сахаларга ураты үчүгэй сыһыаннааҕа, туох кыалларынан көмөлөһө сатыыра. Киһини чуҥкуппат, кэпсээн-ипсээн бөҕөтө, киниттэн тустуу араас кистэлэҥнэригэр элбэххэ үөрэммиппит.

Биирдэ хас да киһи таһырдьа бэркэ астынан, кэпсэтэн халаарса-халаарса, пиибэ иһэ олороллоро. Аркадий Сергеевич аттыларынан ааһан иһэн, кинилэр диэки кыҥнах гынан баран: «Ити дьону көрүҥ, хаарыан доруобуйаларын буортулаан, пиибэнэн кэбирэтэ олороллор, кинилэр мин иннибинэ өлүөхтэрэ», – диэтэ.

Кини күүстээх санаалаах буоларга, ыалдьааччылар утары да ыһыытыыр-хаһыытыыр түгэннэригэр кыһаллыбакка, бэйэ соругун толорорго ханнык да мэһэйтэн, ыарахантан толлубакка, тулууру түмэн, харса суох дьулуһан киирсэргэ үөрэтэрэ: «Ленинградка тустууга бастаатым, тиһэх хапсыһыыбар олохтоох уолу кыл мүччү кыайдым. Дьэ, ону сөбүлээбэккэ, пьедестал үрдүкү үрдэлигэр тахсыбыппар, ыһыы-хаһыы, иһиирии бөҕөтө. Мин испэр саныыбын «төһө да ыһыытааҥ-хаһыытааҥ, эһиги аймалҕаҥҥыт бу саала иһинэн эрэ хаалыаҕа, оттон сарсын Советскай Союз бүтүннүүтэ Карапетян чемпион буолбут диэни истиэҕэ».

Эбэтэр омуктуу (латыынныы эбитэ дуу?) маннык ох тыллары этэрэ: «У кого стальное сердце, тому не нужна кольчуга». Субуота аайы баанньыктанабыт, онуоха кини: «Бу курдук субуота аайы хайаан да баанньыкка сылдьар буолуҥ, киһи этигэр-хааныгар баар кири-хоҕу таһаарарга баанньыктан ордук абы-раллаах дьыала суох». Ити курдук Азербайджан Нагорнай Карабаҕар биир хааннаах армяннарын ортолоругар үөскээбит тренербит уһун мунна субуруйан, хараҕар дьээбэлээх кыымнар тырымнаһан ыла-ыла, баанньыктанан баран, култайбыт сылабаартан чэй иһэн бурулатара уонна киһи иһиттэр истэ олоруоҕунуу саҥаттан саҥа кэрэхсэбиллээҕи кэпсиирэ. Улахан педагог эбит, үөрэтэр оҕолоругар олус үчүгэйдик сыһыаннаһара, кинилиин олох чуҥкуйбат этибит, хаартынан араас фокустары оҥортоон сөхтөрөрө.

Аркадий Сергеевич эппитин курдук уһун үйэлэммитэ, 80 сааһын туолуор диэри көбүөргэ сылдьан, кини хос сиэннэрэ буолуон сөптөөх бөҕөстөрү эрчийэрэ. Саха бөҕөстөрүгэр кини үтүөтэ-өҥөтө сүҥкэн. 1964 сыллааҕы дьиэбитигэр-уоппутугар ыытыллыбыт Россия чемпионатыгар кини тустууктары бэлэмнээбит улахан үтүөтүн түмүгэр, оччолорго дойду биир бастыҥ тренерин көмөтүнэн чаҕылхай кыайыылары ситиспиппит буолуо дии саныыбын.

Дьэ, ити курдук бэлэмнэнэн, Актюбинскайга тиийдибит. Оччотооҕу тустуу быраабылата маннык – ортотугар 1 мүнүүтэ сынньалаҥнаах 5-тии мүнүүтэ тустабыт, барыта 10 мүнүүтэ. Хас хапсыһыы түмүгүнэн 4 ыстарааптыыр очкону үллэстэҕин: ыраастык кыайдахха – 0 очко, утарылаһааччыҥ 4 ыстарааптыыр очколанар, очконан хоттоххуна, эйиэхэ – 1, утарылаһааччыгар – 3, тэҥнэһиигэ хардары-таары 2-лии ыстарааптыыры ылаҕыт. Барыта 6 ыстарааптыыр очколаммыт киһи күрэхтэһииттэн туоруур.

Мин утуу-субуу биэс уолу кыайталаан, тиһэҕэр 5 ыстарааптыыр очколанан хааллым, быһата, сап саҕаттан иҥнэн сылдьабын. Билигин очконан да кыайдахпына тустан бүтэбин. Алтыһынан көбүөргэ күөн көрсөр киһибин көрөөт, улаханнык соһуйдум – түөһэ, илиилэрэ барыта бар түү, сэҥийэтигэр, уоһун үрдүнэн хоруммут бытыгын онно көҕөрүмтүйэр. Хайдах да Кавказтары эрдэ ситэллэр диэбит иннигэр, бу сүүрбэтиттэн тахсыбыт киһи турара биллэрэ. Оттон уолаттарга тустууга 18-гар эрэ диэри саастаахтар киириэхтээхтэр этэ ээ! Бэйэтэ миигиттэн биир төбө үрдүк, ыйааһына да төһөтө буолла?

Хайыахпыный, тустан хачыгыратыспытынан бардым. Тиһэҕэр очконан хотторуулаах бэһис миэстэҕэ тэбилинним, мин кыайталаабыт үс уолум иннибэр түстүлэр – иккис, үһүс, төрдүс миэстэлэри үллэһиннилэр. Оо дьэ, наһаа да хомолтолоох, абалаах дьыала этэ! Бары күрэхтэһииттэн барбыттарын кэнниттэн, иччитэх саалаҕа соҕотоҕун хаалан баран, атаҕастабылы тулуйбакка, ийэбин, Бөтүрүөбүһү санаатым, онуоха сүрэхпин дьырылата, туох эрэ сымнаҕастык тарбыырын кытта, хараҕым уута халыйан тахсыбытын бэйэм да билбэккэ хааллым, ол олорон: «Эһиил Советскай Союз чемпиона хайаан да буолуом!» – диэн бэйэм бэйэбэр андаҕайдым. Бэйэбин кымньыыланар уонна эппит тылбар хайаан да турар баҕаттан Татарияттан сылдьар Шишкин диэн биир ыйааһыҥҥа тустар уолбар: «Эһиил Союз чемпиона буолуом», – диэбиппин киһим кулгааҕын таһынан аһарда, олох итэҕэйбэтэҕэ сирэйиттэн-хараҕыттан биллэрэ.

Дойдубар төннөн кэлэн, оҕолор биригээдэлэригэр киирсэн, окко үлэлээтим. Кэбиһиигэ кыдамалаан, бугуллары от үөһэ быраҕаттыы сырыттахпытына, бииргэ үөрэнэр уолум Юра Баягантаев дьээбэлэнэр: «Россия, Союз ааттаахтарын талбыт тамныыр киһи бу бугул сыыһын киһилиэҥ дуо, көтөҕөн ылан элээрдэн кэбис», – диэмэхтиир.

Күһүн буолбутугар, күүппүт-ахтыбыт сиэринэн, тустуу секциятыгар харса суох дьарыктанан барабын. Кимиэхэ да мэһэйдээбэт, мэһэйдэппэт гына спортивнай саала уонна мастарыскыай икки ардыгар бэйэбит туспа 5х5 миэтэрэ иэннээх сааланы туппуппут. Бу сырыыга Бөтүрүөбүс миэхэ улахан болҕомтотун ууран, анаан-минээн дьарыктаата. Ок-сиэ, кытаанах да бэлэмнэниини барбыппыт, күүһү хачайдыырга, албастары чочуйууга, холонон хапсыһыыларга, сүүрэргэ-көтөргө хас лиитирэ көлөһүммүт көбүөргэ тохтубута эбитэ буолла? Тренерим ноҕоруускабын күүскэ эптэ – урут нэдиэлэҕэ үстэ дьарыктанар эбит буоллахпытына, билигин күн ахсын үстүү-түөртүү чаас туһун да туһун, бырахсыылары хат-хат чочуй да чочуй – албаһы оҥоруу, көмүскэнии, утары бырахсыы. Холобура, утарылаһааччыҥ атахха түстэҕинэ, халбарыйан умса садьыйыы, ыстаммыт уоҕун туһанан, умса баттыы сылдьан, ыраах атаҕын буутуттан ылан төбөтүн оройунан хойуоһуннарыы (итини Сахаачча, атаҕар күүстээх буолан, эҥкилэ суох оҥороро), моонньуттан кууһаат, окумалыттан олуйан тиэрэ эргитии, түһэр күүһүн туһанан өттүктээһин уо.д.а.

Бөтүрүөбүс «үөрэнэргэ ыарахан эрээри, сэриилэһэргэ чэпчэки» диэн девиһинэн салайтарара, дьарыктаныы кэнниттэн үлтү сылайан, киэһэ сэттэ аҥаар саҕана дьиэбэр кэлээт, сонно охтон, утуйан хааларым. Күүстээх хара үлэ үтүө түмүктэрдээҕэ – бииргэ эрчиллэр уолаттарым Коля Сивцев, Бүөккэ Макаров кыра кылаастарга миигин тулуппат этилэрэ, оттон тохсуска араа-бараа бырахсарбыт. Онуска кэмниэ кэнэҕэс мин дьоммун баһыйар буолан барбытым, аны били ымсыырар разрядтарбыт нуормаларын сыыйа-баайа толорон барыыбыт үчүгэйэ сүрдээҕэ. Оччолорго «юношескай» диэн разрядтар бааллара, «I юношеский разряд» диэн значогу түөспэр анньынан, мин саҕа дьоллоох киһи суоҕун курдук санана сылдьыбыттааҕым.

Мин олохпор хаһан да умнуллубат 1965 сыл үүнэр.

Бу сыл мин оҕолор бөлөхтөрүттэн тахсан, улахан дьоннуун ситиһиилээхтик тустардыы үүммүт уонна бары кыттыбыт күрэхтэһиилэрбэр кыайыылааҕынан тахсыбыт сылым этэ. Аан маҥнай, дьэ хайа муҥун, бу сырыыга уолаттарга республика чемпиона буоллум. Онтон өрүс илин эҥээрдээҕи зонатыгар улахан дьоҥҥо тустан, 52 киилэҕэ илистибэккэ бастаатым.

Бөтүрүөбүһүм батыһыннаран, улахан дьоҥҥо республика чемпионатыгар кытта киирдим. Ыйааһыммар киһи элбэх, былырыын ааспыт Россия чемпионатын сабыдыала буолуо – күн ахсын саала хайдарынан элбэх киһи мустар. Сэрэбиэйим табыллан, маҥнайгы эргиирдэргэ улаханнык биллибэтэх тустууктарга түбэһэн, ыраас кыайыыларынан айаннаатым. Көрөөччүлэр миигин, эдэр уолу – саастаах, сиппит дьон ортотугар соҕотоҕун кыбыллан сылдьарым иһин буолуо – хара ааныттан сөбүлээтилэр, туста таҕыстахпына, ытыс тыаһа өрө хабыллар, «Слава, кытаат!» – диэн хаһыы-таһаллар. Онтон тэптэн, санаам көтөҕүллэн, бииртэн биир кыайталаан, хапсыһыылары туораталаан истим. Сороҕор утарылаһааччыбын этиэх түгэнэ ыраастык ууран баран, хапсыһыым бүтэ охсубутуттан хомойбут курдук буоларым эмиэ баара.

Финальнай киирсиилэргэ үһүө буолан хааллыбыт – Бүлүүттэн спорт маастара Федот Федотов, Эдьигээнтэн Николай Алексеев. Николай Алексеевы хотон баран, маастар Федот Федотовы утары таҕыстым. Оччолорго маастардар төһө да аҕыйах буоллаллар, кинилэр тустар ньымаларын балачча биллэҕим, онон бу сырыыга бэйэбэр сүрдээх эрэллээхпин. Ити иннинээҕи сыл Федотов Дьокуускайга Россия чемпионатыгар Доннааҕы Ростов маас-тарын Тополяны бэрт эрэллэээхтик кыайбытын көрбүтүм.

Илии тутуһан баран, хайа да өттүбүтүттэн кэтэммэккэ түһүөлэһэн бардыбыт. Биир түгэҥҥэ киһибин мостикка түһэрдим уонна ыһыктыбакка, саннын хаптаҕайдарыгар хам баттаан кэбистим. Саалаҕа үөрүү-көтүү, ыһыы-хаһыы, арбитр илиибин ууннарбытын кэннэ көрбүтүм – Бөтүрүөбүс хаһан да ымыттыбат бэйэтэ мичээрдээбит. Онуоха эрэ Саха сирин улахан дьоҥҥо чемпиона буолбуппунан республика бастыҥ бөҕөстөрүн кэккэтигэр киирэн эрэрбин өйдөөн, дьэ улаханнык үөрдүм. Урутаан эттэххэ, Бөтүрүөбүс хайдах да кыайыы-хотуу кынаттанан кэлбитиҥ иннигэр, кими да хайҕааччыта суох, өссө күүскэ үлэлииргэ, саҥаттан саҥа кыайыылары ситиһэргэ ыҥырара.

Чурапчыбытыгар төннөн тахсан, өссө күүскэ үлүһүйэн дьарыктанныбыт. Санаабыттан былырыыҥҥы ССРС уолаттарга чемпионатыгар биэс уолу кыайан баран, кинилэр кэннилэригэр хаалыы көбүөр быыллаах сабыытыгар умса хоруйа түспүттүү абалаах балыллыыта, онтон сиэттэрэн мэтээлтэн мэлийии кыһыыта-хомолтото ааһан-араҕан биэрбэт, уонна онно бэйэбэр бэриммит андаҕарбын адьас умнубаппын.

Онуһу бүтэрэр экзаменнарбыттан иккини эрэ туттаран баран, Ярославль куоракка Россия улахаттарыгар сүүмэрдиир күрэхтэһиигэ ыҥырылынным. Онус кылаас бүтэн, орто оскуола аанын саас-үйэ тухары сабар күммүт тирээн кэллэҕэ. Мин үөрэрим диэн баар – ол кэмтэн үйэ аҥаарыгар чугаһыыр кэм аастар да, бары олус доҕордуубут, бэйэ-бэйэбитин кытта билсэ-көрсө, кэпсэтэ-ипсэтэ олоробут. Икки онус баара – тыа оскуолаларыттан кэлбиттэр са-ха кылааһыгар «а»-ҕа, нуучча кылаастара «б»-га үөрэммиппит. Альбина Поисеевалыын хас да сыл биир паартаҕа олорбуппут. Кини оччолортон баар-дааҕа биллэрэ. Оскуолабыт учкомун бэрэссэдээтэлэ этэ. Биирдэ: «Биһиги аны кылаас салайааччытыттан аккаастанабыт, бэйэбитин бэйэбит салайабыт», – диэн оскуола уопсай мунньаҕар тыл этэн хабылыннарда. Учууталлар истэллэригэр соһуччу буолуо да, кылаас оҕолорун санаата барыбыт киэнэ биир, ону көрөн буолуо, директорбыт Г.Д. Ефимов биһигини өйөөтө. Онон онуһу кылаас салайааччыта суох бүтэрбиппит. Эмиэ кылааһынньыкпыт Филипп Кронников сахалартан көмүс промышленноһын биир биллэр-көстөр үлэһитэ буолбута, «Бочуот знага» орденынан наҕараадаламмыта. Араас салааҕа Саха Республикатын үтүөлээх үлэһитэ буолбут хас да киһилээхпит. Оттон Юра Баягантаев сааһын тухары дьиэ-уот, коммунальнай хаһаайыстыба боппуруостарынан сыралаахтык дьарыктанан, Российскай Федерация үтүөлээх үлэһитин аатын ылар чиэстэммитэ.

Мин бэйэм кылааспар махтанарым, сүгүрүйэрим диэн буолар – билиини-көрүүнү, үтүө доҕоттору биэрбитин таһынан, миигин киһи-хара оҥорбут, олоҕум хайа да уустук-ыарахан түгэнигэр күүстээх санаатынан бигэтик өйөөбүт, инникигэ уостубат итэҕэлинэн кынаттаабыт олоҕум эрэллээх доҕоро Таняны көрүһүннэрбитин иһин. Кырдьыгынан эттэххэ, оскуолаҕа сылдьан, бэйэ-бэйэбитин бэлиэтии көрбөтөх быһыылаахпыт, кини – кылаас солбуллубат ыстаарыһата, активистка бастыҥа, оттон мин спортан, тустууттан атыны билбэт буолан, кэрэхсиирбит да атын-атын курдуктара. Үөрэхпитин бүтэрбиппит кэннэ Таня Москваҕа культура институтугар киирбитэ. Мин кэлэ-бара киниэхэ таарыйарым, дьэ итиннэ истиҥ доҕордоһуу сыыйа уматар уоттаах тапталга кубулуйбута, икки оҕом күн сирин көрөр дьоллоругар бэйэ-бэйэтэ суох сатаммат буолбуппут, бэйи, ону хойутуу сиһилии кэпсиэм.

Оскуолабар төнүннэххэ, учууталларбыт да сахаларга биллэр-көстөр дьон этилэрэ. Холобура, саха тылыгар Алексей Бродников, Феоктист Софронов, историяҕа В.С. Яковлев-Далан, ахсааҥҥа кини кэргэнэ Яна Викторовна Алехина үөрэппиттэрэ. Далан оччоттон дьонтон уратылааҕа биллэрэ, өрүү соҕотоҕун сылдьар, кими да кытта билсэ, доҕордоһо сатаабат, дьиэтиттэн тахсыбат да курдук өйдүүбүн. Физиканы сөбүлүүр буоларбытыгар Алексей Петрович Ермолаев үтүөлээх, араас уопут оҥорон, соһуйуу-өмүрүү буоларбыт. Мин сүүрэрбин-көтөрбүн таптыыр буолан, физкультура уруогун тулуйбакка-тэһийбэккэ күүтэрим. Манна эрбэх үрдүгэр сэттэтэ эргийэр диэбиккэ дылы эрчимнээх имигэс уоланнар бааллара. Василий Петрович Захаров уҥуоҕунан намыһах эрээри, брусьяҕа, «акка» таҕыстаҕына, эбэтэр икки быаҕа ыйаммыт биһилэхтэри харбаан ыллаҕына, тутум үрдээбиккэ дылы буолан, араас гимнастическай көрүҥнэри элэҥнэччи оҥороро, аны теннистээн бардаҕына, остуол ньууруттан тэйиэлиир мээчигин кытта тэҥҥэ көтүөккэлииргэ дылы буолара. Хабаровскайга физкультура институтугар үөрэнэр, бэйэбит биир дойдулаахпыт Василий Николаевич Оконешников практикатыгар кэлэ сылдьара. Уулуссаҕа биһигини көрүстэҕинэ, дьээбэлэнэн түҥнэритэ тэбиэлээн кэбистэҕинэ, күлсэ-күлсэ хаартан оронуу буолара. Бэйэтэ бэртээхэй волейболист этэ. Хайа да кыыс көрдөр эрэ нохтолоох сүрэҕэ мөхсүбүтүнэн барар номоҕон мөссүөннээх, кэрэ дьүһүннээх Иван Иванович Ефремов (кэлин биллэххэ, бииргэ үөрэммит кыргыттарбыт үгүстэрэ кинини таптаан, куттара-сүрдэрэ айманан биэрээхтээбит эбит) волейболга оонньоон, үөһэ ыстанан, сиэккэни үрдүнэн уунаҥнатан, мээчиги быһан сыбырҕатарын, баскетболга өрө көтөөт, хабан ылбыт мээчигин сиргэ үктэммэккэ да корзинаны чопчу булларарын көрө-көрө: «Биһиги да дьонноохпут!» – диэн киэн тутта саныырбыт.




6


Дьэ онон, онуспар икки эрэ экзамены туттараат, Ярославльга бардым. Манна Саха сирин бастыҥ тустууктара бары тиийбиттэр. Ыйааһын ахсын ким хайдаҕын, сүүмэрдэммит хамаандаҕа хаһыс нүөмэринэн сылдьарын быһаарсар хабыр хапсыһыылар саҕаланнылар. Дьиҥнээх Россия чемпионатыттан уратыта диэн, манна көрөөччү суох – тустуу идэлээхтэрэ, федерация салайааччылара, судьуйалар, тренердэр эрэ кыттыылаах барар. Мин кыһыйан-кыдьыгыран туран киирсэн, 52 киилэҕэ иккис миэстэҕэ таҕыстым, «Бастыҥ техника иһин» диэн бирииһи биэрдилэр, Саха сириттэн тиийбит тустууктартан мин көрдөрүүм саамай ордук буолла.

Сотору эмиэ саҥаттан саҥа күрэхтэһиилэргэ кыттан, тыһыынчанан биэрэстэлэри самолет кынатын анныгар хаалларан көт да көт буоллум, эмиэ иннибэр уһуга-муҥура биллибэт айан суола ыҥыра-угуйа субулунна. Россия киэҥ нэлэмэн хочолорун кэннилэриттэн Кавказ хайаларын хаардаах өргөстөрө адаарыстылар, Россия араас куораттарын спордун дыбарыастарын ньиргиэр саалалара бииртэн биир солбустулар.

Черкесскэй куоракка «Урожай» общество киин сэбиэтин (ол аата ССРС үрдүнэн) уолаттарга бастыыр иһин күрэхтэһиитигэр 55 киилэҕэ кытынным. Утарылаһааччыларбытын барыларын хотон, Чурапчы оройуонун чемпионатын курдук балаһыанньа буолла – бастакы миэстэни былдьаһа, адьас кырабыттан бииргэ үөскээбит, элбэхтэ тустубут уолбунуун Петя Макаровтыын таҕыстым. Петя сүрдээх сүһүөхтээх, туттаҕына бачыгыратан түһэн ытарчалыы ылар, тарбахтарын ыыппат күүстээх, албастары да бэрт быһымахтык оҥортуур үгэстээх. Хапсыһыы бүтүөр диэри мотуор курдук тигинэччи үлэлээн, сыра бөҕөнөн 1 очконан нэһиилэ баһыйдым, онон чемпион буолар чиэстэнним.

Ити кэнниттэн Махачкала куоракка ССРС уолаттарга чемпионатыгар кытта бардым. 52 киилэҕэ тус-тар буоллум. Стадиоҥҥа киһи бөҕөтө, сырылатан түһэн эмиэ куйаас баҕайы күннэр тураллара. Мин үчүгэйдик баайыллыбыт ат курдук тустар баҕам диэн сүрдээх, формабар, сахалыы малтаччы эттэххэ күөгэйэр күммэр, дьэлтэйэр дьэппэр сылдьабын. Россияттан тренеринэн Александр Петрович Тимохин барсыбыта, кини көбүөргэ батыһыннаран киирэригэр тугу эрэ быһаарар да, иҥэн-тоҥон өйдүү сатаабаппын, санаабар, Бөтүрүөбүс намыын, холку сүбэлиир тылларын истэр курдукпун. Бэлэмим олус үчүгэй буолан, маҥнайгы эргиирдэргэ холкутук кыайталаан бараммын, финалга Стрельцов диэн Украинаттан сылдьар уоллуун туһуннум. Көбүөргэ халаачыктыы эргичитиһии, бырахсыы диэн кытаанаҕа манна буолла, хардары-таары уонтан тахсалыы очкону ыллыбыт, мин баалынан чорбойон чемпионнаатым. Илиибин көтөҕөллөрүн кытта тренербит, бөдөҥ баҕайы нуучча киһитэ, үөрэн-көтөн сүүрэн адаҥхастаан иһэрэ харахпар субу баар.

ССРС уолаттарга чемпионунан сахалартан аан бастаан буоллум диэн бастаан утаа улахан үөрүү суоҕа, былырыыҥҥы андаҕарбын толордум ээ диэн саныырым уонна дьиэбэр, ийэбэр тиийэ охсубут киһи диэн баҕалааҕым. Бу киһи тыына-быара ыгыллар куйаас күннэригэр ахтылҕаннаах Чурапчым кыһыҥҥытын, тула харах саатарынан эҥсиллэр, күн уотугар чаҕылыйар ып-ыраас хаары, ыаллар оһохторун буруота сэлиэнньэ үрдүнэн туруору субуһалларын саныыбын. Поезпыт лиһиргээн-лаһырҕаан айанныыра бытаана диибин диэн! Ип-итии, биһиги кытаанах долбуур ороннордоох плацкартка айаннаан иһэбит, мин тулуйбакка саҥа аллайабын:

– Ок-сиэ, туох ааттаах бытааммытый? Хаһан тиийэбит?

Онуоха Тимохин күлэр:

– Мин эн курдук Советскай Союз чемпиона буолбутум буоллар, Москваҕа диэри икки суукканы быһа атахпар тура тэбинэн айанныах этим.

Ол быыһыгар быйыл үөрэхпин бүтэрбитим быһыытынан, тренер инникибин былаанныырбар сүбэлиир уонна этэр:

– Москватааҕы государственнай университеттан ураты столица хайа баҕарар үрдүк үөрэҕэр киллэрэбин.

Мин спортан атыны тугу да санаабаппын, ол иһин физкультурнайга киириэхпин баҕарабын диэбиппэр, киһим үөрүүнү кытта сөбүлэстэ. Онон чугастааҕы кэскилим, ханна үөрэнэ киирэрим эмиэ быһаарыллыбыт курдук буолла. Москва физкультурнай институтун туһунан өйдөбүл баара, онно үөрэммит саха уолаттарыгар сылдьарым, кинилэр Казаков уулусса 18 нүөмэригэр баар уопсай дьиэлэригэр биир хоско Иван Аянитов, Анатолий Габышев, Геннадий Гребнев, Владимир Корякин, Николай Иванов олордохторуна, кэлэ-бара элбэхтэ ыалдьыттаабыт, хоммут да буолуохтаахпын.

Дьэ, киһи эрэ буоллар, поезпыт тиҥийэн-таҥыйан Москва вокзалыгар кэллэ. Мин манна хонук да тохтообокко, ахтылҕаннаах Сахам сиригэр дьулуһабын. Билиэт баар эбит, онон кэмниэ кэнэҕэс Дьокуускай буоругар үктэнним. Сарсыныгар мин күрэхтэһиигэ кэлиибин-барыыбын хааччыйар, Россияҕа да, Союзка да чиэһин көмүскүүр «Урожай» обществобар бардым, бэрэссэдээтэл Афанасий Егорович Алексеев бэркэ үөрэн-көтөн көрүстэ:

– Слава, эҕэрдэлиибит! Барытын истэн-билэн олоробут, бүгүн «Спартак» стадиоҥҥа Саха сирэ уонна Монголия дьахталларын волейболга көрсүһүүлэрэ буолар, онно кэлээр эрэ, – диир.

Итиэннэ М.П. Кочнев тэрийиитинэн, көҕүлээһининэн миэтэрэ сэттэ уон сантиметртан итэҕэһэ суох үрдүк уҥуохтаах кыргыттары талан, дьахталларга республика сүүмэрдэммит хамаандатын тэрийбиттэрин, онно үксэ эдьиийдэр киирбиттэрин, ол иһигэр Пермякова курдук талааннаах саха кыргыттара оонньуулларын кэпсээтэ. Сайын чэпчэки атлетикаҕа, волейболга, теннискэ Саха сирин дьахталларын спартакиадатын ыыппыттарыгар 200-чэкэ спортсменка 14 оройуонтан, куораттан кыттыбыт. Бүгүн республика хамаандата Монголия волейболисткаларын кытта оонньуур кэрэ бэлиэ күннэрэ эбит.

Ити кэнниттэн бэрэссэдээтэл ыҥырыытынан хоһугар «Урожай» үлэһиттэрэ киирдилэр, кинилэргэ мин хайдах тустубуппун кэпсээтим, бэркэ сэҥээрэн ыйыталастылар, өйдөбүнньүк бэлэх туттардылар.

Киэһэ «Спартак» стадиоҥҥа тиийбитим – киһи да киһи! Ити иннинэ омук спортсменнара Саха сиригэр биирдэ эмэ кэлэ сылдьыбыттара дуу, суоҕа дуу, мин өйдүүрбүнэн, кэлин 1967 сыллаахха Куба – РСФСР – Саха сирин бөҕөстөрүн матчевай көрсүһүүлэрэ улахан өрүкүнэһиини таһаарбыттааҕа. Ол иһин 1965 сыл сайыныгар волейболистка монголкалары көрөөрү, стадиоҥҥа киһи киһитин билсибэт үлүгэрэ. Миигин тута трибунаҕа таһаардылар, обкомол I сэкирэтээрэ А.И. Михеев, «Урожай» уобаластааҕы сэбиэтин бэрэссэдээтэлэ А.Е. Алексеев икки өттүбэр тураллар. Маннык салайааччылар ортолоругар түбэспиппиттэн уонна стадион былаһын тухары быыһа-арда суох дьон олороруттан улаханнык долгуйдум.

– Чурапчы орто оскуолатын быйыл бүтэрбит Вячеслав Карпов Махачкала куоракка ССРС уолат-тарга чемпиона буолан кэллэ, кинини айхаллыаҕыҥ! – диэн Афанасий Егорович микрофонунан биллэрбитэ стадион устун уорааннанан, күүһүрэн дуораһыйда, ытыс тыаһа ньиргийдэ.

Онтон ЫБСЛКС обкомун I сэкирэтээрэ Андрей Иванович Михеев, «Урожай» общество уобаластааҕы сэбиэтин бэрэссэдээтэлэ Афанасий Егорович Алексеев утуу-субуу уруйдаан-айхаллаан тыл эттилэр. Обкомол Бочуотунай грамотатынан наҕараадаланным, анал үлэҕинэн оҥоһуллубут 16 калибрдаах, икки уостаах «ИЖ» сааны «Урожай» аатыттан бэлэхтээтилэр. Хаһан да оннук чиэстээһиҥҥэ сылдьыбатах, тустууттан атыҥҥа аралдьыйбатах, республика комсомолун, спордун бас-көс дьонун, сахам норуотун аатыттан элбэх киһи эҕэрдэлиирин билбэтэх тыа оҕото үөрдүм аҕай. «Ама бу мин дуо?» диэн итэҕэйиэ да суох курдук буолуталыыбын. Дьон-сэргэ санаата кэлбитэ, өрө көтөҕүллүбүтэ диэн сүрдээх, сотору-сотору, били, хаһыакка суруйалларыныы «өргө диэри уҕараабат дохсун ытыс тыаһа» өрүтэ оргуйар. Харда тыл этэрбэр наһаа долгуйан, тугу саҥарбыппын да өйдөөбөт туруктанным, махтанным уонна инникитин өссө да үчүгэйдик тустан, Сахам сирин чиэһин ситиһиилээхтик көмүскүөм диэтим быһыылааҕа.

Чурапчыга тахсарбар өссө арыалдьыттаах буоллум – Москваҕа үрдүкү физкультурнай институту бүтэрбит, үөрэнэр кэмигэр улуу Ватанабэлыын тустубут, соторутааҕыта Россия тыатын сирин бөҕөстөрүгэр бастаабыт, ол саҕана «Урожайга» инструктордыыр Анатолий Прокопьевич Габышев барсар буолла. Чурапчыга тиийбиппитигэр, били, эргэ кулууппутугар баппат элбэх киһи мустубут, оройуон спорткомитетын бэрэссэдээтэлэ Афанасий Кирикович Софронов мунньаҕы салайан ыытта. Төрөөбүт-үөскээбит оройуонум аатыттан синньигэс көлүөһэлээх, токур урууллаах спортивнай бэлисипиэт бэлэхтээтилэр. Биир дойдулаахтарым, аҕа табаарыстарым үөрэн, кыайыыбынан киэн тутта тыл эппиттэриттэн «ок-сиэ, Сойуус чемпиона буолар үчүгэй да эбит!» дии санаатым. Тренерим Дмитрий Петрович суоҕуттан хомойбутум. Кини ыарытыйара, мин хас да куоратынан күрэхтэһэ сырыттахпына, уоппускатыгар Трускавец курордугар эмтэнэ барбыт этэ.

Сарсыныгар Афанасий Кирикович оройуоннааҕы киинэ ситимиттэн «ГАЗ» массыыналарын уларсан, Чакырдаатыбыт. Кирикович Одьулуунтан төрүттээх буолан, ытык сирдэргэ тохтоон, алҕаан ааһар буолан, өр баҕайы айаннаатыбыт. Кэмниэ кэнэҕэс Чакыр дэриэбинэтэ маһы быыһынан элэҥнээн көһүннэ, мин дьиэм аттыгар массыынабыт хорус гынар.

Ийэм эһэбиниин, эбэбиниин, кииринньэҥ аҕам Миитэрэйдиин, балыстаах бырааппыныын, таа-йым Ньукулайдыын туох да олус үөрэн-көтөн көрүстүлэр. Дьоммун, чуолаан, ийэм эрэйдээҕи, арааһа, ол иннигэр да, кэннигэр да итинник үөрдүбэтэх буолуохтаахпын. Ийэбэр өрүү иэстээх, кини иннигэр тугу эрэ ситэ оҥорботох курдук хом санаа куруук миэхэ баар. Мин таптаан ааҕар «Молодая гвардиябар» маннык тыллар баалларын мэлдьи өйдөөн кэлээччибин: «Оглянись же и ты, юноша, мой друг, оглянись, как я, и скажи, кого ты обижал в жизни больше, чем мать, – не от меня ли, не от тебя, не от него, не от наших ли неудач, ошибок и не от нашего ли горя седеют наши матери? А придет час, когда мучительным упреком сердцу обернется все это у материнской могилы. Мама, мама!.. Прости меня, потому что ты одна на свете можешь прощать, положи руку на голову, как в детстве, и прости…»

Сайыҥҥы күн төһө да киэһэрдэр, итиитин өссө да ыһыкта илигэ, онон тиритэ-хорута чэй иһэн бурулатан бүтэн таһырдьа тахсыбытым – тэлгэһэҕэ саас-тыы уолаттарбын кытта миигиттэн быдан балыс Афоня Кириллиннээх (билигин Чурапчы улууһун дьаһалтатын баһылыгын солбуйааччы) эҥин мус-тубуттар. Тустуум сонунун истэ охсор баҕалаахтар, кыратык сүбэлэһээт, Таатта эбэҕэ Хатыҥнаах диэн сиргэ сөтүөлүү тэбиннибит. Сөтүөлээн, уунан ыһыахтанан, ыраах умсарга куоталаһан күннүү сырыттахпытына, үөһэ мотоцикл тыаһа татыгыраата уонна:

– Слава! Оҕолоор! Мунньаххыт саҕаланна, Слава, бары эйигин кэтэһэн олороллор, – диэтэ.

Дьэ бабат-татат диэн дэриэбинэҕэ ыстанныбыт. Мин дьиэбинэн эргийэн, кулуупка чугаһаабытым, таһырдьа кыһыл таҥаска бөдөҥ баҕайы маҥан буукубаларынан суруйбуттара ыраахтан көстөр:

«УОЛБУТ СЛАВА КАРПОВ – СОВЕТСКАЙ СОЮЗ ЧЕМПИОНА».

Тута куттуун-сүрдүүн чэпчии түстүм, санаабар үчүгиий-үчүгэй буолла. Аҕыйах жетоммун, тустууга ылбыт бэлиэлэрбин анньыммыт чемпион кыһыл лиэнтэтин санныбар иилинэн сценаҕа тахсыбыппар, биир дойдулаахтарым бары дохсуннук ытыстарын таһынан көрүстүлэр. Көрбүтүм – кулууп иһигэр ыы-быччары киһи мустубут. Кэлин эбэм Боккуойа: «Оҕом эрэйдээх уордьаннарын, мэтээллэрин барытын анньынан тахсыбыта үчүгэй да этэ», – диэн этэр буолара.

Дэриэбинэҕэ сайын хаһан сүгүн-саҕын уоттаммыппыт баарай, электричество уота суох, чүмэчинэн сырдатынан олордубут. Оттон мин өйбөр-санаабар онтон ордук сырдык, ыраас, чаҕылхай күн суоҕар дылы этэ. Үөрүү-көтүү, ырыа-тойук оройо аһыллыбыта. «Бу барыта миигиттэн ситимнээх, миэхэ ананар ээ» диэн санааттан кыбыста саныырым.

Бу сырыыга 12 калибрдаах эмиэ икки уостаах саа бэлэхтээтилэр. Онон соҕотохто байан хааллым – икки саалаахпын, тимир аттаахпын. Кэлин бэлисипиэппин, 12 калибрдаах саабын бырааппар Миитэрэйгэ бэлэхтээбитим, оттон 16-лаах «Урожайдар» биэрбит сааларын уоһугар «Чемпиону СССР среди юношей Вячеславу Карпову от ДСО «Урожай» диэн суруктаах. Оннук саа оччолорго суох буолан, дьон булка сырыттахпына «суруктаах саа» диэн аат-тыыллара. Кырдьык да, бэртээхэй саа түбэспит этэ, билиҥҥэ диэри сиэним ытар, быйыл күһүн (бэлэхтэммитэ 45 сыл ааспытын кэннэ!) ити саанан хас да куһу өлөрөн, биһиэхэ, эһэлээх эбэтигэр, амсатан үөртэ.

Ол түүн хойукка диэри кулуупка сырыттым, сарсыарда түлүк уу уонна уһуктуу диэн кирбиилэргэ сытан олус үчүгэй, дьикти-кэрэ, киһи тылынан эппэт минньигэс иэйиититтэн эмискэ төлө биэрбитим: «Сэбиэскэй Сойуус диэн үчүгэй даҕаны!» Ийэм аах кэлин ону саныы-саныы күлсэр буолаллара.

Дьол уонна сор аҕас балыстар. Ити сыл кииринньэҥ аҕам Миитэрэй улаханнык ыалдьыбыта, халтаһалара иһэн тахсан, тугу да көрдөрбөт буоллулар. Покровскай балыыһатыгар сыппыта, мин онно тахсан биирдэ аан быыһынан көрбүтүм – Миитэрэй лип сытаахтыыр, ийэм аттыгар ытыы олороохтуур. Ийэбин аһынан, бэйэм хараҕым уута ыгыллан таҕыста. Ийэм Миитэрэйи ыарыылыырыгар икки мэндиэмэннээх дьиэ маҥнайгы этээһигэр тымныы баҕайы хоско олороохтообута. Онно тымныйбыта кэлин улаханнык охсубута, сүһүөхтэрэ иһэн тахсар полиартрит диэн ыарыы буулаан, кэмин иннинэ ииннээбитэ…

Ити күһүн Миитэрэй өлбүтэ, миигин биирдэ мөҕөн көрбөтөх, сытыары-сымнаҕас, холку кииринньэҥ аҕам өлбүтүттэн улаханнык хомойбутум. Ханныгын да иһин аҕата суох дьоҥҥо аҕа буолан, бары да сүрдээхтик өйөһөн-убаһан, дьиэбитигэр кыһалҕалаах кэм тирээтэҕинэ, олоххо улахан уопуттаах, сэриини ааспыт, дьоҥҥо-сэргэҕэ авторитеттаах көмүскэтэр киһибит киэҥ-холку көхсүн кэннигэр саһыах курдук сананарбытыттан мэлийдэхпит. Ийэм кэргэнин улаханнык аһыйбытын түҥнэри хайыһан олорон, кистии-саба хараҕын уутун сотторуттан сэрэйэрим.

Оттон мин тустуубар эмиэ төбөм оройунан түс-пүтүм. Советскай Союз уолаттарга чемпиона буоллум, аны ханнык чыпчаалларга дьулуһабын? Билигин саастаах киһи сиэринэн, ону-маны эргитэн көрдөххө, биһиги тустарга сорук туруорунан тиийиэхтээх чыпчаалбыт Советскай Союз таһымынан бүппүт эбит. Ханна эрэ аахпыттааҕым – биир эдэр автор Шекспиртэн: «Мин эн курдук суруйуохпун баҕарабын», – диэбитигэр Шекспир: «Мин Таҥара курдук суруйуохпун баҕарар этим да, Шекспир эрэ буолан хааллым, оттон эн баҕаҥ диэн баара-суоҕа мин эрэ курдук суруйуу буоллаҕына, олох ыраатыаҥ суоҕа», – диэн.

Син ол кэриэтэ биһиги, саха бөҕөстөрө, Россияны эрэ атаакалыы сылдьар кэммитигэр тустуубут үгэнэ түбэспитэ. Оттон биһиги былааммыт Россияны уҥуордаан, Советскай Союз таһымыгар тахсыы этэ. Тренердэрбит: «Аан дойдуга, Олимпийскай оонньууларга тустуохтааххыт», – диэн сорук туруорбуттара буоллар, ким билиэй, баҕар, онно тарбачыһа сатаан, өссө үрдүк көрдөрүүлэри ситиспит буолуох этибит.

Биһиги буоллаҕына сахалартан Семен Дмитриев ССРС-ка төрдүс миэстэ буолбутун, онно аан дойду чемпиона Айдын Ибрагимовы баһыйбытын холобур оҥостон, кини холобурун хатылыыр, сатаннаҕына аһары түһэр баҕалаах этибит. Кэлин араас түһүлгэлэргэ олимпиец Н. Алборяны, Европа чемпиона Р. Доборджгенидзены, ССРС чемпиона Т. Алибегашвилины хотуталаабытым да, тоҕо аан дойду таһымыгар тустубаппын диэн санаа охсуллубат буолара. Москванан, Кавкаһынан сылдьарынан, Союзка, Россияҕа тустарынан сөп буолан, муҥурданан хаалбытым. Быһата, мин Шекспирдиин кэпсэппит эдэр суруйааччы курдук өйдөөх-санаалаах эбиппин.

Оттон 1965 сыллаахха мин өссө улахан дьоҥҥо 57 киилэҕэ тахсан, Нальчик куоракка «Урожай» общество киин сэбиэтигэр уонна Дьокуускай куорат аһаҕас чемпионатыгар бастаталаабытым. Куорат түһүлгэтигэр аан маҥнай Алкивиад Ивановтуун көрсүбүппүт.

Литературнай редактортан: Ол хапсыһыы буолуохтааҕа, бэл биһигини, ыраах Томпо Мэҥэ Алданын ахсыс кылааска үөрэнэ сылдьааччылары, долгуппута. Ыраас лиис үөһэ өттүгэр «Слава Карпов уонна Алкивиад Иванов көрсөллөр, хайалара кыайыай?» диэн ыйытыыга кылаас оҕолоро икки аҥыы хайдан, сорохтор Слава, атыттар Алкивиад буолан бэрт омуннаах мөккүөр буола сылдьыбыттааҕа. Хапсыһыы түмүгүнэн ким кыайбытын билигин чуолкай этэр кыах суох, арааһа, тэҥнэспиттэр быһыылааҕа, арай «Эдэр коммунист» хаһыакка «Алкивиад инники үктүү сылдьар атаҕын хайа да бэйэлээххэ биэрбэт үгэстээх, арай бу сырыыга Карпов санаатар эрэ ол атаҕын харбаан ылыталаата» диэн баарын өйдүүбүн.




Конец ознакомительного фрагмента.


Текст предоставлен ООО «Литрес».

Прочитайте эту книгу целиком, купив полную легальную версию (https://www.litres.ru/chitat-onlayn/?art=70539754?lfrom=390579938) на Литрес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.